គម្រោងសាងសង់ស្ពានឆ្លងទន្លេបាសាក់ ចាក់អង្រែក្រោម-ព្រែកប្រា សម្រេចបាន ៧៣% ហើយ គិតត្រឹមដំណាច់ខែឧសភា ឆ្នាំ២០២៦

Proeksa Meas
4 ខែមិថុនា 2026
ព័ត៌មានសំណង់
431 មើល

គម្រោងស្ថាបនាស្ពានឆ្លងទន្លេបាសាក់ តភ្ជាប់ពីតំបន់ចាក់អង្រែក្រោមទៅកាន់ព្រែកប្រា បានបោះជំហានទៅមុខយ៉ាងរលូន ដោយសម្រេចបានវឌ្ឍនភាពការងារសសរុបប្រមាណ ៧៣% ហើយ គិតត្រឹមដំណាច់ខែឧសភា ឆ្នាំ២០២៦ នេះ។ កាលពីថ្ងៃទី១ ខែមិថុនា ឆ្នាំ២០២៦ ឯកឧត្តម សួង ហេង រដ្ឋលេខាធិការ និងជានាយកគម្រោង បានដឹកនាំក្រុមការងារចុះពិនិត្យតាមដានការអនុវត្តគម្រោងដោយផ្ទាល់ ព្រមទាំងបានពិនិត្យការបញ្ចប់ការដឹកជញ្ជូនធ្នឹមស្ពានពីត្រើយខាងលិចទៅត្រើយខាងកើត។ សមិទ្ធផលដ៏សំខាន់នេះបានបង្ហាញពីការខិតខំប្រឹងប្រែងយ៉ាងខ្លាំង បន្ទាប់ពីគម្រោងហេដ្ឋារចនាសម្ព័ន្ធមួយនេះបានប្រកាសបើកការដ្ឋានសាងសង់ជាផ្លូវការកាលពីថ្ងៃទី១៩ ខែកុម្ភៈ ឆ្នាំ២០២៤ កន្លងទៅ។

បើពិនិត្យលើវឌ្ឍនភាពលម្អិតនៃផ្នែកនីមួយៗ គម្រោងនេះកំពុងដំណើរការទៅតាមផែនការបច្ចេកទេសយ៉ាងហ្មត់ចត់។ ក្នុងនោះ ១). ផ្នែកគ្រឹះស្ពាន សម្រេច ១០០% ២). រចនាសម្ព័ន្ធក្រោមស្ពានសម្រេចបាន១០០ % ៣). រចនាសម្ព័ន្ធលើនៃស្ពានតភ្ជាប់ សម្រេចបាន១០០% ៤). រចនាសម្ព័ន្ធលើនៃស្ពានមេ សម្រេចបាន៦៧,៣០% (ធ្នឹមប្រអប់ខាងស្តាំដៃ ចំនួន៤៩កង់ សម្រេចបាន ៣៦កង់ និង ធ្នឹមប្រអប់ខាងឆ្វេងដៃ ចំនួន៤៩កង់ សម្រេចបាន ៣០កង់) និង ៥).បណ្តាញផ្លូវសម្រេចបាន ៤៨,៤ % (តភ្ជាប់ ប្រវែង ៨០៤,៣០ម. សម្រេចបាន ៥០% និងផ្លូវបង្វែរទិស( Ram) ប្រវែង ១,៥៤ម. សម្រេចបាន ៤៦%)។

នាពេលបច្ចុប្បន្ន ការដឹកជញ្ជូនធ្នឹមស្ពានពីត្រើយខាងលិចទៅត្រើយខាងកើតចំនួន ៩៦ ដើម ត្រូវបានបញ្ចប់ជាស្ថាពរ ហើយក្រុមជាងជំនាញកំពុងតែមមាញឹកក្នុងការចាក់បេតុងតភ្ជាប់មុខតំណធ្នឹមទាំងនោះ។ ក្រុមការងារក្រសួងបានវាយតម្លៃ និងកោតសរសើរខ្ពស់ចំពោះក្រុមហ៊ុនសំណង់សៀងហៃ ដែលបានអនុវត្តការងារទាំងឡាយប្រកបដោយការទទួលខុសត្រូវខ្ពស់ គោរពតាមបទដ្ឋានបច្ចេកទេស និងកិច្ចសន្យាបានត្រឹមត្រូវ ដើម្បីធ្វើឱ្យសំណង់ទាំងមូលមានគុណភាពរឹងមាំ និងមានសោភ័ណភាពស្រស់ស្អាត។ ទន្ទឹមនឹងការរីកចម្រើននេះ អង្គភាពគ្រប់គ្រងគម្រោងក៏បានយកចិត្តទុកដាក់ខ្ពស់លើការពង្រឹងសុវត្ថិភាពការងារ ដោយសារតែបច្ចុប្បន្នជារដូវវស្សាដែលទឹកទន្លេចាប់ផ្តើមឡើងខ្ពស់ ដោយក្រុមការងារបានបន្តថែទាំ និងបំពាក់បន្ថែមនូវពោងសុវត្ថិភាពលើផ្ទៃទឹក ដើម្បីធានាសុវត្ថិភាពដាច់ខាតដល់ប្រជាពលរដ្ឋដែលធ្វើដំណើរតាមផ្លូវទឹក។

សូមរំឭកផងដែរថា ស្ពានឆ្លងកាត់ទន្លេបាសាក់ ចាក់អង្រែក្រោម-ព្រែកប្រា នេះ គឺជាស្ពានទី៧ ហើយដែលត្រូវបានស្ថាបនាឡើងតាមបណ្តោយដងទន្លេបាសាក់ បន្ទាប់ពីស្ពានដែលបានសង់រួចទាំង ៦ រួមមាន ស្ពានឆ្លងកោះពេជ្រទៅកោះនរា ស្ពានព្រះមុនីវង្សទាំង២ ស្ពានសំរោង ស្ពានកោះអន្លង់ចិន និងស្ពានកោះធំ។ (អានបន្ថែម)