កម្ពុជា-ជប៉ុន បានឯកភាពអនុម័តផែនការមេដឹកជញ្ជូនទីក្រុងភ្នំពេញ ឆ្នាំ២០៥០ (PPUTMP 2050)

Proeksa Meas
1 ខែតុលា 2026
ព័ត៌មានសំណង់
56 មើល

រដ្ឋបាលរាជធានីភ្នំពេញ (PPCA) និងទីភ្នាក់ងារសហប្រតិបត្តិការអន្តរជាតិជប៉ុន (JICA) បានសម្រេចឯកភាព និងបានចុះហត្ថលេខា ទទួលស្គាល់ការបញ្ចប់ និងការប្រគល់ផែនការមេដឹកជញ្ជូនទីក្រុងភ្នំពេញ ឆ្នាំ២០៥០ (PPUTMP 2050) ជាផ្លូវការហើយ កាលកាលថ្ងៃទី១៧ ខែកញ្ញា ឆ្នាំ២០២៦។

ការសម្រេចឯកភាព និងទទួលស្គាល់នេះ គឺបានធ្វើឡើងនៅក្នុងកិច្ចប្រជុំគណៈកម្មាធិការសម្របសម្រួលរួម (JCC) លើកទី៥ នៃគម្រោងអភិវឌ្ឍន៍យន្តការគ្រប់គ្រងការដឹកជញ្ជូនទីក្រុងចម្រុះសម្រាប់រាជធានីភ្នំពេញ ក្រោមអធិបតីភាពលោក ឃុនឌឿន និងលោក សេង វណ្ណៈ អភិបាលរងរាជធានីភ្នំពេញ តំណាងក្រសួងសាធារណការ ក្រសួងរៀបចំដែនដី ព្រមទាំងក្រសួង ស្ថាប័នពាក់ព័ន្ធ។

ក្នុងអំឡុងកិច្ចប្រជុំសមាជិក JCC ទាំងអស់បានឯកភាពអនុម័តផែនការមេដឹកជញ្ជូនទីក្រុងភ្នំពេញ ឆ្នាំ២០៥០ (PPUTMP 2050)។ លើសពីនេះ កិច្ចប្រជុំនេះ ក៏បានចុះហត្ថលេខារវាងរដ្ឋបាលរាជធានីភ្នំពេញ (PPCA) និងទីភ្នាក់ងារសហប្រតិបត្តិការអន្តរជាតិជប៉ុន (JICA) ដើម្បីទទួលស្គាល់ជាផ្លូវការនូវការបញ្ចប់ និងការប្រគល់ផែនការមេដឹកជញ្ជូនទីក្រុងភ្នំពេញ ឆ្នាំ២០៥០ (PPUTMP 2050) ជូនដល់រដ្ឋបាលរាជធានីភ្នំពេញផងដែរ។

សូមជម្រាបដែរថា ផែនការមេដឹកជញ្ជូនទីក្រុងភ្នំពេញ ឆ្នាំ២០៥០ នេះ ផ្តល់នូវទិសដៅយុទ្ធសាស្ត្រសម្រាប់ការអភិវឌ្ឍប្រព័ន្ធចល័តភាពទីក្រុងនាពេលអនាគត និងលើកកម្ពស់ការផ្លាស់ប្តូរពីទីក្រុងដែលផ្អែកជាចម្បងលើការប្រើប្រាស់រថយន្តឯកជន ទៅជាទម្រង់អភិវឌ្ឍទីក្រុងដែលមានតុល្យភាព និងគាំទ្រដល់ការដឹកជញ្ជូនសាធារណៈកាន់តែប្រសើរ។ ផែនការនេះផ្តោតលើការអភិវឌ្ឍប្រព័ន្ធដឹកជញ្ជូនប្រកបដោយចីរភាព រួមទាំងការពង្រឹងសេវាដឹកជញ្ជូនសាធារណៈ ដូចជាប្រព័ន្ធរថយន្តក្រុងសាធារណៈ និងគំនិតផ្តួចផ្តើមផ្សេងៗទៀត ដើម្បីបង្កើនប្រសិទ្ធភាពនៃការធ្វើដំណើរក្នុងទីក្រុង៕ (អានបន្ថែម)