រដ្ឋបើកការដ្ឋានសាងសង់ហេដ្ឋារចនាសម្ព័ន្ធនៅសហគមន៍តំបន់ឆ្នេរ តម្លៃជាង១៣លានដុល្លារ ជាផ្លូវការ

Proeksa Meas
8 ខែមេសា 2026
ព័ត៌មានសំណង់
457 មើល

គម្រោងហេដ្ឋារចនាសម្ព័ន្ធនៅសហគមន៍តំបន់ឆ្នេរ ដែលស្ថិតក្នុងភូមិសាស្រ្តខេត្តកែប និងខេត្តកំពត បានប្រកាសបើកការដ្ឋាសាងសង់ជាផ្លូវការហើយ កាលពីថ្ងៃទី២៩ មីនា ២០២៦ ក្រោមអធិបតីភាព ឯកឧត្តមឧបនាយករដ្ឋមន្ដ្រី សាយ សំអាល់ រដ្ឋមន្តីក្រសួងរៀបចំដែនដី នគរូបនីយកម្ម និងសំណង់។

ក្រសួងរៀបចំដែនដី បានឱ្យដឹងថា ក្រុមការងាររាជរដ្ឋាភិបាលចុះមូលដ្ឋានខេត្តកំពត និងខេត្តកែប រដ្ឋបាលជលផល និងក្រុមការងារគម្រោងបែងចែកដីដើម្បីសង្គមកិច្ច និងអភិវឌ្ឍសេដ្ឋកិច្ច ដំណាក់កាលទី៣ (LASED III) បានបើកការដ្ឋានវិនិយោគលើហេដ្ឋារចនាសម្ព័ន្ធនៅសហគមន៍តំបន់ឆ្នេរ សហគមន៍នេសាទព្រែកត្នោត ត្រពាំងរពៅ ត្រពាំងសង្កែ កំពង់សាមគ្គី ខេត្តកំពត និងសហគមន៍នេសាទអូរក្រសារ ខេត្តកែប។

គម្រោងវិនិយោគនេះ គឺដើម្បីបង្កើតមុខរបរបន្ថែមជូនប្រជាសហគមន៍ដែលពីមុនគឺនេសាទតាមបែបធម្មជាតិ និងប្រពៃណីទំនៀមទម្លាប់ ការចិញ្ចឹម និងដើម្បីបង្កើនទេសចរណ៍ទៅកំសាន្តនៅក្នុងតំបន់សហគមន៍ទាំងនេះបានកាន់តែច្រើនឡើងដែលនឹងជួយដល់ជីវភាពរបស់ប្រជាសហគមន៍ឱ្យកាន់តែប្រសើរ។

គម្រោងហេដ្ឋារចនាសម្ព័ន្ធនៅសហគមន៍តំបន់ឆ្នេរ នៅក្នុងខេត្តកំពត និងកែប គឺជាផ្នែកមួយនៃគម្រោង LASED III ដែលបានជ្រើសរើសគាំទ្រសហគមន៍នេសាទចំនួន១២ទីតាំង ស្ថិតក្នុងខេត្តចំនួន៣នៅតាមបណ្ដោយឆ្នេរសមុទ្រ ដែលគ្រោងចំណាយថវិកាសរុប ចំនួន ១៣,១លានដុល្លារអាមេរិក។ ក្នុងនោះដែរ គ្រោងចំណាយសម្រាប់ការសាងសង់ហេដ្ឋារចនាសម្ព័ន្ធ ចំនួន ១១,៣៩លានដុល្លារអាមេរិក ដែលផ្តល់អាទិភាពលើការសាងសង់ហេដ្ឋារចនាសម្ព័ន្ធចាំបាច់ដែលជួយទ្រទ្រង់ ជំរុញបង្កើតជម្រើសមុខរបរថ្មី ពង្រឹងនិងពង្រីកមុខរបរដែលមានស្រាប់ ក្នុងទិសដៅលើកកម្ពស់ជីវភាពប្រជាពលរដ្ឋមូលដ្ឋាន។

រដ្ឋាភិបាល បានចាប់ផ្តើមបានបើកការដ្ឋានសាងសង់ជាផ្លូវការលើគម្រោងសហគមន៍នេសាទ ចំនួន ៥ ហើយនឹងបន្តបើកការដ្ឋានសាងសង់នៅលើ ៧ទីតាំងទៀតក្នុងពេលឆាប់ៗខាងមុខនេះ៕