ក្រុមហ៊ុនធំៗ ១៦ មកពី៩ប្រទេស ចាប់អារម្មណ៍ដេញថ្លៃគម្រោងបណ្ដុំឧស្សាហកម្មតម្លៃ៨០០ លានដុល្លារ នៅមីយ៉ាន់ម៉ា

• Samphors Sao
• 18 ខែ​មករា 2021
• Uncategorized @km
• 217 មើល

ក្រសួងវិនិយោគ និងទំនាក់ទំនងសេដ្ឋកិច្ចអន្តរជាតិ នៃប្រទេសមីយ៉ាន់ម៉ាបានប្រកាសថា មានក្រុមហ៊ុនធំៗយ៉ាងហោច ១៦ ក្រុមហ៊ុន ដែលចាប់អារម្មណ៍ក្នុងការដេញថ្លៃអភិវឌ្ឍគម្រោងបណ្ដុំឧស្សាហកម្មក៏ធំសម្បើមនៅទីក្រុងយ៉ាំងហ្គូន។

ក្រុមហ៊ុនទាំងនោះគឺ មកពីប្រទេសចំនួន ៩ ផ្សេងៗ រួមមានប្រទេសជប៉ុន សិង្ហបុរី អ៊ីតាលី អេស្ប៉ាញនិងបារាំង។

បើតាមផែនការដំបូង គម្រោងនេះមានទីតាំងស្ថិតនៅច្រាំងខាងលិចនៃទន្លេយ៉ាំងហ្គោន ហើយត្រូវបានសម្រេចឱ្យអភិវឌ្ឍដោយក្រុមហ៊ុនចិន China Communications Construction Company (CCCC) ក្នុងទំហំទឹកប្រាក់ ១,៥ ពាន់លានដុល្លារ។

ប៉ុន្តែ បន្ទាប់ពីមានការរិះគន់ គម្រោងនេះត្រូវបានបើកឱ្យដេញថ្លៃជាសាធារណៈម្តងទៀត ហើយទំលាក់ទឹកប្រាក់មកត្រឹម ៨០០ លានដុល្លារប៉ុណ្ណោះ។

គួរបញ្ជាក់ផងដែរថា ដំណាក់កាលដំបូងនៃគម្រោងនេះ រួមមានការសាងសង់ស្ពាននៅលើដងទន្លេយ៉ាំងហ្គូន សួនឧស្សាហកម្ម ផ្ទះល្វែង លំនៅដ្ឋាន ស្ថានីយអគ្គិសនី ទីស្នាក់ការដឹកជញ្ជូន និងអាងស្តុកទឹកជាដើម។

• Projects Development