ស្ពានអាកាសខ្ពស់បំផុតនៅលើពិភពលោកនឹងបើកនៅឆ្នាំក្រោយ

Proeksa Meas
23 ខែមីនា 2018
ព័ត៌មានសំណង់
328 មើល

កាលពីពេលថ្មីៗនេះក្រុមហ៊ុន CapitaLand បានបង្កើតកំណត់ត្រាពិភពលោកថ្មីទៅលើគម្រោង ស្ពានអាកាសThe Conservatory, Raffles City Chongqing នៅឯទីក្រុងឆុងឈីងប្រទេសចិនថាជាស្ពានអាកាសខ្ពស់បំផុតដែលតភ្ជាប់អគារច្រើនជាងគេនៅលើពិភពលោក។

ស្ពានអាកាសនេះ មានកំពស់ ៤០០ ម៉ែត្រ ហើយរចនាឡើងដោយមានរូបរាងប្រៀបដូចជាអគារផ្ដេក វាមានរាងកោងប្រវែង ៣០០ ម៉ែត្រទទឹង ៣០ ម៉ែត្រកំពស់ ២២,៥ ម៉ែត្រ និងតភ្ជាប់អគារចំនួន៤។

ស្ពានអាកាសThe Conservatory នឹងយកឈ្នះស្ពានអាកាស Marina Bay Sands របស់ប្រទេសសិង្ហបុរីដែលមានកម្ពស់ ២០០ ម៉ែត្រ និងតភ្ជាប់អាគារចំនួន៣។

ស្ពានអាកាសនេះគឺជាផ្នែកមួយនៃគម្រោង Raffles City Chongqingដែលជាគម្រោងយក្សក្រោមថវិកាវិនិយោគជិត ៤ ពាន់លានដុល្លារអាមេរិកដោយក្រុមហ៊ុន CapitaLand និង Ascendas-Singbridge។ គម្រោងទាំងមូលមានអគារខ្ពស់ចំនួន ៨ នឹងផ្ទៃក្រឡាសាងសង់សរុប ១,១២ លានម៉ែត្រការ៉េ ស្មើនឹងទំហំតារាងបាល់ទាត់ចំនួន ១៧០ តារាងរួមគ្នា។

គម្រោងនេះនឹងប្រើប្រាស់ជា ផ្សារទំនើបលំនៅដ្ឋានការិយាល័យនិងសណ្ឋាគារ។ សំរាប់ស្ពានអាកាសមួយនេះនឹងបំរើការជា កន្លែងមើលទេសភាព អាងហែលទឹក ភោជនីយដ្ឋាន និងបារ។

ក្នុងពេលបច្ចុប្បន្ននេះគម្រោងទាំងមូលកំពុងដំណើរការសាងសង់ ហើយរំពឹងថានឹងបញ្ចប់នៅពាក់កណ្តាលឆ្នាំនេះហើយនឹងបើកដំណើរការនៅឆ្នាំក្រោយ។