ក្រសួងសាធារណការ ចុះអនុស្សរណៈជាមួយក្រុមហ៊ុន ក្វាងទុង ហុងសេង លើបច្ចេកវិទ្យាដឹកជញ្ជូនឆ្លាតវៃ ដើម្បីធ្វើទំនើបកម្មប្រព័ន្ធគ្រប់គ្រងយានយន្តដឹកជញ្ជូនលើសទម្ងន់

Proeksa Meas
12 ខែកញ្ញា 2026
ព័ត៌មានសំណង់
66 មើល

កិច្ចសហប្រតិបត្តិការនេះផ្តោតលើការបំពាក់បច្ចេកវិទ្យាទិន្នន័យ ទំនើបកម្មស្ថានីយជញ្ជីង និងការបណ្តុះបណ្តាលធនធានមនុស្ស ដើម្បីការពារហេដ្ឋារចនាសម្ព័ន្ធផ្លូវថ្នល់នៅកម្ពុជា

រាជធានីភ្នំពេញ៖ ការកសាង និងការពារបណ្តាញហេដ្ឋារចនាសម្ព័ន្ធផ្លូវថ្នល់នៅកម្ពុជាបានឈានដល់ជំហានធ្វើទំនើបកម្មបែបឌីជីថលថ្មីមួយទៀត តាមរយៈការនាំយកបច្ចេកវិទ្យាដឹកជញ្ជូនឆ្លាតវៃមកអនុវត្តក្នុងប្រព័ន្ធគ្រប់គ្រងការដឹកជញ្ជូន។ នារសៀលថ្ងៃចន្ទ ទី៣១ ខែសីហា ឆ្នាំ២០២៦ ក្រសួងសាធារណការ និងដឹកជញ្ជូន បានរៀបចំពិធីចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយក្រុមហ៊ុនបច្ចេកវិទ្យា ក្វាងទុង ហុងសេង (Guangdong Hongsheng Technology Co., Ltd.) ក្រោមអធិបតីភាព និងជាហត្ថលេខីដោយ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងលោក យិន ជីងមីង ប្រធានក្រុមប្រឹក្សាភិបាល និងជាអគ្គនាយកប្រតិបត្តិក្រុមហ៊ុន ដោយមានការចូលរួមពីថ្នាក់ដឹកនាំ និងមន្ត្រីជំនាញនៃស្ថាប័នទាំងពីរ។

អនុស្សរណៈនៃការយោគយល់គ្នានេះ មានគោលបំណងបង្កើតក្របខ័ណ្ឌកិច្ចសហប្រតិបត្តិការជាយុទ្ធសាស្ត្រ ដើម្បីសិក្សាស្វែងយល់ និងរៀបចំដាក់ឱ្យអនុវត្តនូវប្រព័ន្ធបច្ចេកវិទ្យាដឹកជញ្ជូនឆ្លាតវៃ (Intelligent Transportation Systems) ដែលសមស្របទៅនឹងបរិបទនៃការចរាចរណ៍នៅកម្ពុជា។ កិច្ចសហការនេះ ផ្តោតជាសំខាន់លើការរៀបចំបច្ចេកវិទ្យាទំនើបសម្រាប់គ្រប់គ្រង និងទប់ស្កាត់យានយន្តដឹកជញ្ជូនលើសទម្ងន់កម្រិតកំណត់ ដោយរាប់បញ្ចូលទាំងការផ្លាស់ប្តូរបទពិសោធន៍ បច្ចេកទេស ការសិក្សាលទ្ធភាព ការបង្ហាញបច្ចេកវិទ្យា និងការបណ្តុះបណ្តាលពង្រឹងសមត្ថភាពដល់មន្ត្រីរាជការ។ ការអនុវត្តយន្តការនេះ នឹងជួយគាំទ្រយ៉ាងសកម្មដល់ការធ្វើទំនើបកម្មស្ថានីយជញ្ជីងថ្លឹងយានយន្តនៅទូទាំងប្រទេស ឱ្យប្រែទៅជាប្រព័ន្ធគ្រប់គ្រងដែលផ្អែកលើទិន្នន័យច្បាស់លាស់ មានប្រសិទ្ធភាព និងតម្លាភាពខ្ពស់។

ថ្លែងនៅក្នុងអង្គពិធី ឯកឧត្តម ប៉េង ពោធិ៍នា បានស្នើឱ្យថ្នាក់ដឹកនាំ និងក្រុមហ៊ុន សហការគ្នាឱ្យបានជិតស្និទ្ធក្នុងការស្រាវជ្រាវ និងបង្កើតដំណោះស្រាយបច្ចេកវិទ្យា ដើម្បីធ្វើជាយន្តការបន្ថែមក្នុងការទប់ស្កាត់បទល្មើសដឹកជញ្ជូនលើសទម្ងន់។ ជាមួយគ្នានេះ ឯកឧត្តមរដ្ឋមន្ត្រីក៏បានលើកទឹកចិត្តឱ្យក្រុមហ៊ុន ក្វាងទុង ហុងសេង ចូលរួមចំណែកដល់ការបណ្តុះបណ្តាល និងផ្ទេរចំណេះដឹងបច្ចេកវិទ្យាជូនដល់មន្ត្រី និងបច្ចេកទេសកម្ពុជា ដើម្បីពង្រឹងធនធានមនុស្សក្នុងស្រុក។

កិច្ចសហប្រតិបត្តិការរវាងក្រសួងសាធារណការ និងដឹកជញ្ជូន និងក្រុមហ៊ុន ក្វាងទុង ហុងសេង គឺជាជំហានយុទ្ធសាស្ត្រដ៏សំខាន់ក្នុងការផ្លាស់ប្តូរទម្រង់នៃការគ្រប់គ្រងផ្លូវថ្នល់ ពីការត្រួតពិនិត្យតាមបែបបុរាណ មកជាការប្រើប្រាស់បច្ចេកវិទ្យាឆ្លាតវៃ។ ការធ្វើទំនើបកម្មប្រព័ន្ធជញ្ជីង និងការរឹតបន្តឹងច្បាប់លើការដឹកជញ្ជូនលើសទម្ងន់តាមរយៈទិន្នន័យឌីជីថល នឹងជួយការពារទ្រព្យសម្បត្តិសាធារណៈរបស់ជាតិឱ្យប្រើប្រាស់បានយូរអង្វែង និងកាត់បន្ថយថវិកាចំណាយលើការជួសជុលផ្លូវជាប្រចាំ។ (អានបន្ថែម)