JICA ផ្តល់ជំនួយសង់រោងចក្រទឹកស្អាតដ៏ធំមួយក្នុងសង្កាត់និរោធ ដែលគ្រោងសង់ក្នុងឆ្នាំ ២០២៦

Sommana Yan
3 ខែកុម្ភៈ 2023
ព័ត៌មានក្នុងស្រុក
107 មើល

កម្ពុជា នឹងមានរោងចក្រទឹកស្អាតនិរោធជំហានទី៣ ដែលមានសមត្ថភាពផលិតទឹកបានរហូត ១៣០ពាន់ម៉ែត្រគីបក្នុងមួយថ្ងៃ ខណៈរោងចក្រនេះ ក៏គ្រោងនឹងបើកការដ្ឋានសាងសង់នៅក្នុងឆ្នាំ ២០២៦ខាងមុខនេះផងដែរ។ នេះបើតាមពិធីចុះហត្ថលេខាលើកំណត់ប្រជុំពិភាក្សា ស្តីពីការរៀបចំសិក្សាសមិទ្ធិលទ្ធភាព របស់គម្រោងពង្រីកប្រព័ន្ធផ្គត់ផ្គង់ទឹកស្អាតនិរោធ រវាងរដ្ឋាករទឹកស្វយ័តក្រុងភ្នំពេញ និង JICA កាលថ្ងៃទី២ ខែកុម្ភៈ។

ឯកឧត្តម ឡុង ណារ៉ូ អគ្គនាយករដ្ឋាករទឹកស្វយ័តក្រុងភ្នំពេញ បានឱ្យដឹងថា រោងចក្រទឹកស្អាតនិរោធជំហានទី៣ ស្ថិតក្រោមគម្រោងហិរញ្ញប្បទានរបស់ទីភ្នាក់ងារសហប្រតិបត្តិការអន្តរជាតិជប៉ុន (JICA) ដើម្បីជំរុញការផ្គត់ផ្គងតំបន់ភាគខាងកើត និងខាងត្បូងរាជធានីភ្នំពេញ និងមួយផ្នែកទៀត ចែកចាយទៅខេត្តកណ្តាល។

ឯកឧត្តមបន្តថា៖«គម្រោងពង្រីករោងចក្រនេះ នឹងចាប់ផ្តើមសិក្សាចាប់ពីខែមេសា ឆ្នាំ២០២៣ និងគ្រោងបញ្ចប់ការសិក្សានៅដើមឆ្នាំ ២០២៤ ដើម្បីឈានទៅចាប់ផ្តើមសាងសង់រោងចក្រ នៅឆ្នាំ២០២៦ និងបញ្ចប់ការសាងសង់នៅឆ្នាំ ២០២៩»។

ឯកឧត្តមបញ្ជាក់ដែរថា នៅពេលរោងចក្រនេះសាងសង់រួច នឹងជំរុញការតភ្ជាប់ទឹកស្អាតទៅតំបន់ជាយក្រុង និងធានាដល់ការផ្គត់ផ្គងទឹកឱ្យបានតាមផែនការកំណត់នៅឆ្នាំ២០៣០ ពោលគឺត្រូវផលិតទឹកឱ្យបាន ១លាន៨សែនម៉ែត្រគូប ក្នុងមួយថ្ងៃ ដើម្បីធ្វើឱ្យប្រជាជនមានទឹក ប្រើប្រាស់គ្រប់គ្រាន់។

គួរបញ្ជាក់ដែថា គិតមកដល់ពេលនេះ រោងចក្រផលិតទឹកស្អាតនិរោធ បានសាងសង់រួចទាំងជំហានទី១ និងជំហានទី២ ក្នុងនោះ រោងចក្រផលិតទឹកស្អាតនិរោធជំហានទី១ បានផលិតទឹកស្អាតបានចំនួន១៣ម៉ឺនម៉ែត្រគីបក្នុងមួយថ្ងៃ ខណៈជំហានទី២ មានសមត្ថភាពផលិតទឹកស្អាតដូចជំហានទី១ដែរ៕

- Video Advertisement -