តើឥណ្ឌាសង់ស្ពានឆ្លងសមុទ្រខ្នាតយក្សនេះបែបណា? ខុសពីការសង់ស្ពានធម្មតាដូចម្ដេច?

Proeksa Meas
17 ខែតុលា 2026
ព័ត៌មានសំណង់
26 មើល

ឥណ្ឌាកំពុងសាងសង់ ស្ពាន Versova-Bandra Sea Link (VBSL) ដែលជាស្ពានប្រវែង ១៧,១៧ គីឡូម៉ែត្រ ហើយជាស្ពានវែងជាងគេទីពីរនៅឥណ្ឌា។ តើឥណ្ឌាប្រើប្រាស់បច្ចេកវិទ្យាអ្វីខ្លះដើម្បីធ្វើគម្រោងយក្សមួយនេះ?

ជាក់ស្ដែង គិតត្រឹមឆ្នាំ ២០២៦ គម្រោងនេះសម្រេចបានជាង ៣២% ហើយគ្រោងនឹងនៅខែឧសភា ឆ្នាំ២០២៨ ខណៈបច្ចុប្បន្នកំពុងផ្លាស់ប្តូរពីការងារគ្រឹះទៅជាដំណាក់កាលដំឡើងផ្នែកនៅលើសមុទ្រ។

ក្រោយបញ្ចប់ការសាងសង់ ស្ពាននេះនឹងភ្ជាប់ Versova ទៅ Bandra ហើយអាចកាត់បន្ថយពេលធ្វើដំណើរពី ៩០ នាទី មកនៅត្រឹមប្រហែល ១៥-២០ នាទីប៉ុណ្ណោះ។

ការសាងសង់ស្ពានលើសមុទ្រខ្នាតយក្សនេះកន្លងមកជួបប្រទះការលំបាកជាច្រើន ទាំងទឹកជន ការធ្លាក់ភ្លៀង ការសម្របសម្រួលរវាងស្ថាប័នជាង ១០ រួមទាំងកង្វល់បរិស្ថាន និងសហគមន៍នេសាទក្នុងតំបន់។

ដើម្បីគ្រប់គ្រងកិច្ចការទាំងអស់នេះ អាជ្ញាធរអភិវឌ្ឍន៍ផ្លូវរដ្ឋមហារាស្ត្រ (MSRDC) បានសហការជាមួយ ABM Knowledgeware និង NTT Data Business Solutions ដោយប្រើកម្មវិធីរបស់ក្រុមហ៊ុន Bentley Systems។

វេទិកានេះបញ្ចូលទិន្នន័យរចនា កាលវិភាគ និងចំណាយចូលគ្នា ដើម្បីឱ្យក្រុមការងារអាចរៀបចំផែនការ និងកែសម្រួលបានភ្លាមៗ។

កម្មវិធីនេះមានមុខងារសំខាន់ៗដូចជា ការបង្កើតសេណារីយ៉ូនិងប្លង់បែប 4D/5D ការបង្កើនការសហការគម្រោងរវាងក្រុមនានា ការតាមដានវដ្តជីវិតរបស់ហេដ្ឋារចនាសម្ព័ន្ធ និងផ្ទាំងគ្រប់គ្រងទិន្នន័យដែលបង្ហាញអំពីវឌ្ឍនភាព ហានិភ័យ និងការពន្យារពេលបែបពិតៗជាក់ស្តែង។

តាមរយៈការប្រើប្រាស់កម្មវិធីនេះ ក្រុមហ៊ុនអាចពន្លឿនការអនុម័តឯកសារពីមួយសប្តាហ៍មកនៅត្រឹមមួយថ្ងៃ ខណៈគុណភាពការរចនាក៏ប្រសើរឡើង ហើយការសម្រេចចិត្តរបស់ក្រុមការងារគឺកាន់តែឆាប់រហ័ស។

គួរបញ្ជាក់ថា ស្ពាននេះរំពឹងថានឹងកាត់បន្ថយភាពកកស្ទះចរាចរណ៍ ការបំភាយឧស្ម័ន និងបង្កើនលទ្ធភាពទទួលបានការងារ សុខភាព និងការអប់រំសម្រាប់ប្រជាជនទីក្រុងមុំបៃ។