ផ្លូវជាតិលេខ២៣ ប្រវែងជិត២០គ.ម ភ្ជាប់ស្រុកកោះធំ-ស្រុកលើកដែក សង់រួចរាល់១០០% ហើយ

Proeksa Meas
1 ខែឧសភា 2026
ព័ត៌មានសំណង់
551 មើល

កំណាត់ផ្លូវផ្លូវជាតិលេខ២៣ មានប្រវែង១៩,៨ គីឡូម៉ែត្រ ទទឹង១១ម៉ែត្រ គិតមកដល់ពេលនេះ បានសាងសង់រួចរាល់១០០%ហើយ ខណៈបើកត្រៀមសម្ពោធឱ្យប្រើប្រាស់ជាផ្លូវការឆាប់ៗនេះផងដែរ។ នេះបើយោងតាមហ្វេសប៊ុករបស់រដ្ឋបាលខេត្តកណ្តាលកាលថ្ងៃទី ២០ ខែមេសា ឆ្នាំ២០២៦។

រដ្ឋបាលខេត្តកណ្តាល បានបញ្ជាក់ថា ផ្លូវជាតិលេខ២៣ មានប្រវែង១៩,៨ គីឡូម៉ែត្រ ទទឹង១១ម៉ែត្រ គិតចាប់ពីគល់ស្ពានកោះធំត្រើយខាងកើត ស្ថិតក្នុងឃុំជ្រោយតាកែវ ស្រុកកោះធំ រហូតដល់ផ្លូវជាតិលេខ១៤ ឃុំពាមរាំង ស្រុកលើកដែក ខេត្តកណ្តាល បច្ចុប្បន្នបានស្ថាបនារួចរាល់១០០% នឹងត្រៀមដាក់សម្ពោធប្រើប្រាស់ជាផ្លូវការនៅថ្ងៃទី២៧ ខែមេសា ឆ្នាំ២០២៦ខាងមុខនេះ ក្រោមមធិបតីភាពដ៏ខ្ពង់ខ្ពស់ របស់ឯកឧត្តម អូន ព័ន្ធមុនីរ័ត្ន ឧបនាយករដ្ឋមន្ដ្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។

គួរបញ្ជាក់ដែរថា កំណាត់ផ្លូវជាតិលេខ២៣ ត្រូវបានស្ថាបនាជា ០២គន្លងទៅ និង ០២គន្លងមក ដោយត្រូវពង្រីកទទឹងតួផ្លូវប្រវែង ១១ម៉ែត្រ ចាក់ក្រាលកៅស៊ូប្រភេទ AC កម្រាស់ ៨សង់ទីម៉ែត្រលើ និងសាងសង់ស្ពានចំនួន ០៤កន្លែងផងដែរ។ គម្រោងនេះ ទទួលបានឥណទានសម្បទាន ២១,៦៨លានដុល្លារ ពីធនាគារអភិវឌ្ឍន៍អាស៊ី (ADB) ដែលបានបើកការដ្ឋានកាលពីអំឡុងខែមិថុនា ឆ្នាំ២០២៣។

ក្រោយសាងសង់រួចរាល់ ផ្លូវជាតិលេខ២៣នេះ ត្រូវបានគេរំពឹងថានឹងធ្វើឱ្យប្រសើរឡើងនូវប្រសិទ្ធភាពនៃការដឹកជញ្ជូន និងការតភ្ជាប់សម្រាប់សហគមន៍ក្នុងមូលដ្ឋាន៕ (អានបន្ថែម)