ក្រុមហ៊ុនមួយស្នើបង្កើតរោងចក្រផលិតប្រេងរំអិល លើផ្ទៃដីទំហំជាង ៤ហិកតា នៅខេត្តកណ្តាល

• Proeksa Meas
• 3 ខែ​មិថុនា 2026
• ព័ត៌មានសំណង់
• 554 មើល

ក្រុមហ៊ុន ខសមិកស៍ អយល៍ ខេមបូឌា ឯ.ក (COSMIC OIL CAMBODIA CO., LTD.) មានគម្រោងបង្កើតរោងចក្រផលិតប្រេងរំអិល លើផ្ទៃដីទំហំជាង ៤ហិកតា នៅខេត្តកណ្តាល។ នេះបើយោងតាមហ្វេសប៊ុកក្រសួងបរិស្ថាន កាលពីថ្ងៃទី២៦ ខែឧសភា ឆ្នាំ២០២៦។

តាមរយៈឯកឧត្តម ទា ជុប រដ្ឋលេខាធិការក្រសួងបរិស្ថាន បានអញ្ជើញដឹកនាំកិច្ចប្រជុំអន្តរក្រសួង តំណាងក្រសួង-ស្ថាប័នពាក់ព័ន្ធ អគ្គនាយកដ្ឋានជំនាញនៃក្រសួងបរិស្ថាន និងមន្ត្រីបច្ចេកទេសនៃនាយកដ្ឋានវាយតម្លៃហេតុប៉ះពាល់បរិស្ថាន បានឱ្យដឹងថា គោលបំណងនៃកិច្ចប្រជុំ គឺដើម្បីពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថានពេញលេញ (EIA) សម្រាប់គម្រោងបង្កើតរោងចក្រផលិតប្រេងរំអិលនេះ។

ទន្ទឹមនេះ កិច្ចប្រជុំអន្តរក្រសួងក៏មានគោលដៅធានាថាម្ចាស់គម្រោងពិតជាបានយកចិត្តទុកដាក់ខ្ពស់លើកិច្ចគាំពារបរិស្ថាន តាមរយៈការប្តេជ្ញាអនុវត្តវិធានការកាត់បន្ថយ និងទប់ស្កាត់ផលប៉ះពាល់អវិជ្ជមាននានាដែលអាចកើតមានឡើងទាំងលើធនធានរូបសាស្ត្រ ជីវសាស្ត្រ និងសេដ្ឋកិច្ច-សង្គម ដើម្បីជំរុញឱ្យដំណើរការគម្រោងប្រព្រឹត្តទៅស្របតាមគោលការណ៍អភិវឌ្ឍន៍ប្រកបដោយចីរភាព និងតាមលិខិតបទដ្ឋានគតិយុត្តជាធរមាននៃកម្ពុជា។

សូមជម្រាបថា គម្រោងបង្កើតរោងចក្រផលិតប្រេងរំអិល លើផ្ទៃដីទំហំ ៤,១៩៩៦ហិកតា មានទីតាំងស្ថិតនៅបណ្តោយផ្លូវជាតិលេខ៤ ភូមិទឹកជា ឃុំពើក ស្រុកអង្គស្នួល ខេត្តកណ្តាល វិនិយោគដោយក្រុមហ៊ុន ខសមិកស៍ អយល៍ ខេមបូឌា ឯ.ក (COSMIC OIL CAMBODIA CO., LTD.) (ម្ចាស់គម្រោង)។ គម្រោងនេះសិក្សាដោយក្រុមហ៊ុនទីប្រឹក្សា SAFEGUARD MANAGEMENT and CONSTRUCTION CO., LTD៕

• MOE
• environment
• EIA