និន្នាការ ៣ធំៗ ដែលនឹងប្ដូរអនាគតនៃហេដ្ឋារចនាសម្ព័ន្ធពិភពលោក

Proeksa Meas
12 ខែសីហា 2026
ព័ត៌មានសំណង់
279 មើល

ក្រុមហ៊ុនកម្មវិធីសំណង់ឌីជីថលលំដាប់ពិភពលោក Bentley Systems ថ្មីៗនេះបានបង្ហាញថា និន្នាការ ៣សំខាន់ៗ រួមមានបច្ចេកវិទ្យា AI កម្មវិធី Digital Twins និងដំណោះស្រាយដែលផ្អែកលើទិន្នន័យ កំពុងផ្លាស់ប្តូរអនាគតគម្រោងសំណង់ហេដ្ឋារចនាសម្ព័ន្ធជុំវិញពិភពលោក។

ចំណុចទាំង ៣ នឹងធ្វើឱ្យរៀបចំផែនការរចនា សាងសង់ និងថែទាំហេដ្ឋារចនាសម្ព័ន្ធ កាន់តែមានប្រសិទ្ធភាព ចំពេលដែលរដ្ឋាភិបាលជុំវិញពិភពលោកកំពុងប្រឈមនឹងការប្រែប្រួលអាកាសធាតុ និងហេដ្ឋារចនាសម្ព័ន្ធដែលមានអាយុកាលចាស់។

ក្រុមហ៊ុនបានលើកឡើងថា បច្ចេកវិទ្យា Digital Twins, AI, Collaborative Modeling និង Subsurface Modeling របស់ Bentley ជួយឱ្យវិស្វករសាកល្បងការរចនាជាច្រើនជម្រើស បង្កើនកិច្ចសហការរវាងក្រុមការងារ តាមដានស្ថានភាពហេដ្ឋារចនាសម្ព័ន្ធជាក់ស្តែង (real time) និងព្យាករណ៍ការថែទាំមុនពេលកើតមានបញ្ហា។

សមត្ថភាពទាំងនេះជួយបង្កើតហេដ្ឋារចនាសម្ព័ន្ធដែលមានសុវត្ថិភាព ភាពធន់ខ្ពស់ ប្រសិទ្ធភាពកាន់តែប្រសើរ កាត់បន្ថយចំណាយ និងធ្វើឱ្យការគ្រប់គ្រងទ្រព្យសម្បត្តិរយៈពេលវែងកាន់តែងាយស្រួល។

Bentley ក៏បានបង្ហាញពីឧទាហរណ៍នៃទីក្រុង Pau ប្រទេសបារាំង ដែលបានប្រើប្រាស់ Digital Twin សម្រាប់ទីក្រុងទាំងមូល ដើម្បីឱ្យប្រជាពលរដ្ឋអាចមើល និងវាយតម្លៃគម្រោងអភិវឌ្ឍន៍ មុនពេលចាប់ផ្តើមសាងសង់។

ក្រុមហ៊ុនជឿជាក់ថា ការរួមបញ្ចូល AI ទិន្នន័យបើកចំហ (Open Data) និង Digital Twins នឹងដើរតួនាទីយ៉ាងសំខាន់ក្នុងការកសាងហេដ្ឋារចនាសម្ព័ន្ធដែលមាននិរន្តរភាព ភាពធន់ និងភាពឆ្លាតវៃសម្រាប់អនាគត។