Mitsubishi បានបង្ហាញខ្លួនក្នុងវិស័យសំណង់នៅទីក្រុងហូជីមិញ

• Proeksa Meas
• 15 ខែ​មករា 2018
• ព័ត៌មានសំណង់
• 174 មើល

កាលពីពេលថ្មីៗនេះ ក្រុមហ៊ុន Mitsubishi Corporation (MC) បានប្រកាសថាខ្លួនបានឈានដល់កិច្ចព្រមព្រៀងមួយស្តីពីការចូលរួមរបស់ខ្លួននៅក្នុងគម្រោងអភិវឌ្ឍន៍លំនៅដ្ឋានដែលកំពុងដំណើរការនៅទីក្រុងហូជីមិញ ប្រទេសវៀតណាម។

គម្រោងនេះកំពុងត្រូវបានអភិវឌ្ឍដោយក្រុមហ៊ុន Phuc Khang Investment and Construction Corporation (PK) ដែលជាក្រុមហ៊ុនអភិវឌ្ឍន៍អចលនទ្រព្យនៅវៀតណាម។ MC បានចូលធ្វើអាជីវកម្មអចលនទ្រព្យនៅទីក្រុងចំនួន២ក្នុងប្រទេសវៀតណាមរួចមកហើយ គឺ

ទីក្រុង Binh Duong នៅតំបន់ជាយក្រុងទីក្រុងហូជីមិញ និងទីក្រុងហាណូយ ប៉ុន្តែគម្រោងនេះនឹងជាគម្រោងទីមួយរបស់ក្រុមហ៊ុនដែលស្ថិតនៅកណ្តាលទីក្រុងហូជីមិញ ដែលជាទីផ្សារអចលនទ្រព្យធំបំផុតរបស់ប្រទេសវៀតណាម។

យោងតាមសេចក្តីប្រកាសព័ត៌មានរបស់ក្រុមហ៊ុន Mitsubishi គម្រោងនេះមានទីតាំងស្ថិតនៅភាគនិរតីក្នុងចម្ងាយត្រឹមតែ ៤គីឡូម៉ែត្រ ពីកណ្តាលក្រុងហូជីមិញ ហើយជាគម្រោងដែលកំពុងត្រូវបានអភិវឌ្ឍន៍ដោយក្រុមហ៊ុន PK។ គម្រោងនេះមានលក្ខណៈពិសេសប្លែកដោយគ្រប់យូនីតទាំងអស់អាចមើលឃើញទេសភាពទន្លេដែលមានការពេញនិយមខ្លាំង ព្រមទាំងមុខងារដែលមានគុណភាពខ្ពស់និងមានភាពជឿនលឿនខ្ពស់ក្នុងប្រទេសវៀតណាមដូចជា បច្ចេកវិទ្យាសន្សំសំចៃថាមពលនិងទឹក និងភាពបៃតង។ គម្រោងនេះផ្តោតសំខាន់ទៅលើប្រជាពលរដ្ឋថ្នាក់កណ្តាលដែលកំពុងមានការកើនឡើងយ៉ាងឆាប់រហ័សនៅក្នុងទីក្រុងហូជីមិញ។