JICA ដាក់គោលដៅពង្រីកកិច្ចសហប្រតិបត្តិការកសាងហេដ្ឋារចនាសម្ព័ន្ធរូបវន្ត និងអភិវឌ្ឍប្រព័ន្ធឡូជីស្ទិកនៅកម្ពុជា

Proeksa Meas
12 ខែតុលា 2026
ព័ត៌មានសំណង់
20 មើល

ភ្នាក់ងារសហប្រតិបត្តិការអន្តរជាតិជប៉ុន (JICA) បានបង្ហាញពីបំណងចង់ពង្រីកកិច្ចសហប្រតិបត្តិការកសាងហេដ្ឋារចនាសម្ព័ន្ធរូបវន្ត ការអភិវឌ្ឍប្រព័ន្ធឡូជីស្ទិក និងការទាក់ទាញការវិនិយោគផ្ទាល់ (FDI) ពីជប៉ុនមកកម្ពុជាបន្ថែមទៀត។ បំណងនេះ បានបង្ហាញឡើងនៅក្នុងជំនួបពិភាក្សារកាលថ្ងៃសុក្រ ទី២ ខែតុលា ឆ្នាំ២០២៦ រវាងឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា (ក.អ.ក.) លោក Yuho Hayakawa អនុប្រធានជាន់ខ្ពស់ (JICA)។

នាឱកាសនេះ លោក Yuho Hayakawa អនុប្រធានជាន់ខ្ពស់ (JICA) បានឱ្យដឹងថា ជំនួបនេះ រៀបចំឡើងក្នុងគោលបំណងពង្រឹង និងពង្រីកកិច្ចសហប្រតិបត្តិការអភិវឌ្ឍន៍លើគ្រប់វិស័យ ជាពិសេសការកសាងហេដ្ឋារចនាសម្ព័ន្ធរូបវន្ត ការអភិវឌ្ឍប្រព័ន្ធឡូជីស្ទិក និងការទាក់ទាញការវិនិយោគផ្ទាល់ (FDI) ពីជប៉ុន។

ជាការឆ្លើយតប ឯកឧត្តមឧបនាយករដ្ឋមន្ត្រី បានស្វាគមន៍យ៉ាងកក់ក្តៅ និងបានវាយតម្លៃខ្ពស់ចំពោះកិច្ចសហប្រតិបត្តិការដ៏ល្អប្រសើររវាងរាជរដ្ឋាភិបាលកម្ពុជា និងរាជរដ្ឋាភិបាលជប៉ុន តាមរយៈ (JICA) ដែលបានរួមចំណែកយ៉ាងសំខាន់ក្នុងការស្តារ និងអភិវឌ្ឍន៍សេដ្ឋកិច្ច-សង្គមកម្ពុជា លើគ្រប់វិស័យ។

សូមជម្រាបដែរថា តាមរយៈជំនួបខាងលើទីភ្នាក់ងារ JICA ក៏បានបញ្ជាក់សារជាថ្មីនូវការប្តេជ្ញាចិត្តយ៉ាងមុតមាំក្នុងការបន្តសហការយ៉ាងជិតស្និទ្ធជាមួយក្រសួង-ស្ថាប័នពាក់ព័ន្ធ ដើម្បីធានាថាគ្រប់គម្រោងកិច្ចសហប្រតិបត្តិការទាំងអស់ទទួលបានលទ្ធផលយ៉ាងជោគជ័យ និងជាផ្លែផ្កា។ ជាមួយគ្នានេះ CDC ក៏បាន ប្តេជ្ញាចិត្តរបស់ផ្តល់កិច្ចសម្រួល និងការគាំទ្រគ្រប់បែបយ៉ាងជូនដល់វិនិយោគិនជប៉ុនទាំងអស់ ក្នុងការស្វែងរក និងពង្រីកឱកាសធុរកិច្ចនៅកម្ពុជាឱ្យកាន់តែរលូន៕ (អានបន្ថែម)