រយៈពេល៨ខែ៖ កម្ពុជាទទួលបានភ្ញៀវទេសចរម៉ាឡេស៊ី ជិត៧ម៉ឺននាក់ កើនឡើងជិត១០%

• Sommana Yan
• 1 ខែ​តុលា 2025
• Uncategorized @km
• 274 មើល

គិតត្រឹមរយៈពេល៨ខែ ដើមឆ្នាំ២០២៥ កម្ពុជាទទួលបានភ្ញៀវទេសចរម៉ាឡេស៊ី ជិត៧ម៉ឺននាក់ ពោលគឺកើនឡើងជិត១០% បើធៀបនឹងរយៈពេលដូចគ្នាក្នុងឆ្នាំ២០២៤។ នេះបើយោងតាមហ្វេសប៊ុករបស់ក្រសួងទេសចរណ៍កម្ពុជា នៅថ្ងៃទី២៩ ខែកញ្ញា ឆ្នាំ២០២៥។

ក្រសួងទេសចរណ៍បានឱ្យដឹងថា យោងតាមទិវាទេសចរណ៍ពិភពលោក និងសន្និសិទទេសចរណ៍ពិភពលោកឆ្នាំ២០២៥ ដើម្បីអបអរសាទរការដាក់ចេញយុទ្ធនាការ «ទស្សនាម៉ាឡេស៊ីឆ្នាំ២០២៦» ដែលចូលរួមដោយរដ្ឋបាលនៃរដ្ឋម៉ាឡាកា សហការជាមួយក្រសួងទេសចរណ៍ សិល្បៈ និងវប្បធម៌ម៉ាឡេស៊ី បានរំលឹកឱ្យដឹងថា កាលពីក្នុងឆ្នាំ២០២៤ ភ្ញៀវទេសចរម៉ាឡេស៊ីមកទស្សនាកម្ពុជា មានចំនួនរហូតដល់ ៩៤.២៦០នាក់ កើនឡើង ៧,៣% ធៀបនឹងរយៈពេលដូចគ្នាឆ្នាំ២០២៣។

ក្រសួងបន្តថា ក្នុងរយៈពេល៨ខែដំបូងនៃឆ្នាំ២០២៥នេះ មានភ្ញៀវទេសចរម៉ាឡេស៊ីចំនួន ៦៦.២៩៨នាក់ បានមកទស្សនាកម្ពុជា ដែលមានការកើនឡើង ៨,៣% ធៀបនឹងរយៈពេលដូចគ្នាក្នុងឆ្នាំ២០២៤។ ទន្ទឹមគ្នានេះ កម្ពុជារំពឹងថា តាមរយៈការដាក់ចេញយុទ្ធនាការ «ទស្សនាម៉ាឡេស៊ីឆ្នាំ២០២៦» និងការដាក់ឱ្យដំណើរការអាកាសយានដ្ឋានអន្តរជាតិតេជោកម្រិត 4F លំហូរភ្ញៀវទេសចររវាងប្រទេសទាំងពីរ ម៉ាឡេស៊ី និងកម្ពុជា ព្រមទាំងភ្ញៀវទេសចរអន្តរជាតិធ្វើដំណើរតាមរយៈប្រទេសម៉ាឡេស៊ី នឹងមានកំណើនកាន់តែច្រើនឡើងបន្ថែមទៀត។

គួរបញ្ជាក់ថា ក្នុងរយៈពេលដដែលនេះ កម្ពុជាទទួលបានទេសចរអន្តរជាតិរហូតដល់ជាង ៤លាននាក់ ស្របពេលដែលទេសចរជាតិមានចំនួន ១៧,២៨លាននាក់ កើនឡើងជិត៥៣% ធៀបរយៈពេលដូចគ្នាក្នុងឆ្នាំ២០២៤។ នេះបើតាមសារលិខិតរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ក្នុងឱកាសអបអរសាទរទិវាទេសចរណ៍ពិភពលោក ឆ្នាំ២០២៥ កាលថ្ងៃទី២៧ ខែកញ្ញា៕ (Read more)

• Tourism and Travelling