មកសិក្សាពីបច្ចេកវិទ្យាសាងសង់សណ្ឋាគារខ្នាតយក្សតម្លៃ ១,៣ ពាន់លានដុល្លារ នៅអាមេរិក

Proeksa Meas
29 ខែសីហា 2026
ព័ត៌មានសំណង់
31 មើល

ក្រុមហ៊ុន Mortenson និង McCarthy បានរួមគ្នាបញ្ចប់ការសាងសង់ Gaylord Pacific Resort & Convention Center នៅទីក្រុង Chula Vista រដ្ឋ California មុនកាលកំណត់ចំនួន ៦ សប្តាហ៍ ដោយប្រើប្រាស់កម្មវិធីគ្រប់គ្រងការសាងសង់ Bentley SYNCHRO 4D។

គម្រោងដែលមានតម្លៃ ១.៣ ពាន់លានដុល្លារនេះ បានក្លាយជាគម្រោងសាងសង់សណ្ឋាគារធំបំផុតមិនធ្លាប់មាននៅតំបន់ឆ្នេរខាងលិចរបស់សហរដ្ឋអាមេរិក និងបង្ហាញពីរបៀបដែលបច្ចេកវិទ្យាសំណង់ឌីជីថលអាចជួយបង្កើនការសហការ ការធ្វើផែនការ និងប្រសិទ្ធភាពនៃការអនុវត្តគម្រោងទ្រង់ទ្រាយធំ។

គម្រោងនេះត្រូវបានអភិវឌ្ឍលើផ្ទៃដីទំហំ ៣៦ អេកគ័រ ដោយរួមមានបន្ទប់ស្នាក់នៅចំនួន ១,៦០០ បន្ទប់ សួនកម្សាន្តទឹក និងមជ្ឈមណ្ឌលសន្និបាត និងព្រឹត្តិការណ៍ដែលមានផ្ទៃក្រឡាសរុប ៤៧៧,០០០ ហ្វីតការ៉េ។

ក្រុមការងារត្រូវសម្របសម្រួលការសាងសង់អគារពីរដែលមានលក្ខណៈខុសគ្នា គឺអគារសណ្ឋាគារសំណង់បេតុង និងមជ្ឈមណ្ឌលសន្និបាតសំណង់ដែក ខណៈពេលដែលត្រូវរៀបចំឱ្យផ្នែកខ្លះនៃអគារអាចដំណើរការបានមុនកំណត់។

ដោយប្រើ SYNCHRO 4D ក្រុមការងារបានភ្ជាប់ធាតុគំរូឌីជីថលជាង ៣.២ លានធាតុទៅនឹងសកម្មភាពសាងសង់ជាង ៣៦,០០០ សកម្មភាព ដែលផ្តល់ឱ្យសមាជិកក្រុមជាង ១០០ នាក់អាចមើលឃើញវឌ្ឍនភាព កាលវិភាគ និងការសម្របសម្រួលការងាររវាងក្រុមផ្សេងៗបានក្នុងពេលជាក់ស្តែង។

លើសពីនេះ កម្មវិធីនេះក៏បានពង្រឹងសុវត្ថិភាពការដ្ឋានដោយអនុញ្ញាតឱ្យក្រុមការងារធ្វើគំរូប្រព័ន្ធទ្រទ្រង់ និងប្រព័ន្ធការពារការធ្លាក់ពីកម្ពស់ មុនពេលចាប់ផ្តើមការសាងសង់ជាដើម។

ការធ្វើបច្ចុប្បន្នភាពជាប្រចាំ និងការប្រៀបធៀបរវាងផែនការ និងវឌ្ឍនភាពជាក់ស្តែង បានជួយឱ្យគម្រោងបញ្ចប់ក្នុងរយៈពេលត្រឹម ៣៤ ខែ បើប្រៀបធៀបនឹងផែនការដើមដែលកំណត់ ៣៦ ខែ។

ក្រៅពីការបញ្ចប់គម្រោងមុនកាលកំណត់ គម្រោងនេះត្រូវបានរំពឹងថានឹងជួយដល់សេដ្ឋកិច្ចប្រមាណ ៥០០០ លានដុល្លារអាមេរិកក្នុងមួយឆ្នាំ និងបង្កើតការងារអចិន្ត្រៃយ៍ជាង ៤,០០០ កន្លែង។

គួរបញ្ជាក់ថា កម្មវិធី SYNCHRO 4D គឺជាកម្មវិធីឆ្លាតវៃបែបគ្រប់ជ្រុងជ្រោយមួយដែលអ្នកជួយអ្នករៀបចំផែនការគម្រោងសំណង់ និងពិសេសជួយបង្ហាញគំរូប្លង់នៃគម្រោងបែបរស់រវើកដូចពិតនៅលើទីតាំងជាក់ស្ដែង ពោលគឺអ្នកអាចមើលឃើញដូចជាគម្រោងនោះដូចសង់រួចរាល់ហើយដូច្នោះ។ (អានបន្ថែម)

- Video Advertisement -