បច្ចុប្បន្ន នៅកម្ពុជាមានសមាគម អង្គការមិនមែនរដ្ឋាភិបាល បានចុះបញ្ជីនៅក្រសួងមហាផ្ទៃបានជិត ៧០០០

• Sommana Yan
• 28 ខែ​តុលា 2025
• Uncategorized @km
• 167 មើល

បច្ចុប្បន្ននៅកម្ពុជាមានសមាគម អង្គការមិនមែនរដ្ឋាភិបាល និងសហគមន៍ជនជាតិដើមភាគតិច បានចុះបញ្ជីនៅក្រសួងមហាផ្ទៃសរុបចំនួន ៦.៦៤៩ ហើយ។ នេះបើតាមប្រសាសន៍របស់អ្នកនាំពាក្យរងក្រសួងមហាផ្ទៃ ឯកឧត្តម ទូច សុឃៈ កាលពីថ្ងៃទី ២៤ ខែតុលា ឆ្នាំ២០២៥។

ឯកឧត្តម ទូច សុឃៈ បានឱ្យដឹងថា យោងតាមរបាយការណ៍របស់អគ្គនាយកដ្ឋានរដ្ឋបាលក្រសួងមហាផ្ទៃ បច្ចុប្បន្នមានសមាគម អង្គការមិនមែនរដ្ឋាភិបាល និងសហគមន៍ជនជាតិដើមភាគតិច បានចុះក្នុងបញ្ជីនៅក្រសួងមហាផ្ទៃសរុបចំនួន ៦.៦៤៩ហើយ ដោយក្នុងនោះ មានសមាគមចំនួន ២.៩២៣ អង្គការមិនមែនរដ្ឋាភិបាលចំនួន ៣.៥៧០ និងសហគមន៍ជនជាតិដើមភាគតិចចំនួន១៥៦។

ឯកឧត្តមបន្តថា ក្នុងរយៈពេល៩ខែ ដើមឆ្នាំ២០២៥នេះ មានសមាគម និងអង្គការមិនមែនរដ្ឋាភិបាលចំនួន១៦៨ទៀត បានចុះបញ្ជីនៅក្រសួងមហាផ្ទៃ។ ក្នុងចំណោម សមាគម និងអង្គការដែលបានចុះបញ្ជីនោះ ឯកឧត្តមថា មានសមាគមចំនួន១០២ និងអង្គការមិនមែនរដ្ឋាភិបាលចំនួន៦៦។ ដោយឡែក ក្នុងរយៈពេលដូចគ្នានេះដែរ ក្រសួងក៏បានលុបឈ្មោះសមាគមនិងអង្គការមិនមែនរដ្ឋាភិបាលចេញពីបញ្ជីចំនួន៦៩ ផងដែរ។

តាមរយៈរបាយការណ៍នេះ អ្នកនាំពាក្យរងក្រសួងមហាផ្ទៃ បានចាត់ទុកការចុះបញ្ជីសមាគម និងអង្គការមិនមែនរដ្ឋាភិបាលជាបន្តបន្ទាប់នេះ ថាជាការឆ្លុះបញ្ចាំងពីលំហនៃការអនុវត្តសិទ្ធិសេរីភាពយ៉ាងពេញលេញរបស់សមាគម និងអង្គការមិនមែនរដ្ឋាភិបាល ដើម្បីរួមចំណែកជាមួយរាជរដ្ឋាភិបាល និងអាជ្ញាធរគ្រប់លំដាប់ថ្នាក់ បម្រើផលប្រយោជន៍សង្គមជាតិ និងមនុស្សជាតិស្របតាមច្បាប់៕

• Policy and Strategy