រយៈពេល១ខែ កម្ពុជាអនុម័តគម្រោងថ្មីបាន ២១គម្រោង មានទុនសរុប ៦១៩លានដុល្លារ

• Sommana Yan
• 11 ខែ​ធ្នូ 2023
• Uncategorized
• 127 មើល

ក្នុងខែវិច្ឆិកា ឆ្នាំ២០២៣នេះ គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC) បានអនុម័តគម្រោងថ្មីបានចំនួន ២១គម្រោង មានទុនវិនិយោគសរុបជិត ៦១៩លានដុល្លារ និងអាចបង្កើតការងារបានជិត ២២.០០០កន្លែង ជូនប្រជាពលរដ្ឋ។

នេះបើយោងតាមសេចក្តីប្រកាសព័តមានរបស់គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា (CDC)នៅថ្ងៃទី៨ ធ្នូ ២០២៣

ក្នុងនោះដែរ មានគម្រោងធំៗចំនួន៣ ដែលលេចធ្លោជាងគេ ទី១ គឺគម្រោងសង់វារីអគ្គិសនី ស្ថិត នៅស្ទឹងឫស្សីជ្រុំកណ្តាល មានអានុភាព ៧០មេហ្កាវាត់ នៅស្រុកមណ្ឌលសីមា និងគម្រោងសាងសង់វារីអគ្គិសនីវាលថ្មកំបុត មានអានុភាព ១០០មេហ្កាវាត់ នៅស្រុកថ្មបាំង ខេត្តកោះកុង។ ទី២គឺគម្រោងសង់ស្ថានីយ៍ផលិតអគ្គិសនីដើរដោយថាមពលពន្លឺព្រះអាទិត្យ មានអានុភាព ៦០មេហ្កាវ៉ាត់ ជាមួយប្រព័ន្ធផ្ទុកថាមពលអគ្គិសនីខេត្តស្វាយរៀង និងមានទីតាំងវិនិយោគស្ថិតនៅភូមិកណ្តាល ឃុំស្វាយចេក ស្រុករំដួល ខេត្តស្វាយរៀង។ ទី៣គឺគម្រោងបង្កើតរោងចក្រផលិតស្បែកជើង និងគ្រឿងបន្សំស្បែកជើងនៅខណ្ឌពោធិ៍សែនជ័យ រាជធានីភ្នំពេញ។

គួរបញ្ជក់ថា ក្នុងខែវិច្ឆិកា ឆ្នាំ២០២៣នេះ ទុនវិនិយោគក្នុងស្រុកបានគ្របដណ្តប់រហូតដល់ទៅ ៨២,៩០ភាគរយ នៃទុនវិនិយោគសរុប ខណៈដែលទុនវិនិយោគប្រមាណ ១៧,១០% មានប្រភពមកពីប្រទេសចិន។

ជាការកត់សម្គាល់ គេសង្កេតឃើញថា គម្រោងវិនិយោគទាំងនោះបានក្តោបលើវិស័យឧស្សាហកម្ម ១០ភាគរយ និង ៩០ភាគរយទៀតបានគ្របដណ្តប់លើហេដ្ឋារចនាសម្ព័ន្ធនិងផ្សេងៗ។

• Projects Development