អ្នកជំនាញ៖ ដើម្បីប្រើ AI ឱ្យជោគជ័យក្នុងវិស័យសំណង់ ត្រូវធ្វើរឿងមួយនេះ!

• Proeksa Meas
• 26 ខែ​មិថុនា 2026
• ព័ត៌មានសំណង់
• 249 មើល

មេដឹកនាំក្នុងឧស្សាហកម្មបានសង្កត់ធ្ងន់ថា ដើម្បីប្រើប្រាស់ AI ឱ្យជោគជ័យក្នុងការធ្វើទំនើបកម្មសំណង់ហេដ្ឋារចនាសម្ព័ន្ធ ជាដំបូងបំផុតគឺការប្រមូលទិន្នន័យ ពោលគឺព័ត៌មានគ្រប់យ៉ាងមិនត្រូវនៅបែកគ្នាទៀតទេ តែត្រូវដាក់ចូលក្នុងប្រព័ន្ធតែមួយបែបឌីជីថល ដែលងាយដល់​ AI ក្នុងការវិភាគដោយគ្មានកំហុស។

ចំណុចនេះត្រូវបានលើកឡើងនៅឯកិច្ចប្រជុំកំពូល Transforming Infrastructure Performance (TIP) NYC Summit ឆ្នាំ ២០២៦ ថ្មីកាលៗនេះ ដែលជាកិច្ចប្រជុំដែលអ្នកជំនាញហេដ្ឋារចនាសម្ព័ន្ធ អ្នកវិនិយោគ និងមន្ត្រីសាធារណៈបានជួបជុំគ្នាដើម្បីដោះស្រាយបញ្ហាក្នុងវិស័យសំណង់នៅសហរដ្ឋអាមេរិក ពិសេសបញ្ហាកង្វះខាតទិន្នន័យដែលអាចជឿទុកចិត្តបាន។ក្នុងកិច្ចប្រជុំ ក្រុមការងារជំរុញគោលនយោបាយហេដ្ឋារចនាសម្ព័ន្ធរបស់ក្រុមហ៊ុន Bentley Systems ដែលជាអ្នករៀបចំកិច្ចប្រជុំកំពូលនេះ បានលើកឡើងថា ភាពជោគជ័យនៃហេដ្ឋារចនាសម្ព័ន្ធបច្ចុប្បន្នកំពុងត្រូវបានរារាំងដោយព័ត៌មានដែលដាច់ដោយឡែកពីគ្នា និងការខ្វះខាតទិន្នន័យដែលមានស្តង់ដារ។

បើគ្មានរចនាសម្ព័ន្ធទិន្នន័យដែលស៊ីសង្វាក់គ្នា និងការចែករំលែកព័ត៌មានទេ បច្ចេកវិទ្យាទំនើបដូចជាបញ្ញាសិប្បនិម្មិត (AI) ពិបាកនឹងផ្តល់នូវការយល់ដឹងដែលអាចទុកចិត្តបានណាស់។ អ្នកជំនាញក្នុងឧស្សាហកម្មបានកត់សម្គាល់ថា ទោះបីជា AI ផ្តល់នូវសក្តានុពលផ្លាស់ប្តូរសម្រាប់ផលិតភាព ការរចនា និងការមើលឃើញជាទម្រង់រូបភាពក៏ដោយ ក៏វានៅតែពឹងផ្អែកលើការបញ្ចូលទិន្នន័យដែលមានគុណភាពខ្ពស់ និងការត្រួតពិនិត្យដោយមនុស្ស ដើម្បីធានាបាននូវភាពត្រឹមត្រូវ និងសុវត្ថិភាព។

ក្រុមហ៊ុន Bentley Systems កំពុងជួយដោះស្រាយបញ្ហានេះ តាមរយៈការប្រមូលទិន្នន័យ ហើយបញ្ចូលទៅក្នុងកម្មវិធីរបស់ខ្លួន។

ដូច្នេះភ្នាក់ងាររដ្ឋ និងក្រុមហ៊ុននានាដែលប្រើកម្មវិធីរបស់ Bentley គឺអាចចាប់យកទិន្នន័យទាំងអស់តាំងពីចាប់ផ្ដើមគម្រោង ដែលជួយសម្រួលដល់ដំណើរការកាងារដ៏ស្មុគស្មាញជាច្រើន ពិសេសការរចនាប្លង់ និងការបង្កើតជារូបភាពរស់រវើកដើម្បីពន្យល់ទៅសាធារណជនអំពីគម្រោង។

ជាងនេះទៅទៀត កម្មវិធីទាំងនេះក៏ជួយឱ្យទីភ្នាក់ងាររដ្ឋនានាវិភាគកំណត់ត្រាថែទាំគម្រោងសំណង់ហេដ្ឋារចនាសម្ព័ន្ធ និងព្យាករណ៍លទ្ធផលគម្រោងដោយមានទំនុកចិត្តកាន់តែខ្ពស់។

ដំណោះស្រាយរបស់ Bentley ក៏ផ្តល់នូវក្របខណ្ឌចាំបាច់ដើម្បីបំប្លែងទិន្នន័យទៅជាការអនុវត្ត ដែលធានាថាការវិនិយោគលើហេដ្ឋារចនាសម្ព័ន្ធអាចព្យាករណ៍បាន ប្រកបដោយប្រសិទ្ធភាព និងមានសមត្ថភាពឆ្លើយតបទៅនឹងតម្រូវការទំនើប។

• AI
• Bentley
• Bentley Systems
• NYC Summit