ទំនប់អាងទឹកសួង៧៨ អាចស្រោចស្រពជាង៣០០០ហិចតា នៅខេត្តសៀមរាប សង់បាន៥៧%

Sommana Yan
23 ខែឧសភា 2026
ព័ត៌មានសំណង់
346 មើល

ទំនប់អាងទឹកសួង៧៨ ខេត្តសៀមរាប ដែលមានសត្ថភាពស្រោចស្រពទឹកទាំងរដូវប្រាំង និងវស្សាប្រមាណជាង៣០០០ហិចតា សាងសង់សម្រេចបានប្រមាណ ៥៧ %ហើយ។ នេះបើយោងតាមលោក ថាំង វីយុទ្ធដា ប្រធាននាយកដ្ឋានវិស្វកម្មក្រសួងធនធានទឹក និងឧតុនិយម ក្នុងឱកាសចុះពិនិត្យវឌ្ឍនភាពការងារជូសជុលទំនប់អាងទឹកសួង៧៨ កាលថ្ងៃទី១៦ ខែឧសភា ឆ្នាំ២០២៦។

លោក ថាំង វីយុទ្ធដា បានឱ្យដឹងថា ទំនប់អាងទឹកសួង៧៨ (ជំហាន៣ តចប់) ដែលស្ថិតនៅក្នុងឃុំស្ពានត្នោត ស្រុកជីក្រែង ខេត្តសៀមរាប រហូតមកដល់បច្ចុប្បន្ននេះ សាងសង់សម្រេចបានប្រមាណ ៥៧% ហើយ។ ជាមួយការចុះពិនិត្យ លោកក៏បានសង្កត់ធ្ងន់ដល់ក្រុមការងារបច្ចេកទេសទាំងអស់ ត្រូវយកចិត្តទុកដាក់ខ្ពស់និង ប្រកាន់ខ្ជាប់នូវបទដ្ឋានបច្ចេកទេសឱ្យបានហ្មត់ចត់ ដើម្បីធានាឱ្យបាននូវគុណភាពសំណង់រឹងមាំ ដោយមានត្រូវមានរបាយការណ៍បញ្ជាក់ស្តីពីគុណភាពផងនៅពេលបញ្ចប់គម្រោង។

បើតាមក្រសួងធនធានទឹក គម្រោងនេះនឹងស្ទាក់ទឹកពីទំនប់អាងទឹកម្កាក់ តាមរយៈស្ទឹងជីក្រែង និងប្រឡាយស្ពានខៀវ មកស្តុកទុកក្នុងអាងទឹកសួង៧៨។ ទំហំការងាររួមមាន៖ ការងារជួសជុលទំនប់ប្រវែង ៣ ៨០០ ម៉ែត្រ និងការសាងសង់សំណង់សិល្បការ្យចំនួន ៥ កន្លែង និងគ្រោងនឹងបញ្ចប់ជាស្ថាពរនៅខែកក្កដា ឆ្នាំ២០២៦ ខាងមុខ។ ក្រោយពេលបញ្ចប់ការសាងសង់ គម្រោងនេះនឹងផ្តល់ទឹកស្រោចស្រពសម្រាប់ផ្ទៃដីស្រូវវស្សាចំនួន ១ ១២០ ហិកតា ស្រូវប្រាំងចំនួន ២ ២៣៥ ហិកតា និងដំណាំរួមផ្សំចំនួន ៣០ ហិកតា ព្រមទាំងផ្តល់អត្ថប្រយោជន៍ដល់ប្រជាកសិករប្រមាណ ១ ៧៣៩ គ្រួសារ ក្នុងភូមិចំនួន ១២ នៃឃុំស្ពានត្នោត ស្រុកជីក្រែង ផងដែរ៕