CBRE៖ ទីផ្សារអចលនទ្រព្យធ្លាក់ចុះតិចតួចនៅត្រីមាសទី ១ តែនឹងធ្លាក់យ៉ាងគំហុកចាប់ពីត្រីមាសទី ២

• Sommana Yan
• 15 ខែ​ឧសភា 2020
• ព័ត៌មានអចលនទ្រព្យ
• 62 មើល

ទីផ្សារអចលនទ្រព្យនៅកម្ពុជា ហាក់ដូចជាមានភាពរឹងមាំ នៅដើមឆ្នាំ ២០២០។ បើយោងតាមទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ បានបង្ហាញថាគម្រោងសរុបចំនួន ៧២៨ គម្រោងគិតជាទឹកប្រាក់វិនយោគប៉ាន់ស្មានប្រមាណ ២ ពាន់លានដុល្លារត្រូវបានអនុម័តសម្រាប់រយៈពេល ២ ខែដំបូង។ ចំនួននេះបង្ហាញពីការកើនឡើង ៤៧% បើប្រៀបធៀបទៅនឹងរយៈពេលដូចគ្នាក្នុងឆ្នាំ ២០១៩ ។ ទោះជាយ៉ាងណាក្ដី ស្ថានភាពសេដ្ឋកិច្្ច ក៏ដូចជាស្ថានភាពទីផ្សារមួយនេះ បាន និង កំពុងផ្លាស់ផ្ដូរយ៉ាងស្មានមិនដល់ ក្រោយមានការរីករាលនៃជំងី Covid-19 នៅជុំវិញពិភពលោក ក៏ដូចជានៅប្រទេសកម្ពុជា។

បើតាមរបាយការណ៍ទស្សនវិស័យសេដ្ឋកិច្ចពិភពលោកចុងក្រោយរបស់ IMF បានព្យាករណ៍ថា កំណើនសេដ្ឋកិច្ចសកលនៅឆ្នាំ ២០២០ នឹងធ្លាក់ចុះដល់ -៣% (ដកបី) ដែលនេះជាការធ្លាក់ចុះសេដ្ឋកិច្ចដ៏គំហុកបំផុតចាប់តាំងពីវិបត្តិសេដ្ឋកិច្ចដ៏ធំក្នុងទសវត្សឆ្នាំ ១៩៣០ ក៏ដូចជាវិបត្តិហិរញ្ញវត្ថុឆ្នាំ ២០០៨ ។ ដោយសារផលប៉ះពាល់នេះ ធនាគារពិភពលោក និងធនាគារអភិវឌ្ឍន៍អាស៊ី (ADB) ក៏បានបន្ទាបកំណើនសេដ្ឋកិច្ចរបស់កម្ពុជាត្រឹមតែប្រមាណ ២,៥% សម្រាប់ឆ្នាំ ២០២០។ ការធ្លាក់ចុះនេះ នឹងជះឥទ្ធិពលយ៉ាងខ្លាំងដល់ទីផ្សារអចលនទ្រព្យនៅកម្ពុជា។

ភ្នាក់ងារអចលនទ្រព្យអន្តរជាតិ CBRE Cambodia បានឱ្យដឹងថា ផលអវិជ្ជមានទៅលើទីផ្សារអចលនទ្រព្យនៅកម្ពុជាដែលបង្កដោយជំងឺ Covid-19 ហាក់ដូចជាមិនសូវធ្ងន់ធ្ងរទេសម្រាប់ត្រីមាសទី១។ ដោយឡែក ទីផ្សារនេះរំពឹងថានឹងរងសម្ពាធអវិជ្ជមានយ៉ាងខ្លាំង ចាប់ពីត្រីមាសទី២ តទៅ បើការរាតត្បាតនេះនៅតែបន្ត។ ដោយឡែក ភ្នាក់ងារដដែលនេះ ក៏បានព្យាករណ៍ថាស្ថានភាពទីផ្សារអាចនឹងស្ទុះងើបឡើងវិញនៅចុងឆ្នាំ ២០២០ ឬដើមឆ្នាំ ២០២១ ក្រោមក្ដីសង្ឃឹមថាស្ថានភាពតានតឹងនៃវីរុសនឹងធូរថយជាងមុន ។

សម្រាប់ត្រីមាសទី១ ទីផ្សារ Retail ឬតូបជួលប្រកបអាជីវកម្មក្នុងផ្សារទំនើប គឺជាវិស័យដែលរងផលប៉ះពាល់ខ្លាំងបំផុត ដោយអត្រានៃការជួលធ្លាក់ចុះដល់ទៅ ៩,២ ភាគរយ (សម្រាប់ផ្សារសហគមន៍)។ ការធ្លាក់ចុះនេះគឺដោយសារតែ ប្រជាជនបានចាប់ផ្តើមនៅផ្ទះដើម្បីកាត់បន្ថយការឆ្លងវីរុសCovid-19។ ទន្ទឹមនឹងនេះ ផ្នែកផ្សេងៗទៀត រួមមានលំនៅដ្ឋាន និងការិយាល័យគឺ មានការធ្លាក់ចុះតិចតួចប៉ុណ្ណោះ ដែលមានជាលម្អិតដូចខាងក្រោមនេះ ៖

