រដ្ឋនិងក្រុមហ៊ុនមួយរួមគ្នាអភិវឌ្ឍន៍ផលិតកម្មដំណាំចំណីសត្វលើផ្ទៃដី ៦០០ហិកតា ក្នុងខេត្តកំពង់ឆ្នាំង

• Proeksa Meas
• 9 ខែ​មេសា 2026
• ព័ត៌មានសំណង់
• 658 មើល

រាជរដ្ឋាភិបាល តាមរយៈក្រសួងកសិកម្ម រុក្ខាប្រមាញ់ និងនេសាទ នឹងសហការគ្នាជាមួយក្រុមហ៊ុន BAUER Group ដើម្បីអនុវត្តន៍គម្រោងអភិវឌ្ឍន៍ផលិតកម្មដំណាំចំណីសត្វលើផ្ទៃដីកសិកម្មប្រមាណ ៦០០ ហិកតា ដែលមានទីតាំងនៅខេត្តកំពង់ឆ្នាំង ក្នុងពេលឆាប់ៗខាងមុខនេះ។

នេះបើយោងតាមពិធីចុះហត្ថលេខាលើអនុស្សរណៈនៃការយោគយល់គ្នា(MoU) រវាងក្រសួងកសិកម្ម រុក្ខាប្រមាញ់ និងនេសាទ ជាមួយក្រុមហ៊ុន BAUER Group ក្រោមវត្តមានលោកអគ្គលេខាធិការ សរ ចិត្រា

តំណាងដ៏ខ្ពង់ខ្ពស់ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ នាព្រឹកថ្ងៃទី៣០ ខែមីនា ឆ្នាំ២០២៦។

អនុស្សរណៈនៃការយោគយល់គ្នា (MoU) ស្តីពីការធ្វើការសិក្សាសមិទ្ធិលទ្ធភាពសម្រាប់គម្រោងអភិវឌ្ឍន៍ផលិតកម្មដំណាំចំណីសត្វលើផ្ទៃដីកសិកម្មប្រមាណ ៦០០ ហិកតា ដែលមានទីតាំងនៅខេត្តកំពង់ឆ្នាំង នឹងត្រូវអនុវត្តន៍ដោយក្រសួងកសិកម្ម រុក្ខាប្រមាញ់ និងនេសាទ ជាមួយក្រុមហ៊ុន BAUER Group។

ក្រសួងកសិកម្មបានប្រកាសស្វាគមន៍ និងគូសបញ្ជាក់ថា ការចុះហត្ថលេខាលើ MoU នេះ ធ្វើឡើងក្នុងគោលបំណងធ្វើការសិក្សាពីការអភិវឌ្ឍន៍ផលិតកម្មដំណាំចំណីសត្វ សម្រាប់ផ្គត់ផ្គង់ចំណីដល់គោទឹកដោះ នៅលើផ្ទៃដីប្រមាណ ៦០០ហិកតា ការកៀរគរផ្នែកហិរញ្ញវត្ថុ ការសិក្សាបច្ចេកទេសក្នុងការកែលម្អដី និងរៀបចំប្រព័ន្ធធារាសាស្រ្តសម្រាប់ដាំដំណាំចំណីសត្វ ក្នុងការគាំទ្រលើការវិនិយោគផលិតកម្មគោទឹកដោះ ដែលបម្រើឱ្យការប្រើប្រាស់ និងផ្គត់ផ្គង់ក្នុងស្រុក៕

• Cooperation and networking
• Agriculture