ចិនបោះទុន ៥០០លានដុល្លារ សង់ខ្សែកាបក្រោមសមុទ្រវែងបំផុតលើលោក ដើម្បីប្រជែងនិងអាមេរិក

Sommana Yan
15 ខែមេសា 2023
ព័ត៌មានអន្តរជាតិ
98 មើល

ក្រុមហ៊ុនទូរគមនាគមន៍ ដែលគ្រប់គ្រងដោយរដ្ឋបាលប្រទេសចិន បានបោះទុនវិនិយោគចំនួន ៥០០លានដុល្លារ លើគម្រោងកសាងបណ្តាញខ្សែកាបអុបទិកក្រោមបាតសមុទ្រវែងបំផុតលើពិភពលោក ដែលតភ្ជាប់តំបន់អាស៊ី មជ្ឈិមបូព៌ា និងអឺរ៉ុប ដើម្បីប្រជែងនិងគម្រោងស្រដៀងគ្នា ដែលគាំទ្រដោយសហរដ្ឋអាមេរិក។

នេះបើយោងតាមប្រភពពីបុគ្គល៤នាក់ ដែលពាក់ព័ន្ធនិងកិច្ចព្រមព្រៀងនេះ បានបង្ហើបប្រាប់សារព័ត៌មាន Reuters នៅថ្ងៃទី០៧ ខែមេសា ឆ្នាំ២០២៣ ដោយបានសង្កត់ធ្ងន់ថា គម្រោងនេះគឺជាសញ្ញាបញ្ជាក់ថា សង្គ្រាមបច្ចេកវិទ្យាដ៏ក្ដៅគគុករវាងទីក្រុងប៉េកាំង និងទីក្រុងវ៉ាស៊ីនតោន បាននិងកំពុងរីករាលដាលកាន់តែខ្លាំងលើបណ្ដាញផ្ដល់សេវាអ៊ីនធឺណិត។

ក្រុមហ៊ុនធំៗចំនួន៣របស់ចិន រួមមាន សាជីវកម្មទូរគមនាគមន៍ចិន ក្រុមហ៊ុន China Mobile Limited និង ក្រុមហ៊ុន China United Network Communications Group Co Ltd (China Unicom) បាននិងកំពុងរៀបចំផែនទីបណ្តាញខ្សែកាបអុបទិកក្រោមបាតសមុទ្រដ៏ទំនើបបំផុត និងវែងបំផុតរបស់ពិភពលោក។

គម្រោងដ៏មហិមានេះត្រូវបានឱ្យឈ្មោះថាគម្រោង «អឺរ៉ុប-មជ្ឈិមបូព៌ា-អាស៊ី Europe-Middle East-Asia» ដោយខ្សែដែលបានស្នើឡើងនឹងត្រូវតភ្ជាប់ពីទីក្រុងហុងកុងទៅកាន់កោះហៃណានរបស់ចិន មុនពេលតភ្ជាប់ទៅប្រទេសសិង្ហបុរី ប៉ាគីស្ថាន អារ៉ាប៊ីសាអូឌីត អេហ្ស៊ីប និងបារាំង ហើយការសាងសង់បណ្ដាញខ្សែកាបនេះគ្រោងចំណាយទឹកប្រាក់ប្រហែល ៥០០លានដុល្លារ ដើម្បីបញ្ចប់ជាស្ថាពរ។

គម្រោងនេះនឹងត្រូវបានសាងសង់ឡើងដោយក្រុមហ៊ុនបច្ចេកវិទ្យាខ្សែកាបដ៏ល្បីល្បាញ HMN Technologies Co Ltd ដែលជាក្រុមហ៊ុនគ្រប់គ្រងដោយក្រុមហ៊ុនទូរគមនាគមន៍ខ្នាតយក្សរបស់ចិន Huawei Technologies Co Ltd៕

- Video Advertisement -