ចុងខែឧសភានេះ ចិននឹងចុះមកសិក្សាទីតាំងសង់ស្ថានីយ៍ថាមពលកកើតថ្មី ក្នុងខេត្តសំខាន់២

• Sommana Yan
• 11 ខែ​ឧសភា 2023
• ព័ត៌មានក្នុងស្រុក
• 163 មើល

នៅចុងខែឧសភា ឆ្នាំ២០២៣នេះ ក្រុមការងារជំនាញចិន នឹងចុះសិក្សាទីតាំងក្នុងខេត្តព្រះសីហនុ និងខេត្តកោះកុង ដើម្បីសាងសង់ស្ថានីយ៍ថាម​ពល​​កកើតថ្មី New Energy ( Solar energy and Wind energy)។ នេះបើតាមការឱ្យដឹងពីលោក អ៊ុក ភ័ក្ត្រា អភិបាលរងខេត្តកោះកុង ដែលបានដឹកនាំប្រតិភូខេត្តកោះកុង ចូលរួមទស្សនកិច្ចសិក្សា នៅវិទ្យាស្ថានអភិវឌ្ឍន៍ចិន CDI ( CHINA DEVELOPMENT INSTITUTE) នៅទីក្រុងសិនជិន ខេត្តក្វាងទុង នៃសាធារណរដ្ឋប្រជាមានិតចិន កាលពីថ្ងៃទី០៦ ខែឧសភា ឆ្នាំ២០២៣។

ក្នុងដំណើរទស្សនកិច្ចនេះ លោកបណ្ឌិត Qu Jian អនុប្រធានវិទ្យាស្ថាន CDI បានឱ្យដឹងថា រាជរដ្ឋាភិបាលកម្ពុជា មានគម្រោងសិក្សាអំពីការអភិវឌ្ឍខេត្តជាប់តំបន់ឆ្នេរ ក្នុងនោះមានខេត្តកោះកុង ក៏ស្ថិតក្នុងការសិក្សានេះផងដែរ។

លោកបណ្ឌិត បានបន្ថែមថា លោកធ្លាប់បានទៅខេត្តព្រះសីហនុ ខេត្តកំពត ខេត្តកែប និងខេត្តកោះកុង ដោយបានថតផ្តិតយករូបភាពជាច្រើនពីខេត្តកោះកុង តាមរយៈឧបករណ៍ដ្រូនហើយផងដែរ។

លោកបណ្ឌិតបានបញ្ជាក់ថា តាមរយៈការសិក្សាខេត្តជាប់តំបន់ឆ្នេររបស់ខេត្តទាំង៤ នេះ ខេត្តកោះកុង មានស្ថានភាពភូមិ​សាស្រ្ត​ល្អប្រសើរជាងគេ សម្រាប់ការរៀបចំកំពង់ផែទឹកជ្រៅ តំបន់ពាណិជ្ជកម្មសេរី និងការសាងសង់ហេដ្ឋារចនាសម្ព័ន្ធថាម​​ពលថ្មី (New Energy) ដែលជាវិស័យសំខាន់ក្នុងការលើកកម្ពស់សេដ្ឋកិច្ចប្រទេសកម្ពុជា។

បន្ថែមពីនេះ លោកបណ្ឌិត Qu Jian បានបង្ហាញនូវផែនការបន្តរបស់វិទ្យាស្ថាន CDI គឺនៅចុងខែឧសភា​ ឆ្នាំ២០២៣ ក្រុមការងារជំនាញចិន CDI នឹងទៅសិក្សាស្រាវជ្រាវពីការអភិវឌ្ឍរបស់ខេត្តព្រះសីហនុ និងខេត្តកោះកុង ដោយផ្តោតសំខាន់លើការសិក្សាទីតាំងសម្រាប់ការសាងសង់ស្ថានីយ៍ថាមពលកកើតថ្មី New Energy ( Solar energy and Wind energy)។

គួរបញ្ជាក់ថា វិទ្យាស្ថានអភិវឌ្ឍន៍ចិន CDI (China Development Institute) គឺជាស្ថាប័នសិក្សាស្រាវជ្រាវ ឃ្លាំងគំនិត (Think Tank) ដែលត្រូវបានបង្កើតឡើងអំឡុងទស្សវត្សឆ្នាំ1980 និងបានអនុម័តដោយក្រុមប្រឹក្សារដ្ឋចិន។

វិទ្យាស្ថាន CDI មានជំនាញរៀបចំគោលនយោបាយ សេដ្ឋកិច្ច ពាណិជ្ជកម្ម ផែនការមេរៀបចំទីក្រុង តំបន់សេដ្ឋកិច្ចពិសេស និងពាណិជ្ជកម្មសេរី និងជាស្ថាប័នសិក្សាស្រាវជ្រាវ និងប្រឹក្សាយោបល់ដ៏សំខាន់ដែលទទួលស្គាល់ដោយរដ្ឋា​ភិបាលចិន​។​

កន្លងមក វិទ្យាស្ថានចិនមួយនេះ បាន និងកំពុងតែជួយរាជរដ្ឋាភិបាលកម្ពុជា  រៀបចំផែនការមេ ដើម្បីអភិវឌ្ឍន៍ខេត្តព្រះសីហនុទៅជាតំបន់សេដ្ឋកិច្ចពិសេស គំរូពហុបំណង ដោយយកគម្រូតាមទីក្រុងសិនជិន ដែលគិតត្រឹមដើមខែមីនាកន្លងទៅ ផែនការមេនេះសម្រេចបាន ៥០% ហើយ។ (អានបន្ថែម)

• Energy and Environment
• Projects Development