ក្រុមហ៊ុនចិននឹងសម្រុកសាងសង់ព្រលានយន្តហោះសៀមរាបថ្មីឱ្យសម្រេចបាន ៦៧% ក្នុងឆ្នាំ ២០២១

• Samphors Sao
• 8 ខែ​កុម្ភៈ 2021
• ព័ត៌មានក្នុងស្រុក
• 333 មើល

ក្រុមហ៊ុន Angkor International Airport Investment (Cambodia) Co., Ltd. ហៅកាត់ថា AIAI នឹងពន្លឿនការសាងសង់គម្រោងព្រលានយន្តហោះសៀមរាបថ្មីឱ្យសម្រេចបាន ៦៧% ក្នុងឆ្នាំ ២០២១ ដើម្បីឈានដល់ការសម្រេចទាំងស្រុងនៅឆ្នាំ ២០២៣ តាមផែនការ។

នេះបើយោងតាម ការចុះពិនិត្យវឌ្ឍនភាពនៃការដ្ឋានសំណង់ របស់ ឯកឧត្តម ទៀ សីហា អភិបាលខេត្តសៀមរាប កាលពីថ្ងៃទី ០៦ ខែកុម្ភៈ ឆ្នាំ២០២១ កន្លងទៅនេះ។

ក្រមហ៊ុនបានរាយការថា គិតត្រឹមចុងឆ្នាំ ២០២០ ជារួមគម្រោងទាំងមូលសម្រេចបានប្រមាណ ៣៥% ហើយ។ ក្នុងនោះ ស្ថានីយ៍អ្នកដំណើរសម្រេចបាន១៥% ខណៈសំណង់តំបន់ហោះហើរសម្រេចបានប្រមាណ ១០% ។

សម្រាប់ឆ្នាំ ២០២១ នេះ ក្រុមហ៊ុនគ្រោងនឹងបញ្ចប់ការសាងសង់ស្ថានីយអ្នកដំណើរឱ្យបាន ៧៨% សម្រេចការកសាងតំបន់ហោះហើរឱ្យបាន ៤៥% និងបញ្ចប់សំណង់ហេដ្ឋារចនាសម្ព័ន្ធទូទៅឱ្យបាន ៥០%។

លើសពីនេះ ក្រុមហ៊ុនក៏ធានាបានថា ការហោះហើរ និងចុះចត នឹងមិនមានផលអវិជ្ជមានលើប្រាសាទអង្គវត្ត និងសំណង់ស្ថាបត្យកម្មជុំវិញនោះឡើយ ម៉្យាងទៀតការសាងសង់អាកាសយានដ្ឋាននេះ ក៏រក្សានូវបរិស្ថានធម្មជាតិផងដែរ ។

គួរបញ្ជាក់ផងដែរថា ព្រលានយន្តហោះនេះ មានទីតាំងស្ថិតនៅស្រុកសូត្រនិគម ចម្ងាយប្រមាណជា ៥១ គីឡូមែត្រពីក្រុងសៀមរាប ឬប្រមាណ ៤០គីឡូម៉ែត្រពីប្រាសាទអង្គវត្ត។ គម្រោងនេះ ចាប់ផ្ដើមសាងសង់កាលពីថ្ងៃទី១៥ ខែមីនា ឆ្នាំ២០២០ ហើយគ្រោងនឹងបញ្ចប់ក្នុងរយៈពេល ៣៦ ខែ ពោលគឺនៅឆ្នាំ ២០២៣។ (អានបន្ថែម)

គម្រោងនេះ នឹងចំណាយទុនវិនិយោគប្រមាណ ៩០០ លានដុល្លារ ដែលនឹងសាងសង់លើផ្ទៃដីប្រមាណ ៧០០ ហិកតា រួមជាមួយនឹងផ្ទៃដីនៃតំបន់សេដ្ឋកិច្ចពិសេសចំនួន ១០០០ ហិកតា។

• Tourism and Travelling
• Projects Development