ក្រសួងបរិស្ថាន និង WB រួមគ្នាពង្រឹងគ្រប់គ្រងការអភិរក្សតំបន់ការពារលើផ្ទៃដីជាង ៤០ម៉ឺនហិកតា

Proeksa Meas
23 ខែកក្កដា 2026
ព័ត៌មានអចលនទ្រព្យ
469 មើល

ក្រសួងបរិស្ថាន និងធនាគារពិភពលោក (World Bank) បានប្តេជ្ញាពីការពង្រឹងធនធានធម្មជាតិសម្រាប់ការអភិវឌ្ឍប្រកបដោយចីរភាពរបស់កម្ពុជា ខណៈភាគីទាំងពីរ ក៏បានរួមគ្នាពង្រឹងគ្រប់គ្រងការអភិរក្សតំបន់ការពារលើផ្ទៃដីជាង ៤០ម៉ឺនហិកតាផងដែរ។ នេះបើយោងតាមហ្វេសប៊ុករបស់ធនាគារពិភពលោក កាលពីថ្ងៃទី១៣ ខែកក្កដា ឆ្នាំ២០២៦។

ធនាគារពិភពលោក បានបញ្ជាក់ថា នៅក្នុងជំនួបពិភាក្សារវាង អនុប្រធានធនាគារពិភពលោក លោក Guangzhe Chen ជាមួយ អ៊ាង សុផល្លែត រដ្ឋមន្ត្រីក្រសួងបរិស្ថាន កាលពីសប្តាហ៍មុន បានពិភាក្សាពីការគ្រប់គ្រងបរិស្ថាន និងធនធានធម្មជាតិ រួមទាំងការគាំទ្ររបស់ធនាគារពិភពលោកចំពោះកម្ពុជា។

WB បានបញ្ជាក់ថា ភាគីទាំង បានជំរុញគម្រោងនិរន្តរភាពតំបន់ទេសភាព និងទេសចរណ៍កម្ពុជា តាមរយៈការពង្រឹងការគ្រប់គ្រងការអភិរក្សលើផ្ទៃដីជាង ៤០៦.០០០ហិកតា ពង្រីកការរៀបចំផែនការតំបន់ការពារ ពង្រីកហេដ្ឋារចនាសម្ព័ន្ធទេសចរណ៍ផ្អែកលើធម្មជាតិ គាំទ្រផ្លូវប្រវែងជិត ៩៨គីឡូម៉ែត្រ និងផ្តល់សេវាអនាម័យប្រសើរដល់ប្រជាជនជាង ១សែននាក់។

WB និងក្រសួងបរិស្ថាន បានទទួលស្គាល់ពីសារៈសំខាន់នៃការចាត់ទុកព្រៃឈើ និងប្រព័ន្ធអេកូឡូស៊ី មិនត្រឹមតែជាធនធានដែលត្រូវការពារប៉ុណ្ណោះទេ ថែមទាំងជាទ្រព្យសម្បត្តិជាតិប្រកបដោយផលិតភាព ដែលរួមចំណែកដល់សន្តិសុខទឹក ភាពធន់នឹងអាកាសធាតុ ការអភិរក្សជីវចម្រុះ ការបង្កើតការងារ និងការចូលរួមពីវិស័យឯកជនដើម្បីកំណើន។

ជាមួយគ្នានេះ ធនាគារពិភពលោក នៅតែជាដៃគូ ក្នុងការជំរុញឱ្យមានការអភិវឌ្ឍន៍ប្រកបដោយភាពបៃតង ភាពធន់នឹងផលប៉ះពាល់ និងការអភិវឌ្ឍប្រកបដោយបរិយាប័ន្នរបស់កម្ពុជា៕ (អានបន្ថែម)