ក្រុមហ៊ុន Integrated  ចង់វិនិយោគក្នុងវិស័យភស្ដុភារកម្មរបស់កម្ពុជា

• Sommana Yan
• 17 ខែ​កញ្ញា 2025
• Uncategorized
• 117 មើល

ក្រុមហ៊ុន Integrated Logistics Asia, KLN ដែលជាក្រុមហ៊ុនធំមួយរបស់ហុងកុង បានសម្លឹងមើលឃើញនូវឱកាស និងចង់វិនិយោគក្នុងវិស័យភស្ដុភារកម្មរបស់កម្ពុជា ខណៈវិស័យនេះកំពុងរីកចម្រើន និងជាឱកាសវិនិយោគដ៏ធំនាពេលអនាគត។

នេះបើយោងតាមការលើកឡើងរបស់លោក Samuel Lau នាយកគ្រប់គ្រងក្រុមហ៊ុន Integrated Logistics Asia, KLN ជាមួយ ឯកឧត្តម ស៊ុន ចាន់ថុល ឧបនាយករដ្ឋមន្រ្តី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា នៅទីក្រុងហុងកុង ប្រទេសចិន នៅថ្ងៃទី១១ ខែកញ្ញា ឆ្នាំ២០២៥។

នាឱកាសនោះ តំណាងក្រុមហ៊ុន Samuel Lau បានលើកឡើងថា បំណងនៃជំនួបនេះ គឺដើម្បីពិភាក្សាផ្លាស់ប្ដូយោបល់ជុំវិញបច្ចុប្បន្នភាពអាជីវកម្មរបស់ក្រុមហ៊ុនក្នុងវិស័យភស្ដុភារកម្មនៅកម្ពុជា។ លោកបន្តថា ក្រុមហ៊ុន បានមើលឃើញនូវឱកាសវិនិយោគក្នុងវិស័យភស្ដុភារកម្មរបស់កម្ពុជា គឺកាន់តែធំជាងមុន ក្រោយការបើកឱ្យដំណើរការជាផ្លូវការអាកាសយានដ្ឋានអន្តរជាតិតេជោ កាលពីថ្ងៃទី៩ ខែកញ្ញា ឆ្នាំ២០២៥នេះ។ (អានបន្ថែម)

ជាការឆ្លើយតបង ឯកឧត្តម ស៊ុន ចាន់ថុល បានស្នើសុំឱ្យក្រុមហ៊ុនពិនិត្យលទ្ធភាពស្វែងរកការបណ្ដាក់ទុនវិនិយោគបន្ថែមទៀតនៅកម្ពុជា ពិសេសសិក្សាលើការរៀបចំឃ្លាំង មណ្ឌលឡូជីស្ទីក ឬតំបន់សេដ្ឋកិច្ចពិសេស តាមបណ្ដោយគម្រោងព្រែកជីកហ្វូណនតេជោជាដើម។

គួរបញ្ជាក់ថា នៅក្នុងផែនការមេគ្រប់ជ្រុងជ្រោយស្ដីពីប្រព័ន្ធដឹកជញ្ជូនអន្តរមធ្យោបាយ និងភស្ដុភារកម្មកម្ពុជា ឆ្នាំ២០២៣-២០៣៣ គឺមានគម្រោងវិនិយោគមួយចំនួនក្នុងវិស័យភស្ដុភារកម្ម សរុបរហូត ១៧៤គម្រោង។ នេះបើតាមការបញ្ជាក់ពី CDC៕

• Logistics and transportation