អាជ្ញាធរទឹកក្រុង Freeland ប្រើប្រាស់ Digital Twin ដើម្បីកាត់បន្ថយការបាត់បង់ទឹក

Proeksa Meas
19 ខែកញ្ញា 2026
ព័ត៌មានសំណង់
29 មើល

អាជ្ញាធរទឹកក្រុង Freeland (FMA) ក្នុងរដ្ឋ Pennsylvania សហរដ្ឋអាមេរិក កំពុងប្រើប្រាស់បច្ចេកវិទ្យា Digital Twin ដើម្បីកែលម្អការរកឃើញការលេចធ្លាយទឹក កាត់បន្ថយការបាត់បង់ទឹកដែលមិនអាចរកចំណូលបាន និងពង្រឹងភាពធន់នៃប្រព័ន្ធផ្គត់ផ្គង់ទឹកក្នុងរយៈពេលវែង។

FMA ផ្គត់ផ្គង់ទឹកដល់ប្រជាជនប្រមាណ ៣,៩០០ នាក់ ហើយកន្លងមកបានជួបបញ្ហាក្នុងការស្វែងរកប្រភពការលេចធ្លាយ និងតាមដានការបាត់បង់ទឹកប្រកបដោយប្រសិទ្ធភាព។ អាជ្ញាធរតែងតែពឹងផ្អែកលើក្រុមហ៊ុនខាងក្រៅសម្រាប់ការរកឃើញការលេចធ្លាយ ដែលធ្វើឱ្យដំណើរការនេះចំណាយថវិកាច្រើន និងមានលក្ខណៈប្រតិកម្មជាជាងការបង្ការ។

ដោយមានការណែនាំពី HRG ដែលជាដៃគូរបស់ Bentley FMA បានអនុវត្ត OpenFlows WaterSight ដើម្បីបង្កើត Digital Twin សម្រាប់ប្រព័ន្ធបណ្តាញទឹករបស់ខ្លួន។ អាជ្ញាធរបានអនុវត្តវិធីសាស្ត្រ “crawl, walk, run” ជាដំណាក់កាល ដោយចាប់ផ្តើមពីការភ្ជាប់ទិន្នន័យប្រតិបត្តិការដែលមានស្រាប់ បន្ទាប់មកប្រើទិន្នន័យទាំងនោះដើម្បីវិភាគនិន្នាការ និងទទួលការជូនដំណឹងព្យាករណ៍ ហើយនៅដំណាក់កាលចុងក្រោយ គ្រោងប្រើបច្ចេកវិទ្យានេះសម្រាប់ការរៀបចំផែនការវិនិយោគ និងការបង្កើនប្រសិទ្ធភាពប្រតិបត្តិការ។

Digital Twin បានជួយឱ្យ FMA ផ្លាស់ប្តូរពីការរង់ចាំដោះស្រាយបញ្ហាការលេចធ្លាយ ក្រោយបញ្ហានោះកើតឡើង ទៅជាការរកឃើញបញ្ហាបានមុនពេលវាកាន់តែធ្ងន់ធ្ងរ និងអាចជួសជុលបានទាន់ពេលវេលា។ វាក៏អាចជួយកាត់បន្ថយចំណាយប្រតិបត្តិការ និងធ្វើឱ្យអាជ្ញាធរប្រើប្រាស់ធនធានដែលមានកំណត់បានកាន់តែមានប្រសិទ្ធភាព។

បទពិសោធន៍របស់ FMA បង្ហាញថា បច្ចេកវិទ្យា Digital Twin មិនមែនមានសម្រាប់តែអាជ្ញាធរទឹកធំៗប៉ុណ្ណោះទេ។ ការអនុវត្តជាដំណាក់កាលអាចជួយឱ្យអ្នកផ្គត់ផ្គង់ទឹកខ្នាតតូច និងមធ្យមធ្វើទំនើបកម្មប្រតិបត្តិការ បង្កើនប្រសិទ្ធភាព និងពង្រឹងភាពធន់របស់ប្រព័ន្ធ ដោយមិនចាំបាច់ចំណាយថវិកាច្រើនក្នុងពេលតែមួយ។