Google និង Bentley រួមគ្នាបង្កើតប្រព័ន្ធ AI ដែលអាចស្កេនរកមើលគ្រោះធម្មជាតិជុំវិញពិភពលោកបាន

webmaster@construction-property.com
12 ខែតុលា 2025
ព័ត៌មានអន្តរជាតិ
136 មើល

ក្រុមហ៊ុន Google និងដៃគូរបស់ខ្លួន កាលពីថ្មីៗនេះ បានបង្ហាញកម្មវិធីដ៏មានឥទ្ធិពលមួយចំនួន ដែលប្រើប្រាស់ AI ដើម្បីស្កេនរកហានិភ័យគ្រោះធម្មជាតិដែលអាចនឹងកើតឡើងជុំវិញពិភពលោក ក៏ដូចជាដើម្បីស្កេនត្រួតពិនិត្យស្ថានភាពហេដ្ឋារចនាសម្ព័ន្ធក្នុងទីក្រុងផងដែរ។

យោងតាមបទបង្ហាញក្នុងព្រឹត្តិការណ៍ “Google AI for the Planet” ប្រព័ន្ធAI ថ្មីនេះអាចធ្វើការបានយ៉ាងទូលំទូលាយ។

ឧទាហរណ៍កម្មវិធី FireSat អាចចាប់រកមើលហេតុការណ៍ភ្លើងឆេះព្រៃបានជុំវិញពិភពលោក ដោយប្រើទិន្នន័យផ្កាយរណប និង AI។ វាអាច zoom ឬពង្រីកចូលមើលហេតុការណ៍ភ្លើងឆេះព្រៃបានជិតខ្លាំងឬ ស្មើនឹងមាត្រដ្ឋាន ៥x ៥ ម៉ែត្រ ឯណោះ ហើយវាធ្វើបច្ចុប្បន្នភាពរៀងរាល់ ២០នាទី ម្ដង។

កម្មវិធីគឺមានប្រយោជន៍ណាស់ ពិសេសក្នុងករណីដែលមានភ្លើងឆេះព្រៃនៅតំបន់ដាច់ស្រយាលដែលគ្មានមនុស្ស។ កម្មវិធីនេះនឹងចាប់បានពីហេតុការណ៍បានលឿន ដែលអាចឱ្យយើងចូលទៅពន្លត់បាន មុនភ្លើងរាលដាលខ្លាំង។

កម្មវិធីមួយទៀត គឺការប្រើ AI ដើម្បីព្យាករណ៍ទឹកជំនន់ ដែលហៅថា Flood Hub របស់ Google ។ កម្មវិធីនេះផ្អែកលើគំរូ AI និងប្រព័ន្ធធារាសាស្ត្រសកល ដើម្បីឱ្យវាអាចព្យាករហានិភ័យទឹកជំនន់ពីទន្លេបាន ដល់ទៅ ៧ ថ្ងៃ ហេតុការណ៍កើតឡើងពិតៗ។ បច្ចុប្បន្ន កម្មវិធីអាចព្យាករទឹកជំនន់បាននៅជាង ១០០ ប្រទេស។

យ៉ាងណាមិញ កម្មវិធីសំខាន់មួយទៀត គឺការ ប្រើ AI ដើម្បីគ្រប់គ្រងហេដ្ឋារចនាសម្ព័ន្ធទីក្រុង និងបណ្តាញអគ្គិសនីឆ្លាតវៃ។ គម្រោងនេះគឺការការចាប់ដៃគូររវាង Google និង ក្រុមហ៊ុន Bentley Systems ដែលជាក្រុមហ៊ុនកម្មវិធីវិស្វកម្មហេដ្ឋារចនាសម្ព័ន្ធឌីជីថល។

កម្មវិធីនេះប្រើ Google Street View រួមនឹងជាមួយនឹង Blyncsy របស់ក្រុមហ៊ុន Bentley ដើម្បីវិភាគរូបភាពក្នុងទ្រង់ទ្រាយធំ ដោយអាចស្កេនមើលស្ថានភាពផ្លូវថាមានខូចខាតឬទេ ស្កេនមើលស្ថានភាពគំនូសថ្មើរជើងដែលរលុប ស្ថានភាពភ្លើងបំភ្លឺ និងហេដ្ឋារចនាសម្ព័ន្ធសាធារណៈផ្សេងទៀត។

ការប្រើកម្មវិធីនឹងជួយសន្សំពេល និងកម្លាំងមនុស្សក្នុងការចុះត្រួតពិនិត្យផ្លូវគ្រប់ទីតាំង ដោយ បញ្ជូនក្រុមការងារទៅដោះស្រាយនៅទីតាំងដែលមានបញ្ហាប៉ុណ្ណោះ។

ជាសរុប គោលដៅធំបំផុតរបស់ Google គឺប្រើ AI ដើម្បីពង្រីកការយល់ដឹងពីភពផែនដី និងជួយមនុស្សឱ្យរស់លើផែនដីដោយមាននិរន្តរភាព។

- Video Advertisement -