ក្រុមហ៊ុនខ្នាតយក្សរបស់ចិនចង់វិនិយោគអភិវឌ្ឍវិស័យហេដ្ឋារចនាសម្ព័ន្ធផ្លូវទឹក និងកំពង់ផែកម្ពុជា

Proeksa Meas
22 ខែសីហា 2026
ព័ត៌មានសំណង់
526 មើល

ក្រុមហ៊ុន China Construction Third Engineering Bureau (CCTEB) ដែលជាក្រុមហ៊ុនសំណង់ហេដ្ឋារចនាសម្ព័ន្ធខ្នាតយក្សមួយរបស់ចិន ចង់វិនិយោគនិងគាំទ្រដល់គម្រោងអភិវឌ្ឍវិស័យហេដ្ឋារចនាសម្ព័ន្ធផ្លូវទឹក និងកំពង់ផែ ស្របតាមយុទ្ធសាស្រ្ដអភិវឌ្ឍរបស់កម្ពុជា។ នេះបើយោងតាមជំនួបពិភាក្សារវាងឯកឧត្ដម ហេង សុធី អគ្គនាយក នៃអគ្គនាយកដ្ឋានដឹកជញ្ជូនផ្លូវទឹក ផ្លូវសមុទ្រ និងកំពង់ផែ ជាមួយក្រុមហ៊ុន China Construction Third Engineering Bureau (CCTEB) ក្នុងឱកាសដំណើរទស្សនកិច្ចនៅស្នាក់ការក្រុមហ៊ុន នៅទីក្រុងប៉េកាំង ប្រទេសចិន កាលថ្ងៃទី១៤ ខែសីហា ឆ្នាំ២០២៦។

នាឱកាសនោះ ឯកឧត្ដម ហេង សុធី បានឱ្យដឹងថា ជំនួបនេះ មានគោលបំណងពង្រឹងកិច្ចសហប្រតិបត្ដិការលើការអភិវឌ្ឍហេដ្ឋារចនាសម្ព័ន្ធដឹកជញ្ជូនផ្លូវទឹក និងកំពង់ផែ ក៏ដូចជាស្វែងរកលទ្ធភាពជាក់ស្ដែងក្នុងការសហការលើការសិក្សា ការរចនា ការសាងសង់ ការវិនិយោគ និងការអភិវឌ្ឍធនធានមនុស្សក្នុងវិស័យដឹកជញ្ជូនតាមផ្លូវទឹក និងកំពង់ផែនៅកម្ពុជា។

ជាលទ្ធផល ប្រតិភូកម្ពុជាបានសិក្សាស្វែងយល់ពីបទពិសោធន៍ល្អៗដ៏សំបូរបែបរបស់ក្រុមហ៊ុន CCTEB ក្នុងការសាងសង់គម្រោងសំណង់ហេដ្ឋារចនាសម្ព័ន្ធរូបវន្ដខ្នាតធំលើវិស័យហេដ្ឋារចនាសម្ព័ន្ធផ្លូវទឹក និងកំពង់ផែ។ជាមួយគ្នានេះ តំណាងក្រុមហ៊ុន CCTEB ក៏បានបង្ហាញការចាប់អារម្មណ៍យ៉ាងខ្លាំងក្នុងការចូលរួមចំណែកវិនិយោគ និងគាំទ្រដល់គម្រោងអភិវឌ្ឍន៍វិស័យហេដ្ឋារចនាសម្ព័ន្ធផ្លូវទឹក និងកំពង់ផែ ស្របតាមយុទ្ធសាស្រ្ដអភិវឌ្ឍន៍របស់កម្ពុជាផងដែរ។

សូមជម្រាបដែរថា ក្រុមហ៊ុន China Construction Third Engineering Bureau International គឺជាបុត្រសម្ព័ន្ធនៃក្រុមហ៊ុន CCTEB ដែលមានបទពិសោធន៍និងបច្ចេកវិទ្យាលើវិស័យសំណង់ដ៏ទំនើបថ្មីៗមួយនិងជាក្រុមហ៊ុនសំណង់លំដាប់ថ្នាក់អន្ដរជាតិរបស់ចិន ព្រមទាំងមានបទពិសោធន៍ជំរុញការអភិវឌ្ឍវិស័យដឹកជញ្ជូនតាមផ្លូវទឹក និងកំពង់ផែថែមទៀត៕ (អានបន្ថែម)