តៃវ៉ាន់បោះទុនជាង ១២០លានដុល្លារ សង់រោងចក្រផលិត MacBook នៅវៀតណាម

• Sommana Yan
• 8 ខែ​ឧសភា 2023
• ព័ត៌មានអន្តរជាតិ
• 145 មើល

ក្រុមហ៊ុន Quanta របស់តៃវ៉ាន់ បានចុះកិច្ចព្រមព្រៀងជាមួយអាជ្ញាធរវៀតណាម ក្នុងការសាងសង់រោងចក្រផលិតគ្រឿងបង្គុំកុំព្យូទ័រ តម្លៃ ១២០លានដុល្លារ ដើម្បីផ្គត់ផ្គង់ ឱ្យក្រុមហ៊ុនខ្នាតយក្ស Apple។ នេះបើយោងតាមការចុះផ្សាយរបស់ macdailynews នៅថ្ងៃទី០១ ឧសភា ២០២៣។

រោងចក្រថ្មីរបស់ Quanta នេះនឹងត្រូវសាងសង់ឡើងនៅក្នុងសួនឧស្សាហកម្ម My Thuan ក្នុងខេត្ត Nam Dinh ភាគខាងជើងនៃប្រទេសវៀតណាម លើផ្ទៃដី ២២,៥ហិកតា ហើយវានឹងក្លាយជារោងចក្រទី៩ របស់ក្រុមហ៊ុនមួយនេះ។

គួរម្លឹកថា រោងចក្រ Quanta ថ្មីនេះត្រូវបានគេរំពឹងថានឹងអាចបង្កើតការងារសម្រាប់ប្រជាជនក្នុងតំបន់បានរាប់ពាន់នាក់នៅប្រទេសវៀតណាម ជាពិសេសនឹងជួយជំរុញវិស័យផលិតគ្រឿងអេឡិចត្រូនិករបស់ប្រទេសនេះថែមផងដែរ។

គួរបញ្ជាក់ថា ក្រុមហ៊ុន Apple ប្តេជា្ញនឹងពង្រីកប្រតិបត្តិការផលិតកម្មរបស់ខ្លួននៅក្នុងប្រទេសវៀតណាម ដោយសារប្រទេសនេះបានក្លាយជាមជ្ឈមណ្ឌលដ៏សំខាន់សម្រាប់ការផលិតគ្រឿងអេឡិចត្រូនិកខណៈឆ្នាំ២០២១ ក្រុមហ៊ុន Apple បានបោះទុនវិនិយោគ ២០០លានដុល្លារ លើគម្រោងសាងសង់ថ្មីមួយផងដែរនៅវៀតណាម៕

• Projects Development
• Technology and Engineering