បច្ចុប្បន្នខេត្តពោធិ៍សាត់ មានក្រុមហ៊ុន សហគ្រាសសរុប ១.១៦២ កំពុងដំណើរការ

• Sommana Yan
• 8 ខែ​មីនា 2023
• ព័ត៌មានក្នុងស្រុក
• 242 មើល

គិតមកដល់ពេលនេះ ខេត្តពោធិ៍សាត់ មានក្រុមហ៊ុន សហគ្រាស ពាណិជ្ជកម្មសរុបប្រមាណ ១.១៦២ក្រុមហ៊ុន បានបើកដំណើរការសកម្មភាពរបស់ខ្លួន។នេះបើតាមការលើកឡើងរបស់ឯកឧត្តម ខូយ រីដា អភិបាលខេត្តពោធិ៍សាត់ នៅថ្ងៃទី០៧ ខែមីនា ឆ្នាំ២០២៣។

ឯកឧត្តម បានឱ្យដឹងថា ក្រុមហ៊ុន សហគ្រាសទាំង ១.១៦២ក្រុមហ៊ុន ក្នុងនោះរួមមាន ក្រុមហ៊ុនពាណិជ្ជកម្មឯកជនមាន ២៩២ក្រុមហ៊ុន សហគ្រាសឯកបុគ្គលមាន ៤៨២ក្រុមហ៊ុន សហគ្រាស និងសាខាក្រុមហ៊ុនមាន ៣៨៨សាខា និងបានគ្រប់គ្រងទិន្នន័យស្ថិតិក្រុមហ៊ុន សហគ្រាស ពាណិជ្ជកម្ម និងអាជីវកម្មសរុបចំនួន ៦.៤១១មូលដ្ឋាន។

លើសពីនោះ ឯកឧត្តមបន្តថា ខេត្តក៏មានរោងម៉ាស៊ីនកិនស្រូវសម្រាប់នាំចេញក្នុងស្រុក និងក្រៅស្រុក ក្នុងខេត្តពោធិ៍សាត់ មានចំនួន ១០កន្លែង ឡសម្ងួតប្រមាណ ៦៣ឡ ដោយមានឈ្មូញប្រមូលទិញស្រូវមកពីតាមបណ្តាខេត្តមួយចំនួន ដើម្បីនាំចេញទៅលក់នៅប្រទេសវៀតណាមផងដែរ។

ក្រៅពីចំនួនក្រុមហ៊ុនសហគ្រាស ខេត្តពោធិ៍សាត់នៅមានអាជីវកម្មធនធានរ៉ែមានចំនួន ៤៩មូលដ្ឋាន រួមមាន៖ ខ្សាច់បូម ចំនួន ២៥មូលដ្ឋាន, ខ្សាច់បក ចំនួន ១១មូលដ្ឋាន, ដីក្រហម ដីស ចំនួន ១១មូលដ្ឋាន, ថ្មសំណង់ ចំនួន ០១ មូលដ្ឋាន និងថ្មកែវ ចំនួន ០១មូលដ្ឋានថែមទៀត៕

• Projects Development
• Economy and Finance