រដ្ឋជំរុញឱ្យវិស័យសំណង់កម្ពុជាប្រែក្លាយជាឧស្សាហកម្មបង្កើនចរន្តសេដ្ឋកិច្ច និងលើកកម្ពស់គុណភាពរស់នៅ

Proeksa Meas
25 ខែកញ្ញា 2026
ព័ត៌មានសំណង់
294 មើល

ថ្នាក់ដឹកនាំក្រសួងដែនដី នគរូបនីយកម្ម និងសំណង់ សង្កត់ធ្ងន់លើការអនុវត្តច្បាប់ស្ដីពីសំណង់ ការរៀបចំប្លង់គោល និងប្រព័ន្ធត្រួតពិនិត្យបច្ចេកទេស ដើម្បីធានាសុវត្ថិភាព គុណភាព និងសុខុមាលភាពរបស់អ្នករស់នៅ

រាជធានីភ្នំពេញ៖ ការអភិវឌ្ឍវិស័យសំណង់ និងអចលនទ្រព្យប្រកបដោយចីរភាព នៅតែជាសសរស្ដម្ភដ៏សំខាន់មួយក្នុងការទ្រទ្រង់កំណើនសេដ្ឋកិច្ចជាតិ និងការលើកកម្ពស់ជីវភាពរស់នៅរបស់ប្រជាពលរដ្ឋកម្ពុជា។ តាមរយៈសិក្ខាសាលា កាលពីថ្ងៃទី១០ ខែកញ្ញា ឆ្នាំ២០២៦ ក្រសួងរៀបចំដែនដី នគរូបនីយកម្ម និងសំណង់ បានរៀបចំសិក្ខាសាលាស្តីពី «ការលើកកម្ពស់ការយល់ដឹងច្បាប់ស្តីពីសំណង់ និងប្រព័ន្ធត្រួតពិនិត្យ និងបញ្ជាក់សំណង់» ដើម្បីពង្រឹងការយល់ដឹងផ្នែកច្បាប់ បច្ចេកទេស និងស្តង់ដារសុវត្ថិភាពដល់ភាគីពាក់ព័ន្ធ។

នៅក្នុងឱកាសនោះ ថ្នាក់ដឹកនាំក្រសួងរៀបចំដែនដី នគរូបនីយកម្ម និងសំណង់ បានគូសបញ្ជាក់យ៉ាងច្បាស់ថា វិស័យសំណង់នៅកម្ពុជាត្រូវតែបន្តពង្រឹងគុណភាព និងប្រែក្លាយខ្លួនទៅជាឧស្សាហកម្មមួយដែលមានលក្ខណៈជាការបង្កើតលំហូរថវិកានិងចរន្តសេដ្ឋកិច្ចពិតប្រាកដជូនប្រជាពលរដ្ឋ។ ការអភិវឌ្ឍវិស័យនេះមិនត្រឹមតែផ្តោតលើទិដ្ឋភាពសេដ្ឋកិច្ច និងការរីកចម្រើនខាងហេដ្ឋារចនាសម្ព័ន្ធរូបវន្តប៉ុណ្ណោះទេ ប៉ុន្តែថែមទាំងត្រូវយកចិត្តទុកដាក់ខ្ពស់បំផុតលើការរៀបចំប្លង់គោល ឯកទេសបច្ចេកទេសសាងសង់ និងការលើកកម្ពស់គុណភាពជីវិតរបស់អ្នករស់នៅក្នុងសំណង់ទាំងនោះឱ្យមានសុវត្ថិភាព និងផាសុកភាព។

អង្គសិក្ខាសាលាក៏បានផ្តោតលើការប្រកាស និងពន្យល់ពីយន្តការនៃប្រព័ន្ធត្រួតពិនិត្យ និងបញ្ជាក់សំណង់ ដែលជាឧបករណ៍យុទ្ធសាស្ត្រក្នុងការធានាថា រាល់ការសាងសង់ទាំងអស់ត្រូវបានអនុវត្តស្របតាមបទដ្ឋានបច្ចេកទេស និងលិខិតបទដ្ឋានគតិយុត្តជាធរមាន។ ការពង្រឹងយន្តការនេះ នឹងជួយបង្កើនទំនុកចិត្តដល់វិនិយោគិន បង្កើនសុវត្ថិភាពផ្នែកវិស្វកម្ម និងកាត់បន្ថយហានិភ័យផ្សេងៗដែលគ្របដណ្តប់លើសំណង់អាគារនៅទូទាំងប្រទេស។

សូមជម្រាបថា ការដាក់ចេញនូវទិសដៅយុទ្ធសាស្ត្រក្នុងការប្រែក្លាយវិស័យសំណង់ឱ្យទៅជាឧស្សាហកម្មបង្កើតលំហូរថវិកា និងការរៀបចំប្រព័ន្ធត្រួតពិនិត្យបច្ចេកទេសយ៉ាងម៉ឺងម៉ាត់ គឺជា ជំហានដ៏សំខាន់ក្នុងការធ្វើទំនើបកម្មវិស័យសំណង់ និងអចលនទ្រព្យនៅកម្ពុជា។ ការផ្តល់អាទិភាពលើប្លង់គោល និងគុណភាពជីវិតរបស់អ្នករស់នៅ នឹងមិនត្រឹមតែជួយការពារសុវត្ថិភាព និងទ្រព្យសម្បត្តិរបស់ប្រជាពលរដ្ឋប៉ុណ្ណោះទេ ប៉ុន្តែថែមទាំងរុញច្រានការអភិវឌ្ឍទីក្រុងប្រកបដោយចីរភាព និងបរិយាបន្ន។