រោងចក្រផលិតកែច្នៃកៅស៊ូនៅខេត្តត្បូងឃ្មុំ តម្លៃប្រមាណ៣០លានដុល្លារ បើកសម្ពោធជាផ្លូវការ

Proeksa Meas
5 ខែមិថុនា 2026
ព័ត៌មានសំណង់
581 មើល

កិច្ចសម្ពោធរួមគ្នានៃរោងចក្រកៅស៊ូ មស៍ រ៉ាប់ប៊ើរ ដោយសម្តេចនាយករដ្ឋមន្ត្រី ហ៊ុន ម៉ាណែត និងលោកឯកអគ្គរដ្ឋទូត Wang Wenbin មានគោលបំណងជំរុញការនាំចេញកសិ-ឧស្សាហកម្មទៅកាន់សហភាពអឺរ៉ុប…

រោងចក្រផលិតកែច្នៃកៅស៊ូ របស់ក្រុមហ៊ុន គីមស៍ រ៉ាប់ប៊ើរ នៅខេត្តត្បូងឃ្មុំ តម្លៃប្រមាណ៣០លានដុល្លារនៅខេត្តត្បូងឃ្មុំ បានសម្ពោធដាក់ឱ្យប្រើប្រាស់ជាផ្លូវការហើយ ដោយសម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងលោក វ៉ាង វិនពីន ឯកអគ្គរដ្ឋទូតចិនប្រចាំប្រទេសកម្ពុជា កាលថ្ងៃទី២៧ ខែឧសភា ឆ្នាំ២០២៦។

នាឱកាសនោះ សម្ដេចធិបតី បានចាត់ទុកការសម្រេចវិនិយោគរបស់រោងចក្រផលិតកែច្នៃជ័រកៅស៊ូរបស់ក្រុមហ៊ុន គីមស៍ រ៉ាប់ប៊ើរ (ខេមបូឌា) ឯ.ក គឺជាកត្តាឆ្លុះបញ្ចាំងនូវកត្តាសន្ដិសុខ សុវត្ថិភាព និងបរិយាកាសធុរកិច្ចអំណោយផលរបស់កម្ពុជា ខណៈសម្ដេចក៏បានថ្លែងអំណរគុណចំពោះវិនិយោគិនចិន ដែលតែងតែជឿជាក់ និងមកបណ្ដាក់ទុនវិនិយោគនៅក្នុងប្រទេសកម្ពុជា។

រោងចក្រផលិតកែច្នៃកៅស៊ូ របស់ក្រុមហ៊ុន គីមស៍ រ៉ាប់ប៊ើរ (ខេមបូឌា) មានទីតាំងស្ថិតនៅស្រុកត្បូងឃ្មុំ ខេត្តត្បូងឃ្មុំ។ រោងចក្រនេះបានសម្ពោធក្នុងគោលបំណងលើកកម្ពស់ និងចូលរួមចំណែកក្នុងការអភិវឌ្ឍវិស័យកសិឧស្សាហកម្ម តាមរយៈការផលិតកែច្នៃជ័រកៅស៊ូក្រែបកម្រិតអន្តរជាតិ និងតាមស្តង់ដារបស់សហភាពអឺរ៉ុប ដើម្បីនាំចេញទៅក្រៅប្រទេស និងផ្គតផ្គង់ជ័រកៅស៊ូដល់រោងចក្រនានានៅក្នុងស្រុក សម្រាប់ការផលិតសំបកកង់ឡាន ព្រមទាំងសម្ភារផ្សេងៗទៀត។

សូមជម្រាបដែរថា រោងចក្រផលិតកែច្នៃកៅស៊ូ របស់ក្រុមហ៊ុន គីមស៍ រ៉ាប់ប៊ើរ ដែលត្រូវសម្ពោធនៅពេលនេះ ប្រើប្រាស់ទុនវិនិយោគប្រមាណ៣០លានដុល្លារអាម៉េរិក លើផ្ទៃដីជិត១៥ហិកតា ដែលមានសមត្ថភាពផលិតកៅស៊ូចំនួន ១០ម៉ឺនតោនក្នុងមួយឆ្នាំ។ ផ្តល់ការងារផ្ទាល់ជូនប្រជាពលរដ្ឋប្រមាណ៣០០នាក់ និងដោយប្រយោល (អ្នកចៀរជ័រ) ជាង ៥០០០០នាក់។ នៅថ្ងៃខាងមុខ ក្រុមហ៊ុនត្រៀមវិនិយោគរោងចក្រទី២ នៅខេត្តរតនគិរី ក្នុងទំហំទុន ៣០លានដុល្លារអាម៉េរិកបន្ថែមទៀត ដែលមានសមត្ថភាពផលិតកៅស៊ូចំនួន១០ម៉ឺនតោន ក្នុងមួយឆ្នាំ ដូចនឹងគម្រោងទី១ដែរ៕