រោងចក្រថាមពលតម្លៃ៣៨០លានដុល្លារនៅស្រុកល្វាឯម ចាប់ផ្តើមបញ្ចេញថាមពលហើយ

• Samphors Sao
• 13 ខែ​មករា 2021
• ព័ត៌មានក្នុងស្រុក
• 180 មើល

រោងចក្រថាមពលដើរដោយប្រេងខ្មៅ អនុភាពសរុប ៤០០មេហ្គាវ៉ាត បានចាប់ផ្តើមបញ្ឆេះម៉ាស៊ីន បញ្ចេញថាមពលភ្ជាប់ចូលបណ្តាញជាតិ តាំងពីដើមឆ្នាំ២០២១ មកម្ល៉េះ។ នេះបើយោងតាម ឯកឧត្តម វ៉ិចទ័រ ហ្សូណា អ្នកនាំពាក្យក្រសួងរ៉ែ និងថាមពល កាលពីថ្ងៃទី ១២ មករា កន្លងមកនេះ។

ឯកឧត្តម វ៉ិចទ័រ ហ្សូណា បានថ្លែងថា៖ «[រោងចក្រនេះ] ចាប់ផ្តើមបញ្ចេញថាមពលដល់បណ្តាញជាតិហើយ ព្រោះធម្មតាទេដល់រដូវប្រាំង ការគ្រប់គ្រង ការផ្គត់ផ្គង់នេះ មានការគិតគូរវែងឆ្ងាយ គឺយើងធ្វើឱ្យមានល្បាយថា ធ្យូងថ្ម ក៏ចេញបាន វារីអគ្គិសនីក៏ចេញបាន ពីប្រភពសូឡាក៏ចេញបាន»។

ឯកឧត្តម ក៏បញ្ជាក់ទៀតថា៖ «ក្នុង ៤០០​ មេហ្គាវ៉ាត យើងអត់ដើរពេញទេ ព្រោះយើងដំណើរការ ធ្វើយ៉ាងណា ដើម្បីបំពេញតម្រូវការ យើងមិនអាចដំណើរការ ឱ្យហួសពីសេចក្តីត្រូវការទេ…យើងត្រូវដឹងថា ការផលិតចេញពីប្រេង មានថ្លៃខ្ពស់ជាង។ ដូច្នេះ ដើម្បីឱ្យមានស្ថានភាពហិរញ្ញវត្ថុចំណេញច្រើន គេដើរប្រភពផ្សេងៗ ហើយរោងចក្រនេះ គឺដើម្បីបំពេញសេចក្តីត្រូវការប៉ុណ្ណោះ»។

គួរបញ្ជាក់ផងដែរថា គម្រោងនេះ ត្រូវបានសាងសង់លើផ្ទៃដីសរុប ៤៣ ហិកតា ក្រោមទុនវិនិយោគប្រមាណ ៣៨០ លានដុល្លារអាមេរិក។

គម្រោងចែកចេញជាពីរផ្នែកធំៗ ទី១ គឺការសាងសង់រោងចក្រម៉ាស៊ីនភ្លើងអនុភាពទំហំ ២០០មេហ្គាវ៉ាត នាំចូលពីប្រទេសហ្វាំងឡង់ និងសាងសង់ដោយក្រុមហ៊ុនចិន China Gezhouba Group Corporation និង ទី២ គឺជាការសាងសង់រោងចក្រម៉ាស៊ីនភ្លើងអនុភាព ២០០មេហ្គាវ៉ាត នាំចូលពីប្រទេសអាឡឺម៉ង់ និងត្រូវសាងសង់ដោយក្រុមហ៊ុនចិន China National Heavy Machinery Corporation។ (អានបន្ថែម)

• Energy and Environment
• Road and Infrastructure
• Projects Development