គម្រោងការពារច្រាំងទន្លេបាសាក់ និងព្រែកកុយ នៅខេត្តចំនួន២ សម្រេចបាន១០០%

Proeksa Meas
12 ខែសីហា 2026
ព័ត៌មានសំណង់
143 មើល

គម្រោងការពារច្រាំងទន្លេបាសាក់ និងគម្រោងការពារច្រាំងព្រែកកុយ នៅខេត្តកំពង់ចាម សាងសង់សម្រេចបាន ១០០% ហើយ។ នេះបើយោងតាមការឱ្យដឹងពីឯកឧត្តម សុត រស្មី រដ្ឋលេខាធិការ និងជាប្រធានគណៈកម្មាធិការលទ្ធកម្មនៃក្រសួងធនធានទឹក និងឧតុនិយម ក្នុងឱកាសអញ្ជើញដឹកនាំក្រុមការងារអន្តរក្រសួង ចុះពិនិត្យវាយតម្លៃ និងប្រគល់-ទទួលការងារគម្រោងការពារច្រាំងទន្លេ ស្ថិតក្នុងភូមិសាស្ត្រខេត្តកណ្តាល និងខេត្តកំពង់ចាម កាលថ្ងៃទី៣ ខែសីហា ឆ្នាំ២០២៦។

នាឱកាសនោះ លោក សុត រស្មី បានឱ្យដឹងថា គម្រោងចំនួនពីរ រួមមាន៖ ១. គម្រោងការពារច្រាំងទន្លេបាសាក់ ប្រវែង ៥០០ម៉ែត្រ ស្ថិតនៅសង្កាត់ព្រែកជ្រៃ ក្រុងសំពៅពូន ស្រុកកោះធំ ខេត្តកណ្តាល សម្រេចបាន ១០០% និង ២. គម្រោងការពារច្រាំងព្រែកកុយ ប្រវែង ៤៦៥ម៉ែត្រ ស្ថិតនៅក្នុងភូមិព្រែកកុយ ឃុំព្រែកកុយ ស្រុកកងមាស ខេត្តកំពង់ចាម ក៏សម្រេចបាន ១០០% ផងដែរ។

សូមជម្រាបជូនថា សំណង់ការពារច្រាំងទាំងពីរនេះ ត្រូវបានសាងសង់ឡើងយ៉ាងរឹងមាំ ដោយបានអនុវត្តតាមបច្ចេកទេសទំនើប រួមមាន ការប្រើប្រាស់សំណាញ់ថ្ម (Gabion Box) និងបេតុង ដែលធានាបាននូវគុណភាពភាពរឹងមាំ និងសោភ័ណភាព ស្របតាមនិរន្តរភាពយូរអង្វែង ដើម្បីផ្ដល់ជាប្រយោជន៍ដល់សាធារណជន។

ក្រោយចុះពិនិត្យការដ្ឋានគម្រោងផ្ទាល់ ក្រុមការងារអន្តរក្រសួង ក៏បានវាយតម្លៃខ្ពស់ចំពោះនាយកដ្ឋានជលសាស្ត្រ និងការងារទន្លេ ដែលបានអនុវត្តគម្រោងត្រឹមត្រូវតាមបទដ្ឋានបច្ចេកទេស ខណៈគម្រោងនេះ នឹងជួយថែរក្សាសមិទ្ធផលទាំងនេះឱ្យបានគង់វង្ស ដើម្បីលើកកម្ពស់សេដ្ឋកិច្ច និងសង្គមក្នុងមូលដ្ឋានថែមទៀត៕ (អានបន្ថែម)