ខេត្តចំនួន៦ នឹងទទួលបានគម្រោងវិនិយោគថ្មី ក្រោមទុនប្រមាណ ១៧៤លានដុល្លារ ខណៈក្រចេះទទួលបាន ៤៥០លានដុល្លារ

Proeksa Meas
28 ខែមីនា 2026
ព័ត៌មានសំណង់
552 មើល

គម្រោងវិនិយោគចំនួន ៦ ក្រោមទុនវិនិយោគប្រមាណ ១៧៤លានដុល្លារអាម៉េរិក ត្រៀមបោះទីតាំងនៅខេត្តចំនួន៦ នាពេលខាងមុនេះ ខណៈបច្ចុប្បន្នគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា បានបើកកិច្ចប្រជុំពិនិត្យពិភាក្សាលើសំណើសុំចុះបញ្ជីគម្រោងវិនិយោគមានលក្ខណៈសម្បត្តិគ្រប់គ្រាន់រួចរាល់ហើយ ស្របពេលដែលគម្រោងវិនិយោគបង្កើតរោងចក្រផលិតសំបកកង់រថយន្ត និងពោះវៀនកង់ ស្ថិតក្នុងតំបន់សេដ្ឋកិច្ចពិសេស យូ.ប៊ី.អ៊ី.ស្នួល ក្នុងខេត្តក្រចុះ មានទំហំទុនវិនិយោគ ៤៥០លានដុល្លារអាម៉េរិក បានអនុម័តជាផ្លូវការ។ នេះបើយោងតាមកិច្ចប្រជុំច្រកចេញ-ចូលតែមួយ” លើកទី៣ ក្នុងឆ្នាំ២០២៦ ថ្ងៃទី២០ ខែមីនា ឆ្នាំ២០២៦ ដឹកនាំដោយ ឯកឧត្តម ជា វុទ្ធី អគ្គលេខាធិការគណៈកម្មាធិការ វិនិយោគកម្ពុជា។

គម្រោងវិនិយោគទាំង៦នេះ មានទុនវិនិយោគសរុបប្រមាណ ១៧៤លានដុល្លារអាម៉េរិក អាចបង្កើតការងារបានប្រមាណ ៣៥០០ កន្លែង និងមានមុខសញ្ញាវិនិយោគក្នុងវិស័យឧស្សាហកម្មចំនួន ៤គម្រោង រួមមាន៖ ផលិតដើមណូអែល អំពូលភ្លើងលម្អនិងសម្ភារៈតុបតែងសម្រាប់ពិធីបុណ្យណូអែល ផលិតដីសគ្រប់ប្រភេទនិងគ្រឿងតុបតែងលម្អពីប្លាស្ទិក ផ្គុំដំឡើងរថយន្តនិងផលិតសម្ភារៈតុបតែងសម្រាប់ពិធីបុណ្យ ប្រដាប់ប្រដាក្មេងលេង កាបូប វាំងនន និងបោះពុម្ពផលិតផលសម្រេច និង វិស័យកសិកម្មនិងកសិ-ឧស្សាហកម្មចំនួន១គម្រោង៖ បង្កើតកសិដ្ឋានដាំដំណាំឈើហូបផ្លែ (មៀនប៉ៃលិន) និងសាងសង់រោងចក្រកែច្នៃ និងវិស័យហេដ្ឋារចនាសម្ព័ន្ធចំនួន១គម្រោង៖ អភិវឌ្ឍន៍ស្ថានីយផលិតអគ្គិសនីដើរដោយថាមពលជីវម៉ាសអានុភាព៥០មេហ្គាវ៉ាត់ និងស្ថានីយផលិតអគ្គិសនីដើរដោយថាមពលពន្លឺព្រះអាទិត្យអានុភាព៤០មេហ្គាវ៉ាត់។

គម្រោងវិនិយោគទាំង៦ ដូចបានរៀបរាប់ខាងលើនេះ បានបោះទីតាំងនៅខេត្តស្វាយរៀង បាត់ដំបង តាកែវ ពោធិ៍សាត់ កណ្តាល និងកំពង់ស្ពឺ។ ក្រៅពីខេត្តទាំង៦នេះ ខេត្តក្រចេះ ក៏ទើបទទួលបានគម្រោងវិនិយោគបង្កើតរោងចក្រផលិតសំបកកង់រថយន្ត និងពោះវៀនកង់ ស្ថិតក្នុងតំបន់សេដ្ឋកិច្ចពិសេស យូ.ប៊ី.អ៊ី ស្នួល ក្នុងទំហំទុនវិនិយោគ ៤៥០លានដុល្លារអាម៉េរិក និងអាចបង្កើតការងារបានចំនួន ៣,០០០កន្លែងផងដែរ។នេះបើយោងតាមសេចក្តីប្រកាសរបស់ក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១៩ ខែមីនា ឆ្នាំ២០២៦៕

- Video Advertisement -