សម្តេចតេជោជំរុញឱ្យរដ្ឋបាលរាជធានី ខេត្ត ប្រើអំពូល LED ផលិតនៅកម្ពុជាបំភ្លឺផ្លូវសាធារណៈ

• Sommana Yan
• 1 ខែ​ធ្នូ 2022
• Uncategorized
• 106 មើល

សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានណែនាំឱ្យអភិបាលរាជធានី-ខេត្ត ប្រើប្រាស់អំពូលភ្លើងវ័យឆ្លាត (LED) ដែលផលិតនៅកម្ពុជា ដាក់បំភ្លឺតាមដងផ្លូវសាធារណៈ និងទីប្រជុំជន ដើម្បីកាត់បន្ថយថ្លៃអគ្គិសនី និងរួមចំណែកដល់សេដ្ឋកិច្ចបៃតង។

សម្តេចតេជោនាយករដ្ឋមន្ត្រី បានណែនាំយ៉ាងដូច្នេះក្នុងពិធីខួបទី១១ឆ្នាំ នៃប្រតិបត្តិការរបស់ក្រុមហ៊ុនមីនេបៀរបស់ជប៉ុន នៅតំបន់សេដ្ឋកិច្ចពិសេសភ្នំពេញ នាថ្ងៃទី០១ ខែធ្នូ ឆ្នាំ២០២២។

សម្តេចតេជោ បានឱ្យដឹងថានៅតាមដងផ្លូវមួយដ៏វែង ប្រសិនបើពុំមានរថយន្ដឆ្លងកាត់នោះទេ អំពូលវៃឆ្លាតនេះ នឹងកាត់បន្ថយពន្លឺ នឹងធ្វើឱ្យចំណេញដល់អគ្គិសនី។

សម្តេចតេជោបានជំរុញ អភិបាលរាជធានី-ខេត្ត គួរបញ្ជាទិញអំពូលភ្លើងវ័យឆ្លាត (LED) ដែលផលិតនៅកម្ពុជា ដោយក្រុមហ៊ុនមីនេបៀរបស់ជប៉ុន យកទៅប្រើប្រាស់។

ក្រៅពីនេះ សម្ដេចតេជោ ក៏បានបន្ថែមថា រហូតមកដល់ពេលនេះ កម្ពុជាមានប្រភពថាមពលស្អាតច្រើនជាងគេ ក្នុងបណ្តាប្រទេសមួយចំនួនក្នុងតំបន់ ដែលកម្ពុជាមានរហូតទៅដល់ជាង ៦០ភាគរយនៃថាមពលស្អាតដែលកើតចេញពីវារីអគ្គិសនី និងពីពន្លឺព្រះអាទិត្យ។

ជាមួយគ្នានេះផងដែរ រាជរដ្ឋាភិបាល នឹងបន្តពង្រីកនូវផ្ទាំងថាពមលកកើតឡើងវិញពីពន្លឺព្រះអាទិត្យ នៅខេត្តពោធិ៍សាត់ ដែលមានកម្លាំងថាមពល ៩០មេហ្គាវ៉ាត់។

ជាចុងក្រោយនេះ សម្ដេចតេជោ ហ៊ុន សែន បានបង្ហើបឱ្យដឹងថា ឯកឧត្តមកែវ រតនៈ អគ្គនាយកអគ្គិសនីកម្ពុជា ក៏បាននាំក្រុមហ៊ុនមីនេបៀ ទៅពិនិត្យលទ្ធភាពដើម្បីបង្កើតរោង ចក្រអគ្គិសនី នៅខេត្ត ពោធិ៍សាត់ ដើរដោយថាមពលពន្លឺព្រះអាទិត្យ។