គម្រោងអភិវឌ្ឍន៍មជ្ឈមណ្ឌលព័ស្តុភារកម្មថ្មីមួយ ទំហំ៤៩ហិចតា នឹងលេចរូបរាងនៅខេត្តព្រះសីហនុ

Proeksa Meas
31 ខែមីនា 2026
ព័ត៌មានសំណង់
518 មើល

មន្ត្រីរដ្ឋាភិបាល និងអ្នកវិនិយោគ ជួបជុំគ្នាដើម្បីបង្ហាញដំណាក់កាលដំបូងនៃមជ្ឈមណ្ឌលព័ស្តុភារកម្មក្រុងព្រះសីហនុ ដែលមានគោលបំណងជំរុញការប្រកួតប្រជែងជាសកលរបស់កម្ពុជា

គម្រោងអភិវឌ្ឍន៍មជ្ឈមណ្ឌលព័ស្តុភារកម្មក្រុងព្រះសីហនុ(SHV-LC) ដែលជាគំនិតផ្តួចផ្តើមថ្មីមួយរបស់រាជរដ្ឋាភិបាលកម្ពុជា នឹងលេចរូបរាងនៅលើផ្ទៃដីទំហំប្រមាណ៤៩ហិកតា នាពេលឆាប់ខាងមុខនេះ។

នេះបើយោងតាមសន្និសីទអ្នកវិនិយោគសម្រាប់គម្រោងអភិវឌ្ឍន៍មជ្ឈមណ្ឌលព័ស្តុភារកម្មក្រុងព្រះសីហនុ(SHV-LC) ក្រោមអធិបតីភាព ឯកឧត្តម ហេង ណន រដ្ឋលេខាធិការ នៃក្រសួងសាធារណការ និងដឹកជញ្ជូន និង ឯកឧត្តម មាស សុខសេនសាន រដ្ឋលេខាធិការ នៃក្រសួងសេដ្ឋកិច្ចនិងហិរញ្ញវត្ថុ

រួមទាំងលោក ឡុង ឌីម៉ង់ អភិបាលរងខេត្តព្រះសីហនុ កាលថ្ងៃទី២៣ ខែមីនា ឆ្នាំ២០២៦។

លោក ឡុង ឌីម៉ង់ អភិបាលរងខេត្តព្រះសីហនុ បានឱ្យដឹងថា គម្រោងអភិវឌ្ឍន៍មជ្ឈមណ្ឌលព័ស្តុភារកម្មក្រុងព្រះសីហនុ(SHV-LC) នេះ ជាគំនិតផ្តួចផ្តើមរបស់រាជរដ្ឋាភិបាលកម្ពុជា នឹងត្រូវបានអភិវឌ្ឍជំហានដំបូងនៅលើផ្ទៃដីទំហំប្រមាណ៤៩ហិកតា ក្រោមយន្តការភាពជាដៃគូរវាងរដ្ឋនិងឯកជន (PPP)។

គម្រោងនេះ នឹងចូលរួមជំរុញ និងបង្កើនប្រសិទ្ធភាពព័ស្តុភារកម្មកម្ពុជា តាមរយៈការកាត់បន្ថយចំណាយ ផ្តល់សេវាកម្មតម្លៃបន្ថែម និងសម្រួលលំហូទំនិញដើម្បីកាត់បន្ថយការកកស្ទះនៅកំពង់ផែស្វយ័តក្រុងព្រះសីហនុ។

សូមរំឭកដែរថា រដ្ឋាភិបាលកម្ពុជា ធ្លាប់បានបង្ហើបពីការបង្កើតនូវមជ្ឈមណ្ឌលព័ស្តុភារកម្មដ៏ទំនើបមួយ ដែលជាគម្រោងមួយស្ថិតក្នុងគម្រោងអភិវឌ្ឍន៍មជ្ឈមណ្ឌលភស្តុភារកម្មខេត្តព្រះសីហនុ។ គំនិតផ្តួចផ្តើមនេះមានគោលបំណងធ្វើសមាហរណកម្មសេវាព័ស្ដុភារកម្មសម្រាប់ការលើកដាក់ទំនិញ និងទូកុងតឺន័រ ទាំងក្នុងស្រុក និងអន្ដរជាតិ៕