កម្ពុជាទទួលបានគម្រោងជលផលសមុទ្រ​ និង​តំបន់ឆ្នេរប្រកបដោយចីរភាព មានតម្លៃ ៧៣លានដុល្លារ

• Proeksa Meas
• 23 ខែ​កក្កដា 2026
• ព័ត៌មានសំណង់
• 154 មើល

កម្ពុជា ទទួលបានគម្រោង ជលផលសមុទ្រ​និង​តំបន់ឆ្នេរប្រកបដោយចីរភាព ដែលមានទឹកប្រាក់ ៧៣ លានដុល្លារអាម៉េរិក ខណៈគម្រោងនេះនឹងជួយលើកកម្ពស់ជីវភាពរស់នៅរបស់សហគមន៍តំបន់ឆ្នេរកម្ពុជាកាន់តែប្រសើរថែមទៀត។ នេះបើយោងតាមសេចក្តីប្រកាសរបស់ធនាគារអភិវឌ្ឍន៍អាស៊ីប្រចាំកម្ពុជា (ADB) កាលថ្ងៃទី១៣ ខែកក្កដា​ ឆ្នាំ២០២៦។

ADB បានឱ្យដឹងថា គម្រោងជលផលសមុទ្រ​និង​តំបន់ឆ្នេរប្រកបដោយចីរភាព (Sustainable Coastal and Marine Fisheries – SCMF) ដែលមានទឹកប្រាក់ ៧៣លានដុល្លារ នឹងជួយស្តារធនធានជលផលប្រមាណ ៤០% និងផ្តល់ផលប្រយោជន៍ដល់ប្រជាជនប្រមាណ ២០០,០០០ នាក់ នៅក្នុងសហគមន៍តំបន់ឆ្នេររបស់កម្ពុជា។

ជាមួយគ្នានេះ ថ្លែងក្នុងពិធីសម្ពោធការិយាល័យជលផលខេត្តកែប ក្រោមអធិបតីភាពឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកស្រី Yasmin Siddiqi នាយិកាធនាគារអភិវឌ្ឍន៍អាស៊ីប្រចាំកម្ពុជា (ADB) បានលើកឡើងថា ពិធីនេះមិនមែនគ្រាន់តែជាការបញ្ចប់ការសាងសង់អគាររដ្ឋបាលថ្មីមួយប៉ុណ្ណោះទេ។

លោកស្រីបន្តថា «ថ្ងៃនេះ យើងអបអរសាទរមិនត្រឹមតែការបញ្ចប់ការសាងសង់អគារថ្មីមួយប៉ុណ្ណោះទេ ប៉ុន្តែយើងអបអរសាទរការប្តេជ្ញាចិត្តរួមគ្នាក្នុងការគ្រប់គ្រងជលផលប្រកបដោយចីរភាព ប្រព័ន្ធអេកូឡូស៊ីសមុទ្រដែលមានសុខភាពល្អ និងការលើកកម្ពស់ជីវភាពរស់នៅរបស់សហគមន៍តំបន់ឆ្នេរកម្ពុជា»។

លោកស្រីបានបញ្ជាក់ថា ការិយាល័យជលផលថ្មីនេះ គឺជាការវិនិយោគដ៏សំខាន់លើសមត្ថភាពស្ថាប័ន ដោយផ្តល់ឱ្យមន្ត្រីជលផលនូវមូលដ្ឋានកាន់តែប្រសើរ សម្រាប់ពង្រឹងការសម្របសម្រួល ការត្រួតពិនិត្យ និងការអនុវត្តច្បាប់ ព្រមទាំងផ្តល់សេវាកាន់តែប្រសើរដល់សហគមន៍នេសាទខេត្តកែប និងតំបន់ជុំវិញ។

យោងតាមលោកស្រី ការិយាល័យនេះ ជាផ្នែកមួយនៃគម្រោង SCMF ដែលទទួលបានការគាំទ្ររួមពីរាជរដ្ឋាភិបាលកម្ពុជា ទីភ្នាក់ងារបារាំងសម្រាប់ការអភិវឌ្ឍ (AFD) និង ADB៕

• MAFF
• ADB
• Agriculture and Aquaculture Project