ឯកឧត្តម ជា សុផារ៉ា បង្ហាញការគាំទ្រចំពោះសកម្មភាពរបស់សមាគមអ្នកសាងសង់កម្ពុជា

Proeksa Meas
27 ខែសីហា 2016
Uncategorized
87 មើល

បន្ទាប់ពីត្រូវបានតែងតាំងជារដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានរយៈពេល បី ខែរួចមក ឯកឧត្តមទេសរដ្ឋមន្ត្រី ជា សុផារ៉ា បានបង្ហាញនូវការគាំទ្រចំពោះសកម្មភាពដែលរៀបចំដោយសមាគមអ្នកសាងសង់កម្ពុជា (CCA)។

នៅក្នុងកិច្ចប្រជុំកាលពីថ្ងៃទី ២៣ ខែ មិថុនា ឆ្នាំ ២០១៦ ដើម្បីសម្តែងការគាំទ្រចំពោះការតែងតាំងរបស់លោក ឯកឧត្តម ជា សុផារ៉ា បានបង្ហាញពីការគាំទ្រនូវសកម្មភាពដែលរៀបចំឡើងដោយសមាគមអ្នកសាងសង់កម្ពុជាដើម្បីអភិវឌ្ឍវិស័យសំណង់នៅក្នុងប្រទេសកម្ពុជា។

ឯកឧត្តមបានមានប្រសាសន៍ថា “ជាគោលការណ៍ ខ្ញុំគាំទ្របេសកកម្ម និងសកម្មភាពរបស់សមាគមនាពេលកន្លងមក។ ខ្ញុំក៏ត្រូវការសមាគមនេះដើម្បីធ្វើការគាំទ្រដល់ក្រសួងវិញក្នុងការបន្តលើកមុខមាត់របស់កម្ពុជានៅក្នុងឆាកអន្តរជាតិ ដោយសារតែសមាគមនេះមានបណ្តាញយ៉ាងធំទូលាយក្នុងចំណោមវិនិយោគិនក្នុងស្រុក និងអន្តរជាតិនៅក្នុងវិស័យសំណង់នេះ។”

ឯកឧត្តមក៏បានស្នើធ្វើជាម្ចាស់ផ្ទះនៃសិក្ខាសាលា ដោយប្រមូលផ្តុំអ្នកជំនាញមកពីក្រសួង និងសមាជិករបស់សមាគមនេះ ដើម្បីចែករំលែកចំណេះដឹង និងបទពិសោធន៍ ព្រមទាំងស្តាប់មតិយោបល់ពីគ្នាទៅវិញទៅមក។ ឯកឧត្តមថែមទាំងផ្តួចផ្តើមគំនិតឲ្យមានការធ្វើកម្មសិក្សារបស់ស្ថាបត្យករ និងអ្នកគ្រប់គ្រងគម្រោងពីប្រទេសកម្ពុជាទៅកាន់ការដ្ឋានសាងសង់នៅក្នុងប្រទេសជិតខាង ដើម្បីសិក្សាពីការរីកចំរើននៃវិស័យនេះ។

លោកឧកញ៉ា ពុង ឃាវសែ ដែលតំណាងឱ្យសមាគមសាងសង់នៅកម្ពុជា បានព្រមព្រៀងដើម្បីពង្រឹងទំនាក់ទំនង និងការងារជាមួយក្រសួង។ លោកក៏បានប្រាប់អំពីផលប្រយោជន៍នៃការប្រើកម្មវិធីសាងសង់កម្រិតខ្ពស់ គឺគំរូព័ត៌មានសំណង់ (Building Information Modeling = BIM) ទៅកាន់ឯកឧត្តមទេសរដ្ឋមន្ត្រី ហើយសង្ឃឹមថានឹងអនុវត្តប្រព័ន្ធនេះនៅក្នុងប្រទេសកម្ពុជា បន្ទាប់ពីក្រុមការងារនៃសមាគមបានសិក្សាពីបច្ចេកវិទ្យារបស់អាជ្ញាធរអគារ និងសំណង់ (BCA) នៃប្រទេសសិង្ហបុរី។

ឯកឧត្តមទេសរដ្ឋមន្ត្រី ជា សុផារ៉ា បានសម្តែងចំណាប់អារម្មណ៍លើ BIM និងបានប្រាប់ឲ្យមន្ត្រីរបស់ក្រសួងឲ្យសិក្សាបន្ថែមទៀតពីក្រុមបច្ចេកទេសរបស់ CCA អំពីសក្តានុពលនៃការអនុវត្ត BIM នេះនៅប្រទេសកម្ពុជា។

បន្ទាប់ពីត្រូវបានបង្កើតឡើងនៅក្នុងឆ្នាំ ២០១១ សមាគមអ្នកសាងសង់កម្ពុជានេះ បានចុះហត្ថលេខាលើអនុស្សរណៈយោគយល់គ្នាជាមួយក្រសួងរៀបចំដែនដី នគរូបនីយកម្ម និងសំណង់ ក្នុងឆ្នាំ ២០១៣ ដើម្បីលើកកម្ពស់ការចែករំលែកព័ត៌មាន និងកិច្ចសហប្រតិបត្តិការលើវិស័យសំណង់។

- Video Advertisement -