ក្រសួងសាធារណការ និង JICA ចុះពិនិត្យវឌ្ឍនភាពការដ្ឋានផ្លូវជាតិលេខ៥ និងពង្រឹងគុណភាពសំណង់

Proeksa Meas
23 ខែកញ្ញា 2026
ព័ត៌មានសំណង់
308 មើល

ឯកឧត្តម ប៉េង ពោធិ៍នា ចង្អុលបង្ហាញឱ្យក្រុមការងារបច្ចេកទេស ចុះត្រួតពិនិត្យការដ្ឋានកំណាត់ផ្លូវជាតិលេខ៥ សិរីសោភ័ណ-ប៉ោយប៉ែត ដោយផ្តោតលើការដំឡើងបរិក្ខារសុវត្ថិភាព និងស្ថានីយជញ្ជីងថ្លឹងយានយន្ត ដើម្បីធានាចីរភាពនៃការប្រើប្រាស់ផ្លូវ

ការពង្រឹងគុណភាព និងភាពយូរអង្វែងនៃហេដ្ឋារចនាសម្ព័ន្ធផ្លូវថ្នល់ គឺជាអាទិភាពយុទ្ធសាស្ត្រដ៏សំខាន់សម្រាប់រាជរដ្ឋាភិបាលកម្ពុជា ក្នុងការធានាសុវត្ថិភាព និងសម្រួលដល់ការធ្វើចរាចរណ៍របស់ប្រជាពលរដ្ឋនៅទូទាំងប្រទេស។ ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានចង្អុលបង្ហាញឱ្យក្រុមការងារជំនាញបច្ចេកទេស ចុះត្រួតពិនិត្យផ្ទាល់ កាលពីថ្ងៃទី១០ ខែកញ្ញា ឆ្នាំ២០២៦ និងផ្តល់ការណែនាំយ៉ាងម៉ឺងម៉ាត់លើគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ ពីព្រែកក្តាម រហូតដល់ក្រុងប៉ោយប៉ែត។

ការចុះពិនិត្យការដ្ឋានជាក់ស្តែងនេះ បានធ្វើឡើងក្រោមការសហការយ៉ាងជិតស្និទ្ធរវាងក្រុមការងារបច្ចេកទេសនៃក្រសួងសាធារណការ និងដឹកជញ្ជូន តំណាងក្រសួងសេដ្ឋកិច្ច និងហិរញ្ញវត្ថុ ព្រមទាំងទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន (JICA) និងភាគីពាក់ព័ន្ធ។ ក្រុមការងារចម្រុះបានចុះត្រួតពិនិត្យលើកំណាត់ផ្លូវជាតិលេខ៥ ផ្នែកសិរីសោភ័ណ-ប៉ោយប៉ែត ដោយផ្តោតសំខាន់លើការងារសាងសង់ស្ថានីយជញ្ជីងថ្លឹងយានយន្ត ការដំឡើងបរិក្ខារសុវត្ថិភាពចរាចរណ៍ ព្រមទាំងបានរៀបចំកិច្ចប្រជុំប្រចាំខែដើម្បីវាយតម្លៃវឌ្ឍនភាពការងារ។ ជាលទ្ធផល សកម្មភាពសាងសង់នៅតាមការដ្ឋានកំពុងប្រព្រឹត្តទៅយ៉ាងសកម្ម ដោយបានដំឡើងបន្ថែមនូវផ្ទាំងការពារពន្លឺចាំង និងឧបករណ៍ចំណាំងផ្លាត ដើម្បីបង្កើនសុវត្ថិភាពដល់ការបើកបរនៅពេលយប់។

នៅក្នុងឱកាសនៃការត្រួតពិនិត្យនេះ ឯកឧត្តមរដ្ឋមន្ត្រី បានផ្ញើសារអំពាវនាវដល់បងប្អូនប្រជាពលរដ្ឋ និងអ្នកបើកបរទាំងអស់ ឱ្យចូលរួមដោយស្មារតីទទួលខុសត្រូវខ្ពស់ តាមរយៈការគោរពច្បាប់ចរាចរណ៍ផ្លូវគោកឱ្យបានខ្ជាប់ខ្ជួន ព្រមទាំងបង្កើនការប្រុងប្រយ័ត្ន និងយកចិត្តទុកដាក់លើផ្លាកសញ្ញាចរាចរណ៍នៅតាមតំបន់ការដ្ឋានសាងសង់។

សូមជម្រាបថា ការចុះត្រួតពិនិត្យ និងការណែនាំយ៉ាងម៉ឺងម៉ាត់ពីសំណាក់ថ្នាក់ដឹកនាំក្រសួងសាធារណការ និងដឹកជញ្ជូន លើគម្រោងធ្វើឱ្យប្រសើរឡើងវិញកំណាត់ផ្លូវជាតិលេខ៥ គឺជាសក្ខីភាពបញ្ជាក់ពីការយកចិត្តទុកដាក់ខ្ពស់លើគុណភាព និងសុវត្ថិភាពនៃការធ្វើដំណើរ។ ការពង្រឹងការងារសាងសង់ស្ថានីយជញ្ជីងថ្លឹងយានយន្ត និងការបំពាក់បរិក្ខារសុវត្ថិភាពចរាចរណ៍គ្រប់ជ្រុងជ្រោយ មិនត្រឹមតែជួយការពារផ្លូវជាតិពីការខូចខាតមុនអាយុកាលប៉ុណ្ណោះទេ ប៉ុន្តែថែមទាំងជួយកាត់បន្ថយគ្រោះថ្នាក់ចរាចរណ៍ និងបង្កើនប្រសិទ្ធភាពនៃការដឹកជញ្ជូនលើរបៀងសេដ្ឋកិច្ចដ៏សំខាន់មួយនេះ។ (អានបន្ថែម)