ខុនដូ
ការផ្គត់ផ្គង់ខុនដូក្នុងត្រីមាសទី១ ឃើញថាមានការកើនឡើង ១៥,៨ ភាគរយ បើប្រៀបធៀបទៅនឹងត្រីមាសមុន ។ ការកើនឡើងនេះគឺដោយសារតែមានគម្រោងចំនួន ៥ ឬស្មើនឹង ២,៨៤៣ យូនីត បានបញ្ចប់ការសាងសង់ក្នុងដើមឆ្នាំនេះ។ គម្រោងដែលទើបតែបញ្ចប់ទាំងនោះ គឺមាន៥៣.៥% គឺជាប្រភេទខុនដូតម្លៃថ្លៃ ៣៥,៧% ជាប្រភេទខុនដូតម្លៃមធ្យម និង ១០,៨% ជាប្រភេទខុនដូតម្លៃសមរម្យ។

គម្រោងទាំងនេះបានជំរុញឲ្យការផ្គត់ផ្គង់សរុបក្នុងទីផ្សារកើនឡើងដល់ ២០ ៨៥១ យូនីត ខណៈដែលខណ្ឌដូនពេញគឺទទួលបានចំណែកធំជាងគេនៃការផ្គត់ផ្គង់ គឺស្មើនឹង ៤៣.៥% ។ ជាមួយគ្នានេះដែរ ក្នុងត្រីមាសទី១ ក៏មានគម្រោងប្រកាសបើកលក់ថ្មីចំនួន ៨ គម្រោង ផងដែរ ដែលនឹងបន្ថែម ការផ្គត់ផ្គង់ចំនួយ ៤ ៥២១ យូនីត ទៀតទៅក្នុងទីផ្សារនាពេលអនាគត។

ដោយឡែក ក្នុងត្រីមាសទី១ ឃើញថាតម្លៃលក់ខុនដូប្រភេទតម្លៃថ្លៃ បានធ្លាក់ចុះ ១,៤% ហើយ តម្លៃលក់ខុនដូប្រភេទតម្លៃមធ្យមបានធ្លាក់ចុះ ០,៥% ។ គួរឱ្យភ្ញាក់ផ្អើលតម្លៃលក់ខុនដូប្រភេទតម្លៃសមរម្យបានកើនឡើងចំនួន 0,៣% ឬស្មើនឹង ១៥៤៩ ដុល្លារអាមេរិកក្នុងមួយម៉ែត្រការ៉េ។ ទន្ទឹមនឹងនេះដែរ តម្លៃជួល ក៏ធ្លាក់ចុះតិចតួច ពោលគឺប្រមាណ ០,៤% សម្រាប់ខុនដូប្រភេទតម្លៃថ្លៃ និង ០,៦% សម្រាប់ខុនដូប្រភេទតម្លៃមធ្យម ឬស្មើនឹង ១៤,២ ដុល្លារ / ម៉ែត្រការ៉េសម្រាប់ខុនដូប្រភេទតម្លៃថ្លៃ និង ១១,៨ ដុល្លារ / ម៉ែត្រការ៉េសម្រាប់ខុនដូប្រភេទតម្លៃមធ្យម ។

បូរី
នៅត្រីមាសទី ១ ឆ្នាំ ២០២០ មានគម្រោងចំនួន ៣ ដែលបានបញ្ចប់ការសាងសង់ ដែលស្ថិតនៅខណ្ឌមានជ័យ និងខណ្ឌច្បារអំពៅ ដែលធ្វើឲ្យខណ្ឌទាំង២ នេះមានការផ្គត់ផ្គង់សរុប ៤៩ គម្រោង។ ដោយឡែក ខណ្ឌសែនសុខនៅតែជាខណ្ឌឈានមុខគេសម្រាប់ទីផ្សារផ្គត់ផ្គង់បូរី ហើយខណ្ឌពោធិសែនជ័យ ជាខណ្ឌដែលកំពុងបង្ហាញពីសក្តានុពលផងដែរ។

ទោះបីជាមានការព្រួយបារម្ភអំពីការផ្ទុះឡើងនៃជំងឺ Covid-19 ក្ដី នៅត្រីមាសទី ១ អ្នកអភិវឌ្ឍន៍ក្នុងស្រុកនៅតែមានទំនុកចិត្តក្នុងការវិនិយោគលើផ្នែកនេះ ដោយឃើញថាមានការប្រកាសបើកលក់គម្រោងថ្មីៗចំនួន ៥ ដោយអ្នកអភិវឌ្ឍន៍ធំ ៗ ចំនួន ៣ រួមមានបុរី ប៉េងហួត ជីប ម៉ុង លែន និងបុរីជារី។

