អគារវះកាត់ថ្មី នៃមន្ទីរពេទ្យកុមារជាតិ តម្លៃជាង ៥លានដុល្លារ ចាប់ផ្តើមសាងសង់ជាផ្លូវការ

Proeksa Meas
24 ខែមិថុនា 2026
ព័ត៌មានសំណង់
257 មើល

ដោយមានការគាំទ្រពីជំនួយមនុស្សធម៌អន្តរជាតិ អគារទំនើបបួនជាន់នេះនឹងធ្វើឱ្យការថែទាំកុមារកាន់តែទំនើប និងពង្រីកការទទួលបានសេវាថែទាំសុខភាពនៅខែសីហា ឆ្នាំ២០២៧…

អគារវះកាត់ថ្មី ឬផ្នែកសល្យសាស្រ្តកុមារនៃមន្ទីរពេទ្យកុមារជាតិ បានចាប់ផ្តើមបើកការដ្ឋានសាងសង់ជាផ្លូវការហើយ កាលទី១៥ ខែមិថុនា ឆ្នាំ២០២៦ ក្រោមអធិបតីភាពឯកឧត្តម ឈាង រ៉ា រដ្ឋមន្ត្រីក្រសួងសុខាភិបាល និងលោក Tai MZ. Benjamin ប្រធានប្រចាំតំបន់អាស៊ីនៃសមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ។

ឯកឧត្តម ឈាង រ៉ា បញ្ជាក់ថា អគារសល្យសាស្រ្តកុមារនៃមន្ទីរពេទ្យកុមារជាតិ គឺជាជំនួយរបស់សមាគមនិកាយសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ។ ឯកឧត្តមថា អគារនេះ នឹងជួយពង្រឹងចក្ខុវិស័យរួមមួយគឺ៖ កម្ពុជាដែលកុមារគ្រប់រូបអាចទទួលបានការថែទាំព្យាបាលវះកាត់ប្រកបដោយសុវត្ថិភាព គុណភាពខ្ពស់ និងទាន់ពេលវេលា។ រួមគ្នាដើម្បីសុខភាពកុមារ គឺរួមគ្នាដើម្បីអនាគតកម្ពុជា។

សូមបញ្ជាក់ថា អគារសល្យសាស្រ្តកុមារនៃមន្ទីរពេទ្យកុមារជាតិ ដែលត្រូវសាងសង់នាពេលនេះ មានទំហំ ៣.២៨៧ ម៉ែត្រការ៉េ បណ្តោយ ២៩.៩ម៉ែត្រ ទទឹង២៣.៦ម៉ែត្រ កម្ពស់ ២០.៤ ម៉ែត្រ កម្ពស់៤ជាន់ (ទាំងជាន់ផ្ទាល់ដី) រួមទាំងការបំពាក់សម្ភារៈបរិក្ខារចាំបាច់ ដែលសរុបជាទឹកប្រាក់ចំនួន ៥,២លានដុល្លារអាមេរិក គ្រោងនឹងបញ្ចប់ការសាងសង់នៅខែសីហា ឆ្នាំ២០២៧ ក្នុងគម្រោងពង្រឹងសមត្ថភាពផ្នែកវះកាត់នៃមន្ទីរពេទ្យកុមារ។ តាមរយៈអាគារនេះ នឹងក្លាយជាការធ្វើនវានុវត្តន៍បន្ថែមទៀត ក្នុងការបម្រើសេវាសុខភាព ប្រកបដោយគុណភាព ទំនើបកម្មបរិក្ខារពេទ្យ និងសេវាកម្ម សំដៅធ្វើឱ្យប្រសើរឡើងសុខភាពកុមារ និងសុខុមាលភាពប្រជាជនកម្ពុជា។

ថ្មីៗនេះ តាមរយៈជំនួយឥតសំណងរបស់សាធារណរដ្ឋកូរ៉េ ក៏បានបើកការដ្ឋានសាងសង់នូវអគារមិត្តភាពកម្ពុជា-កូរ៉េ អគារទី២ នៃមន្ទីរពេទ្យកុមារជាតិ ដែលមានតម្លៃជិត ១៧លានដុល្លាអាម៉េរិក នេះផងដែរ៕ (អានបន្ថែម)