ចិនដាក់ទណ្ឌកម្មលើមនុស្ស ៣១នាក់ ដែលទទួលខុសត្រូវចំពោះការស្លាប់មនុស្ស ៧៣នាក់

• Proeksa Meas
• 2 ខែ​វិច្ឆិកា 2017
• ព័ត៌មានសំណង់
• 124 មើល

រដ្ឋាភិបាលចិនបានចេញវិធានការបង្ខំលើមនុស្ស ៣១នាក់ ដែលត្រូវទទួលខុសត្រូវចំពោះគ្រោះថ្នាក់នៅការដ្ឋានសំណង់មួយកាលពីខែវិច្ឆិកា ឆ្នាំ២០១៦ ដែលបានសម្លាប់មនុស្ស ៧៣នាក់។

ការស្លាប់នេះបណ្តាលមកពីការដួលរលំនៃប៉ម Cooling Tower មួយនៅឯរោងចក្រអគ្គិសនីកំពុងសាងសង់នៅភាគខាងត្បូងនៃប្រទេសចិន។ យោងតាមទីភ្នាក់ងារសារព័ត៌មានស៊ីនហួបានឲ្យដឹងថា កម្មករពីរនាក់បន្ថែមទៀតបានរងរបួស ហើយថ្លៃខូចខាតនៃគ្រោះថ្នាក់នេះត្រូវបានប៉ាន់ប្រមាណថាប្រហែល ១៥.៦លានដុល្លារ។

ទីភ្នាក់ងារសារព័ត៌មានស៊ីនហួរក៏បានលើកឡើងដែរថា របាយការណ៍របស់រដ្ឋាភិបាលបានឲ្យដឹងថា ក្រុមអ្នកស៊ើបអង្កេតបានសន្និដ្ឋានគ្រោះថ្នាក់នេះបណ្តាលមកពីបញ្ហាមួយចំនួនដូចជា ការត្រួតពិនិត្យមិនល្អ និងការមិនអាចបំពេញតាមកាតព្វកិច្ចទទួលខុសត្រូវលើសុវត្ថិភាពការងាររបស់ក្រុមហ៊ុនសាងសង់។