គិតត្រឹមត្រីមាសទី២ ឆ្នាំ២០២៦ កម្ពុជាមានអាងទឹកសរុប ចំនួន១៦៥៩

Proeksa Meas
27 ខែមិថុនា 2026
ព័ត៌មានអចលនទ្រព្យ
100 មើល

រដ្ឋមន្ត្រីក្រសួងធនធានទឹក និងឧតុនិយម ជំរុញឲ្យពន្លឿនការគូសផែនទីហេដ្ឋារចនាសម្ព័ន្ធទឹកសាធារណៈ ដើម្បីការពារតំបន់អភិរក្សរបស់រដ្ឋ និងទប់ស្កាត់ការរំលោភបំពាន

គិតត្រឹមត្រីមាសទី២ ឆ្នាំ២០២៦ អាងទឹកសរុបនៅទូទាំងប្រទេសមានចំនួន១៦៥៩ ក្នុងនោះ ១)បានចុះបញ្ជីរួចរាល់ចំនួន ២៣០ ស្មើនឹងចំនួន ២៨១បណ្ណ។ នេះបើយោងតាមឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ថ្លែងក្នុងឱកាសជាអធិបតីភាពដឹកនាំកិច្ចប្រជុំពិនិត្យវឌ្ឍនភាពការងារចុះបញ្ជីដីអាងស្ដុកទឹកនៅទូទាំងប្រទេស កាលថ្ងៃទី១៧ ខែមិថុនា ឆ្នាំ២០២៦។

ឯកឧត្តម ថោ ជេដ្ឋា បានឱ្យដឹងថា គិតត្រឹមត្រីមាសទី២ ឆ្នាំ២០២៦ អាងទឹកសរុបនៅទូទាំងប្រទេសមានចំនួន១៦៥៩ ក្នុងនោះ ១. បានចុះបញ្ជីរួចរាល់ចំនួន២៣០ ស្មើនឹងចំនួន ២៨១បណ្ណ ២. បានដាក់សំណើសុំការវាស់វែងចំនួន ៤៣៣ កន្លែង ៣. កំពុងដំណើរការវាស់វែងចំនួន ២៤៨ កន្លែង ៤. រង់ចាំទទួលវិញ្ញាបនបត្រសម្គាល់ម្ចាស់អចលនវត្ថុចំនួន ៤៨២កន្លែង និង ៥.មិនទាន់ដាក់សំណើសុំការវាស់វែងចំនួន ២៦៦កន្លែង។

ឯកឧត្តម ក៏បានវាយតម្លៃខ្ពស់ចំពោះភាពជោគជ័យក្នុងការចុះបញ្ជីដីអាងស្ដុកទឹករយៈពេលប្រមាណ ២ឆ្នាំកន្លងមកនេះ ខណៈឯកឧត្តមក៏បានជំរុញ និងពន្លឿនការងារចុះបញ្ជីដីអាងទឹកជាទ្រព្យសម្បត្តិសាធារណៈឱ្យបានឆាប់រហ័ស ដើម្បីបញ្ជាក់ឱ្យបានច្បាស់រវាងដីកម្មសិទ្ធិឯកជន និងដីរដ្ឋ ឬដីអភិរក្សរបស់ក្រសួង។

សូមបញ្ជាក់ថា ក្រសួងធនធានទឹក និងឧតុនិយម កាលពីថ្ងៃទី១២ ខែឧសភា ឆ្នាំ២០២៥ បានចេញសេចក្ដីសម្រេចលេខ ០១៧ សសរ.ធទឧ បង្កើតក្រុមការងារដឹកនាំ និងជំរុញការងារចុះបញ្ជីដីអាងស្ដុកទឹកនិងទំនប់អាងទឹកនៃប្រព័ន្ធធារាសាស្ត្រ ដែលមានក្រុមការងារប្រតិបត្តិតាមបណ្តារាជធានី-ខេត្ត ចំនួន ៤ក្រុម និងមាននាយកដ្ឋានគ្រប់គ្រងនិងអភិរក្សធនធានទឹកជាលេខាធិការដ្ឋាន ដើម្បីជំរុញការចុះបញ្ជីអាងទឹកឱ្យបានត្រឹមត្រូវ ពេញលេញ និងឆាប់រហ័ស ដើម្បីជួយសម្រួល និងគាំទ្រដល់ដំណើរការនៃការទទួលបានវិញ្ញាបនបត្រសម្គាល់ម្ចាស់អចលនវត្ថុ ព្រមទាំងបង្កើតមូលដ្ឋានទិន្នន័យផ្លូវការជាតិសម្រាប់ការគ្រប់គ្រង និងការពារអាងទឹកឱ្យមានចីរភាព និងទប់ស្កាត់ការរំលោភបំពានលើដីអាងទឹក៕