កម្ពុជា និងទីភ្នាក់ងារ IAEA រួមគ្នាក្នុងការលើកកម្ពស់ការប្រើប្រាស់ថាមពលបរមាណូសន្តិវិធី និងពង្រឹងសុវត្ថិភាពវិទ្យុសកម្មជាតិ
ក្រសួងរ៉ែ និងថាមពល ប្រគល់ឧបករណ៍វេជ្ជសាស្ត្រ និងឧបករណ៍រាវរកសារធាតុវិទ្យុសកម្ម ជូនស្ថាប័នពាក់ព័ន្ធ ដើម្បីពង្រឹងសន្តិសុខនុយក្លេអ៊ែរ និងអភិវឌ្ឍន៍វិស័យសុខាភិបាលនៅខេត្តពោធិ៍សាត់
ខេត្តពោធិ៍សាត់៖ ការលើកកម្ពស់ការប្រើប្រាស់បច្ចេកវិទ្យាថាមពលបរមាណូស៊ីវិលក្នុងន័យសន្តិវិធី បានក្លាយជាអាទិភាពដ៏សំខាន់មួយសម្រាប់រាជរដ្ឋាភិបាលកម្ពុជា ក្នុងការអភិវឌ្ឍវិស័យសុខាភិបាល និងការគ្រប់គ្រងសុវត្ថិភាពវិទ្យុសកម្មជាតិឱ្យស្របតាមស្តង់ដារអន្តរជាតិ។ យោងពិធីប្រគល់-ទទួល កាលពីខែកក្កដា ឆ្នាំ២០២៦ ឯកឧត្តមបណ្ឌិត ទី នរិន្ទ រដ្ឋលេខាធិការប្រចាំការ និងជាតំណាងដ៏ខ្ពង់ខ្ពស់របស់ ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល បានអញ្ជើញជាអធិបតីក្នុង «ពិធីប្រគល់-ទទួលឧបករណ៍វេជ្ជសាស្រ្ត និងឧបករណ៍រាវរកសារធាតុវិទ្យុសកម្ម» ក្រោមកិច្ចសហប្រតិបត្តិការបច្ចេកទេសរវាងក្រសួងរ៉ែនិងថាមពល និងទីភ្នាក់ងារថាមពលបរមាណូអន្តរជាតិ (IAEA) នៅទីរួមខេត្តពោធិ៍សាត់។
នៅក្នុងពិធីផ្លូវការនេះ ក្រសួងរ៉ែនិងថាមពលបានបែងចែកឧបករណ៍បច្ចេកទេស និងវេជ្ជសាស្ត្រទំនើបៗជូនដល់ស្ថាប័នគោលដៅចំនួនបី ដើម្បីបម្រើឱ្យប្រតិបត្តិការជាក់ស្តែង។ ក្នុងនោះ ឧបករណ៍រាវរកសារធាតុវិទ្យុសកម្មចំនួន ៩ ឈុត ត្រូវបានប្រគល់ជូនក្រសួងរ៉ែ និងថាមពល សម្រាប់ការត្រួតពិនិត្យ និងគ្រប់គ្រងស្ថានភាពវិទ្យុសកម្មនៅតាមទីតាំងដែលមានការប្រើប្រាស់ប្រភពវិទ្យុសកម្មនៅក្នុងប្រទេស។ ជាមួយគ្នានេះ ឧបករណ៍រាវរកសារធាតុវិទ្យុសកម្មចំនួន ៤ ឈុត ត្រូវបានប្រគល់ជូនលេខាធិការដ្ឋានគណៈកម្មាធិការជាតិប្រឆាំងភេរវកម្ម សំដៅពង្រឹងសមត្ថភាពរាវរក ការពារសន្តិសុខក្នុងកម្មវិធីជាតិ និងអន្តរជាតិធំៗ ព្រមទាំងបង្កើនប្រសិទ្ធភាពឆ្លើយតបទៅនឹងហេតុការណ៍ជាយថាហេតុផ្សេងៗ។
បន្ថែមលើកិច្ចការពារសន្តិសុខនុយក្លេអ៊ែរ កិច្ចសហប្រតិបត្តិការនេះបានបង្វែរផលប្រយោជន៍ដោយផ្ទាល់ជូនដល់ប្រជាពលរដ្ឋក្នុងវិស័យសុខាភិបាល។ ឧបករណ៍វេជ្ជសាស្ត្រចល័តសរុបចំនួន ៤ ឈុត ដែលរួមមានម៉ាស៊ីនថតឆ្លុះដោយកាំរស្មីអ៊ិច (X-ray) ចំនួន ២ ឈុត និងម៉ាស៊ីនថតអេកូសាស្ត្រ (Ultrasound) ចំនួន ២ ឈុត ត្រូវបានប្រគល់ជូនរដ្ឋបាលខេត្តពោធិ៍សាត់ ដើម្បីយកទៅប្រើប្រាស់ក្នុងការលើកកម្ពស់គុណភាពសេវាថែទាំសុខភាព និងការពិនិត្យព្យាបាលជំងឺជូនប្រជាពលរដ្ឋនៅក្នុងមូលដ្ឋាន។
សូមជម្រាបថា កិច្ចសហប្រតិបត្តិការរវាងក្រសួងរ៉ែ និងថាមពល ជាមួយទីភ្នាក់ងារ IAEA គឺជាសាក្សីបង្ហាញយ៉ាងច្បាស់ពីការប្តេជ្ញាចិត្តរបស់កម្ពុជា ក្នុងការទាញយកផលប្រយោជន៍ពីបច្ចេកវិទ្យាថាមពលបរមាណូស៊ីវិលដើម្បីអភិវឌ្ឍន៍សង្គមជាតិ។ ការបំពាក់ឧបករណ៍រាវរកសារធាតុវិទ្យុសកម្ម និងបរិក្ខារវេជ្ជសាស្ត្រទំនើបៗនាពេលនេះ មិនត្រឹមតែជួយពង្រឹងសមត្ថភាពការពារសន្តិសុខ និងសុវត្ថិភាពវិទ្យុសកម្មជាតិប៉ុណ្ណោះទេ ប៉ុន្តែថែមទាំងជួយពង្រីកវិសាលភាព និងគុណភាពនៃការថែទាំសុខភាពជូនប្រជាពលរដ្ឋនៅតាមខេត្តឱ្យកាន់តែមានប្រសិទ្ធភាព។ (អានបន្ថែម)
- Video Advertisement -
English 
ខ្មែរ 
