Bentley Systems ទទួលបានការអនុម័តពី FedRAMP សម្រាប់កម្មវិធីសំខាន់ ២

Sommana Yan
9 ខែឧសភា 2026
ព័ត៌មានសំណង់
203 មើល

ក្រុមហ៊ុន Bentley Systems ថ្មីៗនេះ ជោគជ័យលើរឿងសំខាន់មួយដែលកម្មវិធី ២ របស់ខ្លួន គឺ ProjectWise និង OpenGround ទទួលបានអនុម័តជាផ្លូវការពី FedRAMP។

FedRAMP ឬ Federal Risk and Authorization Management Program គឺជាកម្មវិធីរបស់រដ្ឋាភិបាលសហព័ន្ធសហរដ្ឋអាមេរិក ដែលបង្កើតឡើងដើម្បីស្តង់ដារនីយកម្មលើការវាយតម្លៃសន្តិសុខ ការផ្តល់សិទ្ធិ និងការត្រួតពិនិត្យជាបន្តបន្ទាប់សម្រាប់ផលិតផល និងសេវាកម្មលើប្រព័ន្ធ Cloud (Cloud services)។

ដូច្នេះការទទួលបានវិញ្ញាបនបត្រនេះគឺជាសញ្ញាប្រាប់ថាស្ថាប័នរដ្ឋនានារបស់សហរដ្ឋអាមេរិក អាចប្រើប្រាស់កម្មវិធីរបស់ Bentley បានយ៉ាងពេញលេញ និងជឿទុកចិត្តនៅក្នុង Cloud ប្រកបដោយសុវត្ថិភាព។ នេះគឺជំហានដ៏សំខាន់មួយ។

សមិទ្ធផលនេះជួយលុបឧបសគ្គផ្នែកបច្ចេកទេស និងការរក្សាទុកទិន្នន័យបែប local hosting ដែលកាលពីមុនជាបញ្ហាកម្រិតសមត្ថភាពធ្វើការមន្ដ្រីនៃក្រសួង ឬភ្នាក់ងាររដ្ឋនានារបស់អាមេរិក។

តាមរយៈការបំពេញតាមស្តង់ដារសុវត្ថិភាពដ៏តឹងរ៉ឹងដែលតម្រូវដោយ FedRAMP ឥឡូវនេះ Bentley បានជួយឱ្យស្ថាប័នរដ្ឋាភិបាលអាចធ្វើទំនើបកម្មលំហូរការងារ និងពង្រឹងការគ្រប់គ្រងទិន្នន័យភូមិសាស្ត្របច្ចេកទេស បានដោយងាយ។

ការអនុម័តនេះក៏ជួយសម្រួលដល់ដំណើរការលទ្ធកម្ម ដោយមិនចាំបាច់មានការពិនិត្យសុវត្ថិភាពឡើងវិញដែលចំណាយពេលយូរ។

សម្រាប់អ្នកម៉ៅការឯកជន និងក្រុមហ៊ុនវិស្វកម្ម ដំណាក់កាលដ៏សំខាន់នេះដើរតួជាកាតាលីករប្រតិបត្តិការដ៏សំខាន់។ ក្រុមការងារដែលកំពុងអនុវត្តកម្មវិធីដែលទទួលបានមូលនិធិពីសហព័ន្ធ ឥឡូវនេះអាចសហការជាមួយរដ្ឋតាម Cloud បាន។

នេះជួយកាត់បន្ថយយ៉ាងខ្លាំងនូវហានិភ័យ និងការយឺតយ៉ាវដែលជារឿយៗពាក់ព័ន្ធនឹងដំណើរការអនុម័តផ្នែកសុវត្ថិភាព។

ក្រៅពីការទទួលបានសិទ្ធិប្រើប្រាស់ដំបូង FedRAMP ក៏តម្រូវឱ្យមានការត្រួតពិនិត្យសុវត្ថិភាពជាបន្តបន្ទាប់ផងដែរ។ ចំណុចនេះគឺធានាថាទាំង ProjectWise និង OpenGround នៅតែមានភាពធន់នឹងបញ្ហាសុវត្ថិភាពដូចជាការលួចយកទិន្នន័យជាដើម។

តាមរយៈការទទួលបានការអនុម័តនេះ Bentley បានពង្រឹងការប្តេជ្ញាចិត្តរបស់ខ្លួនក្នុងការផ្តល់នូវមូលដ្ឋានគ្រឹះឌីជីថលដែលគួរឱ្យទុកចិត្ត សម្រាប់គម្រោងហេដ្ឋារចនាសម្ព័ន្ធសំខាន់ៗបំផុតរបស់ពិភពលោក។

- Video Advertisement -