បើប្រៀបធៀបទៅនឹងត្រីមាសទី ៣ ឆ្នាំ ២០១៩ តម្លៃលក់ក្នុងត្រីមាសទី ១ បូរីប្រភេទផ្សេងៗដូចជា វីឡា វីឡាភ្លោះ ហាង ផ្ទះគូ និងផ្ទះល្វែង បានកើនឡើងចន្លោះពី ២,១% ទៅ ៤,៨% ។ CBRE រំពឹងថាតម្លៃលក់នឹងនៅតែរឹងមាំក្នុងរយៈពេល ៦ ខែទៀត ដែលជំរុញដោយស្ថានភាពរឹងមាំករបស់អ្នកអភិវឌ្ឍក្នុងស្រុក។ ទោះយ៉ាងណាក៏ដោយ CBRE ក៏បានអះអាងផងដែរថា តម្លៃលក់អាចចាប់ផ្តើមធ្លាក់ចុុះក្នុងត្រីមាសទី ៣ ដែលបណ្តាលមកពីភាពតានតឹងនៃលំហូរសាច់ប្រាក់ ដែលបង្កដោយការរាតត្បាតនៃជំងឺCovid-19 ។

ការិយាល័យ
ក្នុងអំឡុងត្រីមាសទី ១ នៃឆ្នាំ ២០២០ នេះ ឃើញថាមិនមានការបញ្ចប់ការសាងសង់ ឬការបើកលក់ការិយាល័យថ្មី នោះទេ។ ទោះយ៉ាងណាក្ដី CBRE បានព្យាករណ៍ថា ការផ្គត់ផ្គង់ការិយាល័យនឹងមានការកើនឡើងដល់ទៅជាង ៨៩ ០០០ ម៉ែត្រការ៉េ នៅចុងឆ្នាំ ២០២០ ដែលភាគច្រើននឹងជាលំដាប់ថ្នាក់ B ហើយនឹងមានទីតាំងនៅខាងក្រៅមណ្ឌលពាណិជ្ជកម្មកណ្តាល។

អត្រានៃការជួលជាមធ្យមបានឃើញការធ្លាក់ចុះប្រមាណត្រឹមតែ ១% បើប្រៀបធៀបទៅនឹងត្រីមាសមុន ដែលបង្ហាញថាវិស័យនេះនៅតែរឹងមាំ។ ទោះយ៉ាងណា អត្រានៃការជួលការិយាល័យ ត្រូវបានប៉ាន់ប្រមាណថានឹងបន្តធ្លាក់ចុះជាបន្តបន្ទាប់ ក្នុងឆ្នាំ២០២០ នេះ។

ថ្វីបើមានជំងឺរាតត្បាត Covid-19 ក៏ដោយ តម្លៃជួលបច្ចុប្បន្ន ក៏ដូចជាក្នុងត្រីមាសទី ១ គឺនៅមានស្ថេរភាព ប៉ុន្តែក្នុងពេលឆាប់នេះ ម្ចាស់ការិយាល័យខ្លះអាចនឹងចាប់ផ្ដើមបញ្ចុះតម្លៃជួលក្នុងរយៈពេលខ្លី ដោយសារតែអ្នកជួលមានអំណាចក្នុងការចរចាខ្ពស់។ លើសពីនេះ CBRE ក៏បានព្យាករណ៍ថាតម្លៃជួល ក៏អាចនឹងធ្លាក់ចុះ ចាប់ពីត្រីមាសទី ២ តទៅ ផងដែរ។

ដូចគ្នានេះដែរ ក្នុងអំឡុងត្រីមាសទី ១ នៃឆ្នាំ ២០២០ នេះ គឺមិនមានអគារការិយាល័យប្រភេទ Strat-title ដែលបញ្ចប់ការសាងសង់ថ្មីនោះទេ។ ដោយឡែក ឃើញថាមានគម្រោង Central Capital Tower នៅខណ្ឌទួលគោក ទើបតែប្រកាសបើកលក់(ឬជួល) ដែលគម្រោងនេះនឹងបន្ថែមផ្ទៃក្រឡាការផ្គត់ផ្គង់ប្រមាណ ២៤.៨០០ ម៉ែត្រក្រឡា ទៅក្នុងទីផ្សារមួយនេះ។ លើសពីនេះ នៅចុងឆ្នាំ ២០២០ នេះ CBRE ក៏រំពឹងថានឹងមានផ្ទៃក្រឡាការផ្គត់ផ្គង់សរុបប្រមាណ ៨៦ ០០០ ម៉ែតការ៉េ ដែលនេះនឹងដាក់សម្ពាធទៅលើតម្លៃជួលកាន់តែខ្លាំង។

