ប្រព័ន្ធផ្គត់ផ្គង់ទឹកស្អាតខេត្តបាត់ដំបង តម្លៃជិត ៣២លានដុល្លារ សម្ពោធដាក់ឱ្យដំណើរការហើយ

Proeksa Meas
7 ខែឧសភា 2026
ព័ត៌មានសំណង់
533 មើល

ប្រព័ន្ធផ្គត់ផ្គង់ទឹកស្អាតថ្មីមួយ ក្នុងក្រុងបាត់ដំបង តម្លៃ ៣១,៧៧លានដុល្លារអាម៉េរិក ត្រូវបានដាក់សម្ពោធ ឱ្យដំណើរការជាផ្លូវការ កាលថ្ងៃទី៣០ ខែមេសា ឆ្នាំ២០២៦ ក្រោមអធិបតីភាពឯកឧត្តម ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្ត រួមជាមួយឯកឧត្តម សុខ លូ អភិបាលនៃគណៈអភិបាលខេត្ត បាត់ដំបង និងតំណាងធនាគារអភិវឌ្ឍន៍អាស៊ី (ADB) ប្រចាំកម្ពុជា។

ឯកឧត្តមអភិបាលខេត្តបានឱ្យដឹងថា ស្ថានីយបូមទឹកឆៅនេះមានសមត្ថភាពបូម ៥៥.០០០ម៉ែត្រគូបក្នុងមួយថ្ងៃ ប្រព័ន្ធប្រព្រឹត្តកម្មទឹកស្អាតដែលមានសមត្ថភាពផលិត ៥០.០០០ម៉ែត្រគូបក្នុងមួយថ្ងៃ បណ្តាញទុយោដែកបូមទឹកឆៅទៅរោងចក្រប្រវែង ១,១៣គីឡូម៉ែត្រ បណ្ដាញទុយោដែកបង្ហូរពីរោងចក្រទៅស្ទឹងវិញប្រវែង ១,១៣គីឡូម៉ែត្រ បណ្តាញទុយោខ្មៅចែកចាយទឹកស្អាតប្រវែងសរុប ៩៤គីឡូម៉ែត្រ។

ឯកឧត្តមបន្តថា ស្ថានីយនេះមានកម្លាំងផលិត និងចែកចាយទឹកស្អាតដោយរោងចក្រប្រព្រឹត្តកម្មទឹកស្អាតថ្មីនេះចំនួន ៨៣.៥២០ម៉ែត្រគូបក្នុងមួយថ្ងៃ ប្រវែងបណ្តាញទឹកស្អាត ៩២៦គីឡូម៉ែត្រ ចំនួនតំណសរុប ៤៣.៩៦២តំណ ចំនួនប្រជាជនទទួលបានសេវាទឹកស្អាត ២១៩.៨១០គ្រួសារ អត្រាគ្របដណ្តប់ក្នុងតំបន់សេវាកម្ម៩៤% អត្រាប្រជាជនទទួលបានទឹកស្អាត ៨៩% អត្រាខ្នងផ្ទះបានភ្ជាប់បណ្ដាញទឹកស្អាតក្នុងតំបន់សេវាកម្ម ៨២% និងអត្រាទឹកបាត់បង់ ៨,៤៥%។

ជាមួយគ្នានេះ ឯកឧត្តម ហែម វណ្ណឌី បានប្រសាសន៍ថា គម្រោងផ្គត់ផ្គង់ទឹកស្អាត និងអនាម័យខេត្តបានជួយពង្រីកសមត្ថភាពប្រព័ន្ធផ្គត់ផ្គង់ទឹកស្អាតខេត្តបាត់ដំបង ដើម្បីជាគុណប្រយោជន៍ដល់ប្រជាជនកម្ពុជា។

សូមជម្រាបដែរថា ប្រព័ន្ធផ្គត់ផ្គង់ទឹកស្អាតថ្មីនេះចំណាយថវិកាសរុបប្រមាណ ៣១,៧៧ លានដុល្លារអាមេរិក ដែលជាគម្រោងសហហិរញ្ញប្បទានពីធនាគារអភិវឌ្ឍន៍អាស៊ី ទីភ្នាក់ងារបារាំងសម្រាប់ការអភិវឌ្ឍ និងថវិកាបដិភាគរបស់រាជរដ្ឋាភិបាលកម្ពុជា៕ (អានបន្ថែម)