ជាង១ឆ្នាំនេះ រដ្ឋបានផ្តល់ការលើកទឹកចិត្តពិសេសដល់គម្រោងជាប់គាំងនៅព្រះសីហនុចំនួន ៣៣១គម្រោង

• Sommana Yan
• 26 ខែ​កក្កដា 2025
• ព័ត៌មានក្នុងស្រុក
• 121 មើល

តាំងពីបង្កើតកម្មវិធីពិសេសផ្តល់ការលើកទឹកចិត្ត ដោយគិតចាប់ពីឆ្នាំ២០២៤ និង ៦ខែដើមឆ្នាំ២០២៥មក ក្រុមការងារជំរុញការវិនិយោគខេត្តព្រះសីហនុ បានផ្តល់ការលើកទឹកចិត្តជូនដល់គម្រោងវិនិយោគសរុបចំនួន ៣៣១គម្រោង មានទុនវិនិយោគប្រមាណ ៤៧៥៣លានដុល្លារ។ នេះបើតាមកិច្ចប្រជុំពិនិត្យវឌ្ឍនភាពនៃការអនុវត្តគម្រោង ដែលទទួលបានការលើកទឹកចិត្តពិសេស ក្នុងឆ្នាំ២០២៤ និង ឆមាសទី១ ឆ្នាំ២០២៥ ដឹកនាំដោយ ឯកឧត្តមបណ្ឌិតសភាចារ្យ ហ៊ាន សាហ៊ីប ជាប្រធានក្រុមការងារជំរុញការវិនិយោគក្នុងខេត្តព្រះសីហនុ កាលពីពេលថ្មីៗនេះ។

ថ្លែងក្នុងកិច្ចប្រជុំ ឯកឧត្តម អ៊ឹម សុខធី ប្រធានលេខាធិការដ្ឋានក្រុមការងារនេះ បានឱ្យដឹងថា  ក្នុងចំណោមគម្រោងទាំង ៣៣១ មានគម្រោងពាក់ព័ន្ធអគារជាប់គាំង ១៥៣គម្រោង, គម្រោងពុំពាក់ព័ន្ធអគារជាប់គាំង (គម្រោងថ្មី) ១៤២គម្រោង, គម្រោងពង្រីក ២៤គម្រោង និងគម្រោងមានស្រាប់ ១២គម្រោង ដែលមានតម្រូវការសម្រាប់បញ្ចប់ការសាងសង់ និងអនុវត្តគម្រោង។

ក្រៅពីការសម្រេចផ្តល់ការលើកទឹកចិត្តពិសេសខាងលើនេះ ក្រុមការងារបានសម្របសម្រួលចុះបញ្ជីសហគ្រាស, សម្របសម្រួលធ្វើផ្លូវ លូ ផ្តល់លិខិតអនុញ្ញាតសាងសង់ អាជ្ញាបណ្ណទេសចរណ៍ អាជ្ញាបណ្ណអាជីវកម្មអចលនវត្ថុ ដោះស្រាយវិវាទក្រៅប្រព័ន្ធតុលាការ, រៀបចំវេទិកាទាក់ទាញ ដោយសហការជាមួយរដ្ឋបាលខេត្តព្រះសីហនុ, ផ្តល់ការប្រឹក្សាយោបល់ និងការសម្របសម្រួលដោះស្រាយសំណូមពរផ្សេងៗរបស់វិនិយោគិន និងធុរជន ទាំងខ្មែរ និង បរទេស​។

• Policy and Strategy