៥ខែដើមឆ្នាំ២០២៤ ក្រសួងដែនដី អនុម័តគម្រោងសាងសង់បាន ១៣៣០គម្រោង មានទុនជិត ២ពាន់លានដុល្លារ

• Sommana Yan
• 16 ខែ​កក្កដា 2024
• ព័ត៌មានក្នុងស្រុក
• 151 មើល

រយៈពេល៥ខែដើមឆ្នាំ២០២៤ ក្រសួងរៀបចំដែនដី នគរូបនីយកម្ម និងសំណង់ បានអនុម័តគម្រោងសាងសង់ ១.៣៣០ ថយចុះ ៩ភាគរយ ធៀបនឹងរយៈពេលដូចគ្នាឆ្នាំមុនដែលមានគម្រោងសាងសង់ចំនួន ១.៤៦៣គម្រោង។​

ទំហំផ្ទៃក្រឡាគម្រោងសាងសង់ មាន ៤,២៧លានម៉ែត្រការ៉េ ធ្លាក់ចុះ ២២ភាគរយ និងប្រើប្រាស់ទុន ១.៨១១ លានដុល្លារ ថយចុះ ២០ភាគរយ។​

ក្នុងខែឧសភា មានគម្រោងសរុប ២៣១គម្រោង ដែលទទួលបានការអនុញ្ញាតសាងសង់ ធ្លាក់ចុះ១៤,១ភាគរយ ក្នុងទំហំផ្ទៃក្រឡា ១,៣៧លានម៉ែត្រការ៉េ កើន ៤៩,៧ភាគរយ ក្រោមទុនវិនិយោគ ៧៣៩,៧លានដុល្លារ កើនឡើង ១៦០ភាគរយធៀបនឹងខែមុន។

របាយការណ៍ដដែល បញ្ជាក់ថា ការនាំចូលគ្រឿងសំណង់បានកើនឡើង ២៣,១ភាគរយ និងការផលិតស៊ីម៉ង់ត៍ក្នុងស្រុកបានកើនឡើង ៤,៧ភាគរយ ប្រមាណ ៣,៥លានតោន ដែលជាធាតុបង្ហាញពីការកើនឡើងនៃវិស័យនេះ។​

ក្រសួងសេដ្ឋកិច្ច និងហិរញ្ញវត្ថុ លើកឡើងថា៖ “សូចនាករសេដ្ឋកិច្ចសំខាន់ៗក្នុងខែឧសភា និងរយៈពេល៥ខែ ឆ្នាំ២០២៤ បានបង្ហាញពីសញ្ញាណកាន់តែល្អជាបន្តបន្ទាប់ ជាពិសេសលើវិស័យពាណិជ្ជកម្មអន្តរជាតិ និងទេសចរណ៍ ស្របពេលដែលស្ថានភាពអតិផរណាកំពុងវិលត្រឡប់មកស្ថានភាពល្អប្រសើរឡើងវិញ ប៉ុន្តែសកម្មភាពសាងសង់មានការធ្លាក់ចុះបន្តិច”។​

• Projects Development