ព្រែកកំពង់ជ្រៃក្រោម អាចផ្តល់ទឹកស្រោចស្របជាង២ពាន់ហិកតានៅខេត្តស្វាយរៀង សង់បានជិត ៣០%

Proeksa Meas
5 ខែឧសភា 2026
ព័ត៌មានសំណង់
495 មើល

គម្រោងស្តារព្រែកកំពង់ជ្រៃក្រោម (ជំហាន១) ដែលស្ថិតក្នុងភូមិសាស្ដ្រខេត្តស្វាយរៀង គិតមកពេលនេះ សាងសង់សម្រេចបានប្រមាណជិត៣០%ហើយ។នេះបើយោងតាមដំណើរចុះពិនិត្យរបស់ លោក ថាំង វីយុទ្ធដា ប្រធាននាយកដ្ឋានវិស្វកម្ម នៃក្រសួងធនធានទឹក និងឧតុនិយម កាលថ្ងៃទី២៦ ខែមេសា ឆ្នាំ២០២៦។

នាឱកាសនោះ លោក ថាំង វីយុទ្ធដា ប្រធាននាយកដ្ឋានវិស្វកម្ម បានឱ្យដឹងថា វឌ្ឍនភាពការងារស្តារព្រែកកំពង់ជ្រៃក្រោម (ជំហាន១) ក្នុងឃុំស្វាយធំ ស្រុកស្វាយជ្រំ ខេត្តស្វាយរៀង សម្រេចបានប្រមាណ ២៨%ហើយ។ លោកក៏បានណែនាំដល់ប្រធានការដ្ឋាន និងក្រុមការងារបច្ចេកទេស ត្រូវប្រកាន់ខ្ជាប់នូវបទដ្ឋានបច្ចេកទេសឱ្យបានហ្មត់ចត់បំផុត ស្របតាមនិក្ខេបបទរបស់គម្រោង ដើម្បីធានាបាននូវគុណភាពសំណង់រឹងមាំយូរអង្វែង និងជំរុញការងារឱ្យសម្រេចបានតាមផែនការដែលបានកំណត់ទុក។

សូមជម្រាបថា គម្រោងស្តារព្រែកកំពង់ជ្រៃក្រោម (ជំហាន១) នេះ បានចាប់ផ្ដើមអនុវត្តតាំងពីថ្ងៃទី២៦ ខែកុម្ភៈ ឆ្នាំ២០២៦ ដោយផ្តោតលើការងារសំខាន់ៗចំនួនពីរ រួមមាន៖ ១. ការងារស្តារព្រែកកំពង់ជ្រៃក្រោម ប្រវែង ៥ ៥០០ ម៉ែត្រ។ ២. ការងារសាងសង់សំណង់សិល្បការ្យសរុបចំនួន ២៤ កន្លែង។ គិតមកទល់ពេលនេះ លទ្ធផលការងារសម្រេចបានប្រមាណ ២៨% ហើយ និងគ្រោងនឹងបញ្ចប់ការងារជាស្ថាពរនៅចុងខែមិថុនា ឆ្នាំ២០២៦ ខាងមុខនេះ។

ការងារស្តារព្រែកកំពង់ជ្រៃក្រោម (ជំហាន១) មានគោលបំណងសំខាន់ក្នុងការតភ្ជាប់ចរន្តទឹកពីអាងទឹកកំពង់ជ្រៃទៅកាន់ទន្លេព្រំដែនកម្ពុជា-វៀតណាម។ លើសពីនេះ ព្រែកនេះនឹងដើរតួជាប្រភពទឹកស្រោចស្រពដ៏សំខាន់សម្រាប់ផ្ទៃដីបង្កបង្កើនផលកសិកម្មសរុប រួមមាន៖ ស្រូវវស្សាចំនួន ១ ២០០ ហិកតា ស្រូវប្រាំង ១ ៥០០ ហិកតា និងដំណាំរួមផ្សំ ១៥ ហិកតា។ គម្រោងនេះក៏នឹងផ្ដល់អត្ថប្រយោជន៍ដល់ការប្រើប្រាស់ទឹកប្រចាំថ្ងៃរបស់ប្រជាពលរដ្ឋប្រមាណ ១ ៦៩៨ គ្រួសារ ក្នុងឃុំចំនួន ២ នៃស្រុកស្វាយជ្រំ ខេត្តស្វាយរៀង និងស្រុកកំពង់ត្របែក ខេត្តព្រៃវែង ផងដែរ៕ (អានបន្ថែម)