ទីផ្សារ Retail ឬតូបជួលប្រកបអាជីវកម្មក្នុងផ្សារទំនើប

ក្នុងអំឡុងត្រីមាសទី ១ នៃឆ្នាំ ២០២០ នេះ ឃើញថាមានផ្សារទំនើបពីររួមមាន ផ្សារ TL Sky Mall និង Samai Square បានបញ្ចប់ការសាងសង់ ដែលបន្ថែមការផ្គត់ផ្គង់ថ្មីចំនួយ ៦ ៩០៣ ម៉ែត្រការ៉េ ទៅក្នុងទីផ្សារផ្សារទំនើបបែបសហគមន៍។ តួលេខនេះ គឺស្មើនឹង ២,១% នៃទីផ្សារ Retail ទាំងមួល ឬ ១៦ ភាគរយនៃទីផ្សារផ្សារទំនើបបែបសហគមន៍។ CBRE ក៏បានព្យករណ៍ទៀតថា គម្រោងទីផ្សារ Retail ទំហំ ១០១ ៤៧៧ ម៉ែត្រការ៉េ ទៀតគ្រោងនឹងបញ្ចប់ការសាងសង់ នៅចុងឆ្នាំ ២០២០ នេះ។

ទោះយ៉ាងណាក៏ដោយ ក៏អាចមានការពន្យារពេលក្នុងការបើកឲ្យដំណើរការ ដែលបណ្តាលមកពីបញ្ហាខ្សែសង្វាក់ផ្គត់ផ្គង់នៅក្នុងវិស័យសំណង់ និងការកាត់បន្ថយសកម្មភាពរបស់អ្នកលក់រាយ ដោយសារតែការកើនឡើងនៃការរីករាលដាលនៃមេរោគ Covid-19 ។

គួរបញ្ជាក់ផងដែរថា ទីផ្សារ Retail ជាទីផ្សារដែលរងផលប៉ះពាល់ខ្លាំងបំផុត ដោយសារតែការធ្លាក់ចុះនៃអ្នកដើរផ្សារទំនើប ដែលបណ្តាលមកពីការភ័យខ្លាចនៃជំងឺរាតត្បាត Covid-19។ ដូច្នេះ ថ្លៃជួលក៏មានការធ្លាក់ចុះយ៉ាងខ្លាំងផងដែរ ពោលគឺធ្លាក់ចុះប្រមាណ ៩,២% សម្រាប់ថ្លៃជួលតាមផ្សារសហគមន៍ និង ១០,៥% សម្រាប់ថ្លៃជួលប្រភេទRetail Podium នៅត្រីមាសទី ១ នេះ។

—-
សរុបមក ឃើញថាវិស័យអចនទ្រព្យជាច្រើនបាន និងកំពុងរងផលប៉ះពាល់អវិជ្ជមានពីការរាតត្្បាតនៃមេរោគ Covid-19 ។ ដោយឡែក ទីផ្សាររំពឹងថាអាចនឹងស្ទុុះមករស់រានមានជីវិតឡើងវិញ ក្រោយស្ថានភាពមេរោគដ៏កាចសាហាវនេះប្រសើរឡើង ដែលរំពឹងថាអាចនឹងដើមឆ្នាំ ២០២១។

ដោយឡែកក្នុងស្ថានភាពបែបនេះ ក៏នៅតែមានឱកាសសម្រាប់វិនិយោគិនផងដែរ។ នាយកគ្រប់គ្រងក្រុមហ៊ុន CBRE កម្ពុជា អ្នកនាង អាន សុធីតា បានឲ្យដឹងថា ក្នុងរយៈពេលនេះវិនិយោគិនមានអំណាចក្នុងការចរចារខ្ពស់ ដែលអាចឲ្យពួកគេទិញអចលនទ្រព្យក្នុងតម្លៃទាប។

«អ្នកទិញអាចទទួលបានអចលនទ្រព្យទាបជាងតម្លៃទីផ្សារ នៅក្នុងអំឡុងពេលនេះ ព្រោះអ្នកអភិវឌ្ឍន៍មាននិន្នាការលក់ទ្រព្យសម្បត្តិដើម្បីរក្សាលំហូរសាច់ប្រាក់របស់ពួកគេ។ ទោះយ៉ាងណាអ្នកទិញត្រូវតែប្រយ័ត្នប្រយែងបំផុតក្នុងការជ្រើសរើសប្រភេទអចលនទ្រព្យក៏ដូចជាក្រុមហ៊ុនអភិវឌ្ឍន៍» អ្នកនាងបានបន្ត។